Gamsung gamvai luanzia lametna lamkal ah ~ Bob Tuangpi
Leitungah gamsung tualgal kidona asawt pen kici thei Myanmar pen 1948 kum gambup suahtakna ngah zawh azingteh kipan tualgal kidona tunitan kilemna diktak tawh kitawlngazo nailo hi. Suahtakna ngah khit aa kipan akhangkhang Kawlmi gam uk makaite in mualmite’ satanh ding ahawmna vuah lungsim siangtho leh thuman thutak hilozaw-in zawhthawh thu leh khembawl tungtham lungsim koi tawh mapang uh ahih ziakin tunitan gamsung kilemna omnailo hi, kici thei hi.
Tua hang mah abulpi pen ahihna tawh akhang akhang gam makaite’ hanciamna tuni ciang gamsung kilemna ding masuannate tunai gamsung kilemna maban zongh lametna sangin lamzangzo hetlo hi. Gam kikhel zawh 2015 kum pan mualmi thautawi kipawlna (EAOs) pawl (8) tawh gambup kilemna (NCA) neithei uh aa, NLD kumpi kah zawh mualmi thautawi kipawlna pawl (2) in gambup kilemna kumpi tawh neih beh uh ahih manin tunitan gambup kilemna sungah alut thautawi kipawlna pawl (10) lutkhinta hi.
Tualo thautawi kipawlna athahat penpente kipawlna FPNCC (Political Wing of UWSA, NDAA, KIA, SSA, TNLA, AA, MNDAA) cihte leh Kayah State phualsat KNPP cihte gambup kikaplohna ding thukimna (Nationwide Ceasefire Agreement) ah lutnailo uh hi. (KNPP bel Bilateral Ceasefire Agreement omkhin)
Tulaitak mualmi thautawi kipawlnate ahuampi nam (3) kisuahthei hi. Gambup kikapnawnlohna nang thukimsa pawl (NCA Signatories Group), gambup kikapnawnloh nang athukimnailo pawl (Non -NCA signatories Group) leh kumpi tawh akihonailo apualam ah a omlai pawl (1) kici thei hi.
Hih teng bilbial kawmkal ah gamsung gamvai khuahun pen tuni ciang ih et kik tak teh manawtna omlo-in lamkal ah a awkciplaitak ahihi. Kumpi leh mualmi thautawite akihona ah kumpi leh mualmi thautawite apawl apawl kihona gamkee kumpi leh gambup kumpi tawh thukimna neihmasak kul (State Level and Union Level Bilateral Ceasefire Agreement), tua khit teh gambup kikapnawnloh nang alompi thukimna (Nationwide Ceasefire Agreement) cih bang ahihi.
Tunitan ih et tak teh NCA ah alutsa mualmi thautawite leh kumpi kihona nangawn manawt theilo-in lamkal ah adinkhawllaitak uhhi. NCA sung alut lak ah athahat pen Karen National Union mahmah in kumpi muangzo pha nawnlo mawk aa NCA pawl (10) leh kumpi tawh kimuhnate (Official Talk) kihello-in angeina hilo holimnate (Informal Talk) bek tawh akihophot tadih uh tunitan hi.
Tua mah bangin NCA sungah alutnailo Federal Political Negotiation And Consultative Committee/FPNCC sung zongh ahampi khen (2) kisuah thei hi. Tuate’ sungah Wa -UWSP, Mongla – NDAA leh Shan – SSPP te kumpi tawh langnihtuak thukimna (Bilateral Agreement – State Level & Union Level) anei khinte hi uh a, tualo galvai akipawl Northern Alliance Group – Kachin – KIA, Kokang – MNDAA, Ta’ang – TNLA leh Arakan – AA cihte in kumpi tawh langnihtuak thukimna (Bilateral Agreement) tunitan khat zongh bawl nailo uhhi.
