Itna in ong mu hi (Love that sees) ~ Suang Dal
Mangte’n, “love is blind” paunak nei uh hi. Itna in a mittaw hi cihna hi. A deihna pen it peuh rehang mawhna kimaisakin, a hemna le a phatmawhna khempeuh mu nawn lo-in hong it sak ngam, hong sem sak ngam cihnopna daan ahi hi. Ahi zongin LST in itna pen a mittawin na gen lo hi. A mittaw lo itna ci-in na gen zaw hi. Love sees. Itna in mu hi. Itna in khentel hi. Itna in thu khual hi. Itna in kiim le paam khual hi. Itna in eimau’ deihna hong kinial sak hi. Itna in midangte’ aa dingin thu khual itna tawh gamta hi. Itna in thu khen hi cih bangdanin gen zaw hi. Cihnopna ah itna bulpuh gawp a thu kigen thei khin sam lo hi. Tu hun Pasian’ thu gen mi tampi takte in Pasian itna tawh mi zawl uh hi. Pasian in nang ong it hi. Nang sangin a manpha zaw om lo hi.
Pasian in zong nang lo-in bangmah sem thei tuan lo hi cih zah dongin a gen ngam om hi. Pasian pen itna hi ci-in gen uh a, Pasian pen ih mawhnate hanga thu ong khen ding Pa ahihna thu gen lo uh hi. Pasian pen itna hi cih bulphuh lua-a thu gen Syate in mite a mawhna uh kimu thei sak lo uh ahih manin, kisikna (repentance) le mawhmaisakna (forgivenness) piang thei lo hi. Mi mawh ih hih lam hong kitel sak lo Pasian’ itna bulphuh thu gen luatna in mite a mawhna uh pan’n kisik sak thei lo a, kisik kei leh mawh kimaisak thei lo a, mawh kimaisak kei leh vantunggam ki-itna sungah lut thei lo ding uh hi. Tua ahih manin itna pen siangthona tawh a kikhaih (purified) kul hi. Tua ih bulphuh itna siangtho maw, Siangtho lo? cih thu om hi.
Pasian pen itna ahih mah bangin Pasian pen siangtho Pa le thukhen Pa zong ahi hi. Pasian’ hihna pen Itna (Love) bekin ciangtan lo hi. Pasian pen itna hi. Pasian pen a siangtho Pa hi. Pasian pen a kiciangtan lo Pasian hi. Pasian pen Kha ahi hi. Pasian pen a piangsak Pa (the Creator) zong ahi hi. Pasian ii ahihna dang tampi om lai hi. Pasian pen itna bek hi suk ziau lo hi. Itna in Pasian uk lo-a, Pasian in itna, sianthona cihte uk zaw hi. Ithna pen Pasian hi lo-in Pasian pen itna hi zaw hi. God is love. Love is not God. Itna pen Pasian ii hihnate lakah khat hi lel hi.
Pasian pen itna ahih manin bangbang ka bawl zongin ong it veve inteh ci kha kei in. Pasian pen itna ahih mah bangin a siangtho Pa zong ahih manin tua a sianthona tawh itna sit-in khaihkhia hi. Tulai leitungah a kigen bulpi pen itna thu ahi hi. Itna nei peuh rehang cih thu bekbek saktheih pi-in kinei hi. Tua thu tawh kisai-in LST in bang gen cih ih tel loh pawlkhat om ahih manin tua thu ih gen ding hi. Itna ih nei zo mah hiam leh? cih thu lungngai ding hi hang.
Si le sa ki-itna pen a mittaw hi. Leitungah tu ni ciangdong a kibuai pih pi pen ci le sa ki-itna ahi hi. Tua si le sa ki-itna tawh thukham sawm kipua khia zo lo hi. Ahi zongin a genbaang lo ki-itna a piangsak zo (thukham) a puakhia zo khat om-a tua pen Topa Jesuh ahi hi. Topa Jesuh ii a genbaang lo ong tatkhiatna sisan itna sungah eite upna tawh kalsuanin ih it tak ciangin, tua itna in itna maan hong nei thei sakin khua hong mu thei sak pan hi. Khua a mu itna pen Jesuh’ sisan sungah upna tawh kingah thei bek hi. Jesuh’ sisan sung pan’n upna tawh a kipan masa lo itna peuh mah a mit taw itna ahih banah, a genbaang itna hi tawntung ahih manin buai tawntung ding hi.
Jesuh’ sisan sung pan’n mawh hong kimaisak pa, mawh hong kimaisak nu ih hih masak bekna tawh itna maan kinei thei pan hi. Tua singlamteh itna maan ih ngah ciang bekin itna maan kikhahkhia thei pan ding hi. Tu-in tua na mawhna hong kimaisak theih nadingin nang mah a it zo na hihna tawh kingah zaw maw? Nang’ tang dinga a it zo pa Jesuh sungah upna tawh kingah hi zaw? Mawhnei nang le kei adingin koi masa zaw? Itna maw? Upna?
A it huai lo, a mawhbaang si le sa ki-itna a nei eite pen Pasian in a sianthona tawh thu ong khen leh kuamah suakta lo ding ih hih manin a genbaang lo itna a nei tangmi Jesuh Khrih sungah upna ih kisam masa hi. Tua thu pen Pasian ong kalh itna hi a, Pasian in a kimu thei itna tawh ahong itna a Tapa neih sun ahong piak dongin ahong lak ahi hil. Pasian in a muhna tungtawnin a kimu dingin nasem hi. Evan. Suang Dal
Comment piaknop aomleh...