Mi 2 kap khin ~ Pu Thangboi
Ih gam ih lei, ih khua ih tui maban ding tawh kisai thugenna leh thu kikupnate ah mi 2 kap khin ta hi. A nih un sangsia hi.
Amasa
Akap masa pen Saalzang khua a sangsia sem khat hi. September 18 ni a kap hi. Saalzang kuam ah phone kingah vetlo hi. Phone line adeih huaina thu kagen a, phone line hoihna mun ah ka omkhak man a zi angah lawh kahihna thu ciamnuih tawh thuah in kagen hi.
Adang ih gam ih lei in akisap thu pawlkhat zong kagen uh hi. Sangsia khat hong dingto in thu agen kawm in hong kap hi. Pasal totang zukham ankham hetlo kimlai a akap ahi hi. “Ih gam ah kideidanna tamlua” ci hi. Akhasiatna thu tampi hong suut hi.
Kei zong ka nehno gawp a “Pasian in leitung abawl lai in abuan val teng tawh Saalzang hong phop hisamlo hi. Gual tawh tanbang kim ding a hong siam hi” kaci hi.
Anihna
Anihna pen zan nitak (September 24) hi. Tonzang khuapi sungah amun 7 na BOC veng ah thugenna kanei uh hi. Ka thugenna mun uh pen Khuavong Zolai sang gei hi. “Democracy gimnam ih zak zawh kum 10 phading hita hi. Hih Tonzang khuasung lam lianpi gei a sang nagawn akilaih nailoh pen lamdang kasa mahmah hi.
Hih zah a sanginn hoihlo sung ah naupang te’n bangci nopsak peuhmah ding uh ahiam. Bawng khum leng zong ut ken teh. Naupangte’ maban ih honsak kei leh ih gam maban abing hilel hi”
“Sangpi gei a tualpi tungah vanleng tual kibawl mawk hi. Naupangte kimawl thei nawnlo hi. Naupang pen aki mawlmawl ding hizaw hi. Akimawl khak kei leh alungsim leh apumpi khangto lo ding hi. Amun dang awnglo hisamlo aih teh hih sangnaupangte’ kimawlna tualpi ah vanleng tual vabawl zawzen ding hisamlo hi” kaci hi.
Aden teh mipi’ hun atun teh mipi sungpan nupi khat hong dingto in “Kei Khuavong Zolai sang a sangsiapinu hi’ng” ongcih teh ka patau man liang hi.
Thu ong gen kawmkawm in ong kap hiau hi. “Hih sang bel kawlgambup a sang teng pan hoih kei pen mah inteh” ci hi. “Sanginn akingah mah hiven ong kisut” ci hi. Ki deidanna vai mah hi.
A party in gen leng azadah om in cin biakna pawlpi tawh gen leng: Kei pen AG hi’ng. Ko AG te pen agamlum nam kahi uh hi. Ka ut uhteh tawndian in akumangte kahi uh hi. Ko nuam kasak mahmah uh hang khat veivei kiim le paam in dongkholh ongsa in amit uh adon mahmah hun om ding hi.
Party ih cih zong ih kibatpih teng tawh kikhawl in nuam ihsak hang ih kibatpih lohte’ muhna ah khat veivei dongkholh mahmah thei ding hi.
Zogam ah party tam mahmah hi. Khat le khat ih kizahtak diamdiam ding thupi hi. Ih kibatpihlote ih gal hi pahpah samlo hi. Topa aw ka gam uh hong cidam sak in Genkhialh a om leh ngaidam, Mung Laan Thang (Tonzang, Zogam)
Comment piaknop aomleh...