Kipawl siamlohna koilaipan khangsaksak kha ihihiam?
Zomite I vekpi phialin thuzui a suakkhin dektak ihi hi. Bang hang hiam cih leh 70,80% kiim Pasian thuzui i hihi. Kawlgamah Zomite leh i tenna Zogam pen a khangto lo pen a zawng pen ihi lawmlawm hi. Zawng beklo in khangto lo penpen ihih banah a kithutuak siam hetlo minam ihi lailai hi. A taktak in khangto penin a hau pen gam hi lehang a kilawm mahmah gam ihi zaw hi. Bang panin khial a, kithutuak diamdiam theilo-in makaihhak ihi hiam? I khialhna khat om hi ding hi. Minam dangte ciang Pasian thuzuite a khangto leh a kithutuak siamte na hi zaw uhhi. A taktakin Pasian thuzui ei mite kipawl siamlo mahmah ihi gige hi. Bang pan lam pial ihi tam? I up Pasian thu pen Itna bulphuh in a limgen mahmah pawlte ihi hi. Gen bekin ki-it hiaulo kha hihang.
PAWLPI SUNG PAN KIKHENNA KITHUTUAH LOHNA HONG KIPAT ZIA?
Pawlpi mi hong khangkhangin Pasian nasem nuam zong kibehlaplap hi. Ahi zong a omsa siate upate-in nasem nuam thakte a khak ciangin pawlpi buaina kikhenna piang nuam mahmah hi.Siate upate in deihsak leh deihsakloh a neih ciangin Makai sung pan buaina piangin pawlpi lawh baih mahmah hi.Makaite kithutuah lohna pan hi pha diak nuam hi.
Tanglai-in hawmsem nungta nebum si, nekkhop nuamtuam puak khop zangtuam ci-in sep dingte semkhawm nek dingte ne khawm uh hi. Hausa thu leh naupang thu ci-in Ukna na mang siam uh hi. (Church planting) pawlpi i phuh ciangin phalpaklo-in kikhaktan den hi. Tua panin i lungsim meima in kipawl hong siamsak hetlo hi.
MAILAM AH KOICIH LEHANG HOIH DING HIAM?
Pasian thu a zaizawkna dingin pawlpi pen behlaplap ding mah ahi hi. Inn tuan nuam pawlpi hong om ciangin inntek pawlpi in a phuhnop uh pawlpi picing a suah zawhna ding thungetna sum leh paai van leh nate tawh huhin panpih ding hi zaw hi. A tawm pen kum 3-5 dong huh kul zaw thei hi. Amau leh amau hong din zawhna dingin.
MAILAM KIPAWLNA LEH KIZOP ZIA DING
I phuh pawlpi picing suakin amau leh amau hong din zawh ciangin amau leh amau dingsakta ding hi hang. Ahi zongin a omsa phualpi pawlpi leh pawlbup kipawlna thu leh laa tawh ahi zongin sum leh paai ki-ukna lamte neitosak ding kul hi. Tunglam nuailam kizopna neihsak kul hi. Tunglam pan pawlpi ukte in va vaan va et, a haksatnate sepsak seppih kul hi.
Koikoi ah Zomite i pawlpi a kibatloh hang Pasian a umte vive ihihi. Kizopna hoihin paizia maan leh kithutuakna sepkhopna kisiam thei pan ding hi. Pawlpi neuter in pawlpi liante itin zahtak ding, pawlpi liante in pawlpi neute hehpihin itna nakpitak nei-in kizop siam ding a kul a kisam ihi hi. I kizop dimdiam siamloh ciang i minam kalsuan zia nangawn siamsak lo hi.
TU LAITAK PAWLPI DIN ZIATE
A tawmte inn 10-30, a tamte inn 200-400 kikal bang kipha in pawlpi neuneu tampi om in, a hat a gol pawlpi tawm hi. Pawlpi mi inn tamlo tawm ihih manin kipawlna tha sum tha hatlo in na lian, vailiante sem zo lo hihang. Pawlpi hong lianin mi tam leh pilna siamna nei-in sumtha zong kihat ding na lianpipi kisem thei kisem zo bek ding hi. ki-ukna kilaih zia zui-in sangmangte patsa tampi ki nusia in na lian kisem zo lo hi.
Sangmangte in sang, zato, mittaw sang, lokho sinna sang, zato siamna sinna sang leh a dang tampi na phuankhin uh hi. RASK bang a tungin Judson College na hi masa hi. Sangmangte a kiciahsak ciangin ki-ukna zong hi kawmin amau nungthuap ding siate makaite in sangmangte zahin i pilna siamna kicinglo in zom siam nawnlo hihang.