Tua hi a, tuni thugingte ih buptuah tak ciangin NCA sunglut pawl ah zongh ngaihsutna kibanglo nam (2) hong phakik uhhi. A omsa NCA zuisuakin kumpi tawh kihona zomsuak ding aci pawl leh a omsa NCA lampi zui nawnlo-in NCA sungah alut mualmi thautawite leh NCA ah alutnailo mualmi thautawite hualkhat aa paikhop theih nang lampi sial ding cih ngaihsutna thusunthak/adiak KNU (Peace Process Consultative Meeting) neih zawk ding hi, cih alunggulh om uhi.
Tua mah bangin NCA alut nading uh akal masa ahi langnihtuak kithukimna (Bilateral Ceasefire Agreement) neih theih nang Northern Alliance Group – KIA, MNDAA, TNLA, AA cihte in kumpi palai ahi Peace Commission leh galkapte tawh aneih nading uh lai kiphah tuakin akideekdeek laitak uh ahihi. Tua mah bangin atuam khat mah tawh FPNCC lutangpi Wa-UWSP in zongh NCA sung aluut nading uh kumpi tungah amau dinmun pulaaknalai aphah laitak uhi. Asawtnawnlo hunkhat ah akihonate uh hong lemtoh leh FPNCC member (7) teng in lampi (2) tawh NCA ah hong lutheitak uhhi. UWSA + NDAA + SSPP lomkhat leh KIA + MNDAA + TNLA + AA cih bangin hong pai ding uh aa, ahizongin gamvai kihona tatak ( Political Dialogue) ciang’n FPNCC min tawh paisawm uhhi.
Tuate’ nungah tulaitak Hluttaw sung gamvai paizia ahih leh 2008 thukhunpi puah ding Komiti (2008 Constitution Amending Committee) te in nasep manta uh ahih man’n asawtnawnlo hun ah gambup innpi (Pyitaungsu Hluttaw) ah 2008 thukhunpi puah ding vai thusunna hong neita ding uhhi. Atamzaw NLD leh mualmi party te hong dingkhawm ding uhhi. Galkap, USDP party leh mualmi palai tawm hong kipawl ding uhhi.
Tua ahih manin, hih teng bilbial kisaina ah gamvai ah Kawl veve NLD leh Galkap + USDP zongh hong kisai hamtang ding uhi (Conflict of Interest), NLD in zong 2020 kiteelna ah mipi maipha angah nading akamciam tangtun nang ahih theih zah 2008 thukhunpi puah ding hong limsawm mahmah ding aa, galkap + USDP in zongh ahih theihzah siitlo hong dal ding uhhi. Tua kawmkal ah NLD mah in gambup kilemna maban 2020 hanciam ding aa, ahih hang tungen abat leh lawhcing khollo ding hi.
Union Peace Conference – 21st Century Panglong a (3) veina anunung pen July, 2018 khawmpi thukong khakna ah State Counsellor Aung San Suu Kyi in agenna ah 21st Century Panglong pen 2018 khatvei, 2019 sung nihvei leh akisapzui 2020 khatvei bawllai ding acih pen tudong kizomkikzo nailo hi.
Atung aa thu teng ih khinkhaikik tak ciang’n hih akicianlo gamsung gamvai khuahunluanzia bilbialte’ sungah mimal citawm Zomi te akipan mualmi thautawite in thautawina pan gamvai platform abaihlam ngah pak nading hunhoih maw? Hunthak khat ngakkullai maw cih khuadaksiam mahmah akul hun zongh ahihi. Bus mawtaw khat lamzikpi dungah atuang nuamte pua dingin taitailai-in bus stop/mat taing ah akhawl simin akah nuamte kah aa, atuak dingte tuakin a Bus mawtaw ataitai laitak ahihi. Bus mawtaw pi akhawl suak nading mun atun teh kong kikalhin zankhual mialta ding hi. Ahizongin ih painopna mun hong tunpihlo ding Bus ih tuankhialh khak leh bel leitang ih kizepna hong suak thei ding hi. Agelh : Bob Tuangpi
Comment piaknop aomleh...