Muhammad Wanndy Mohamed Jedi akici hih atung a Photo pen Malaysian gammi IS galkap khat ahihi. Hihpa pen ki thatlup khinhi ci’n Malaysia Inspector-General of Police Tan Sri Khalid Abu Bakar in genkhia hi.
Malaysia Police te’n agenkhiatna ah hihpa pen April 29 ni in Syria gamsung Raqqa khua ah aki thatlum ci uhhi. Hihpa pen Malaysia kumpi inzong matding in alunggulh mahmah uh “Wanted List” sungah akihel khat ahihi.
Abeisa kalkhat sungbang hihpa si kici in thuthang tuamtuam kiza kawikawi hi. Ahi zongin athu ki theicianlo ahih manin, Malaysia kumpi lampan in genkhiatna neilo uhhi.
Ahi zongin zanni in Inspector-General Khalid in April 29 ni in Raqqa ah akithat cihpen aman taktak hi ci’n Twitter tungtawn in genkhia hi.
Muhammad Wanndy pen Malaysia gamsung aom Melaka, Durian Tunggal khuapan ahihi. 2015 kumin Syria gamsungah IS tetawh kipawlin nasemkhawm dingin akuankhia ahihi.
IS migilo te Fund zonna leh Operation panpihna limsep mahmah ahih manin, US kumpi inzong “Most-wanted list” sungah akoih khat uh ahihi.
Hihpa’n pen Social Media leh Messaging Apps (Facebook, WhatsApp) tungtawn in IS galkap lutding kaikhawm kici hi.
Syria gamsung ah aomzenzen hangin Malaysia gamsung aom IS migilo te gamtatna khempeuh pen ama makaih ahihi. 2016 June kha sungin Selangor, Puchong sung aom Movida Night Club ah Bomb puakkham ngei hi.
Tua pen Muhammad Wanndy ii sepsak kici a, Malaysia gamsung ah IS migilo te ngongtat masak penpenna ahihi. Movida Night Club buaina hangin mi 8 in liamlawh hi.
Abeisa in Malaysia gamsung ah IS migilo akiman khempeuh pen Muhammad Wanndy tawh kizom hamtang uhhi. Malaysia gamsung aom IS galkap te’n Muhammad Wanndy ii thupiakloh in bangmah semtheilo uh kici hi.
Related: Malaysian gammi IS makaipipa US kumpi in “most wanted” sungah koih
Tu’n hipa sikhin ahihleh Malaysia gamsung ah IS galkap te hong thakiam zawdeuhdiam…. ZD Sawltak #zomidaily
Comment piaknop aomleh...