1962 PANIN BAIKNA SUNGAH KHATHU BEK GENNA KIBULPHUH HI.
Vantung thu khathu mah nakpitakin kigenin thuzui mi zong khang mahmah hi. Thu zuisa mite taksa in thumaantak i nuntak siamna ding kihilhlo, kisin lo kigenlo zaw hi. Zomi veve i lawmdangte sangin Tedim lamte pilna siamna zekai mahmah zaw khinta hi.
2015 PAN GAM UKNA HONG KIHONG ZAW HI
Khuapi lian Zangkong, Mandalay khuate-ah zatosang, siam sinnate kihong ziahziah ta hi. Biakna makaite in thuzui mite taksa nuntakna ah kumpi deihna leh Pasian lam hong lahna bangin i nuntak siam ding i kisam lua hi. Siamna sinnna ding sang namte phuanin i neih ding kisam mahmah hi.
Koi koi i om nana-ah kilem loin kikhenkhenin i thapaai mawk hi. Hih i kikhenkhen na pen siate upate in i paipai na i tuntunna peuhan i pua suksuk kha hi. Tuhun pen koikoi ah biakna sung pan siate mah makaihkaihna zui-in i gamtat hun ahi hi. I lawmdang Zomite in pawlpi golpipi nei uh a, mi 1000,2000 bang pha hi. Tedim lam Zomite kipawl siamlo hihang. Koikoi ah iom hangin ei mite pawlpi gol tawm mahmah hi.
MI TAMIN KIPAWL SIAM LEHANG
Vai thupi na lianpipi i sep ding ciangin tha tampi kisam sum tampi mipil misiam thatang mahmah tampi kisam hi. Kipawlna siamlo gelna siamlo ihih manin sum tha hat lo ihi hi.Pawlpi in seploh phamawh hi a kici SAWLPI NA lungdamna thugen na sangmang puakna zong ihat hetkei pah hi. Hih sawlpina sep akulna makaipite in phawkkha lo zaw tawh ikibang hi. Tua hangin khalam thupha i ngah ding kiam hikha ding hi.
Tanglai hunin i pu i pate in gamdang gal, tualgal tampi na do khawm uh a,na zozo uh hi. Sepkhop nekkhop, gelkhopna i pu i pate siam zawtaktak hi. Tuhun-in phengphi in tangtat, huaiham, angsung ding genna masak kha pahpah hihang.
KIPAWL SIAM SEPKHOP SIAM DING SIN HUAI KIHILH HUAI HI
Zomite tu-in DAWI kibia nawnlo a Pasian bia hihang. Ei Christian sungah upna doctrine kibang lo-in pawlpi ka ziazua hi. Upna guipi doctrine a kibatloh hang i kibatna te thungen, laasa, thuhilh, khukdin, sumpi dong, Laisiantho, laabu, hilhna taina zatnate kibang phial hi. I kibatna 70% ahih leh ikibatlohna 30% taktak om khalo ding hi.
Biakna makaite in ei pawlin thhupi asak upna guipi a tuamdangte sinsak in ihilh mah bngin pawl dangte tawh ikibatnate zong a huamin kihilh kisinsak leh kipawlkhop, sepkhop, gelkhop siam zaw taktak ding hihang. Tuhun a kipawl khop a siamlo icihte Pasian thuzui hing a cite vive ihi zawsop hi. Biakna sungah ITNA nakgen mahmah napi ei pawlpi lote tawh kipawl siam hetlo hihang. Kipawl siam hetlohna pen koi pan kipansak kha mawk ihi hiam? ki-it ding gengen napi hangin. Laisiangtho in i galte nangawn it dingci hi. Tuhun in pawlpi khat leh khat kideidan luatna tamsak lua hihang.
EI ZOMITE KIPAWLSIAMNA KISAM MAHMAH HI
Mihingte pen langnei galneite ihi ngitnget hi. Kipawl siamna kinaksap mahmahte ihihi. I kibatlohnate thei gige in ikibatnate ah kipawl siam ni. Tua bang ihih theihna dingin biakna sung pan kipawl siam ding kisin ni.
II Kawlentuh 13:11 “ A tawpna thu in ute naute aw, na cidam ta un. Kicin na kihehnepna na nei un. Lungsim kikhatin om un. Khat le khat kilem in om un. Tua bang na hih uh leh itna nopna Pasian in no tawh hong omkhawm ding hi.” Hang Cin Hau B.Min (Tedim Khuapi, Myomah VengInn No.195)
Comment piaknop aomleh...