Mangpha, Nu Catharina Ning Khan Vung (Lailo)

Mangpha, Nu Catharina Ning Khan Vung (Lailo)

Athu: Nu Catharina Ning Khan Vung ong nusiatna hanga dahna pulakna – Dear it leh ngaih Zomi Innkuan Oklahoma, OK pawlhuam sunga om Zomi khempeuh aw, December 4, 2014 ni in, Nu Catharina Ning Khan Vung W/O Pa Suang Zen Lian (Lailo khuami) in Oklahoma State, Glenpool (Tulsa) khuapi a teng, a pianpih laizom Pa Pau Khan Khual te inn phualzang panin sunglam damlohna hangtawh a leitung nuntakna hong nusia ta hi.

Nu Catharina Ning Khan Vung (kum 39) pen Malaysia panin USA ongtunzawh kha (3) kimkhawng hipanin leitung nuntak nuamzawding lunggulhna tawh ei te mahbanga ong peemta uh hi-in hibanga USA gamsunga nuntak khuasakzia nuamtak sinman nailoa ong nusiatna hangin Zomi Innkuan Oklahoma kipawlna min tawh nakpitak in kidahpih, ki khasiatpih mahmah hi.

Nu Catharina Ning Khan Vung pen Zomi Innkuan Oklahoma pawlmi kician mahmah khat leh Zomi Innkuan USA Genvai Thukhun apomkhin khat a hihna dungzui in ZIUSA Genvai Thukhun ombangin Zomi Innkuan USA kipawlna in a luang kipham/ kivui ding hi. Tua ahih manin, Nu Catharina Ning Khan Vung’ luang phamna/vuina sum dingin, ZIUSA Genvai thukhun ombangin ZIUSA Genvai Sum sung pan $5,000 (Dollar Tul Nga), Zomi Innkuan USA kipawlna min tawh kipiakhia ding hi.

I sanggamnu Nu Catharina Ning Khan Vung ong nusiatna hanga a dah a kap adiakin a it mahmah a pasal Pa Suang Zen Lian a kipan a sanggam laizom, tanau meltheih, khuapihtuipih khempeuh i biak vanglian Pasian khasiangtho in ong hehnepsak henla a luang khitui te ong nulsaktek tahen cihthu kongngetsak uh hi.

Nu Catharina Ning Khan Vung hun nunung zatnading tawh kisai hungelna a nuai a bang a hihi.

• Body Viewing: Luanghawm vehna
• Ani: December 7, 2014 ( Sunday )
• Ahun: 12:00 PM ~ 8:00 PM
• Amun: Fitzgerald Funeral Service ( Calvary Cemetery hanmual gei mah hipah )

December 8, 2014 ( Monday ) ni zingsang 10:00 ~ 12:00 PM hunsungteng zong Tonu Maria Siangtho Lungtang biakinnpi sungah a luanghawm kivel/ ki enthei ding hi.

Luanghawmvui nading vai:

• A ni : December 8, 2014 ( Monday )
• A hun : 12:00 PM ( Misa/Mass tawh kipan ding
• A mun : Tonu Maria Siangtho Lungtang biakinnpi
• Siampi : Father Kimpu

Biakinn pan Misa/Mass hun mankhitciangin a luanghawm pen Calvary Cemetery hanmual ah vuina kinei ding hi.

Kongit kong zahtak zomi khempeuh aw i minampih, i sisanpih khatin ong nusia ta a hihmanin Vaphual lungtang a nei Zomi a kua mapeuh a diakin Tulsa khuapi leh a kimnai a om a mipih sapih khempeuh in i sanggamnu hun nunungah lainatpihna, dahpihna lahna in i pai kimtek nadingin a kua mapeuh a ki hanthawn hini ei. navekpi un mangpha!

Dahpihna lianpi tawh, ZIOK Board of Directors teng taang’in, Pa Tual Sawm Lian (Chairman, Zomi Innkuan Oklahoma, Tulsa, OK) December 6, 2014