Malaysia vanleng MH370 amancip zawh kum 3 cingta

Malaysia vanleng MH370 amancip zawh kum 3 cingta

Malaysia Airlines MH370 pen abeisa 08 March 2014 kumin amangcip hi a, tuni Wednesday 08 Mar 2017 ni in kumthum tak acing hita hi. Hih vanleng tungah mi 239 atuang uh hi a, avek un mangthangcip hi. Tua mite phawkna in tuni Malaysia Parliament in Minute khatsung daitak in zahtakna piakna nei uh cihi.

Hihbang in zahtakna piakna neihding pen Transport Minister Datuk Seri Liow Tiong Lai in avaihawm hi a, tuni Parliament sungah 11:40am hunin gamdaitak in zahtakna pia uhhi.

Hih Malaysia Airlines Flight MH370 amancipzawh gamtuamtuam in zoncihtak mahin azongkhawm ngeingai uh hi a, ahi zongin kimuzotuan nailo hi. Malaysia kumpi inzong hih vanleng zonna hangin RM456 million kibeikhinta ci’n genkhia hi.

Tua sumbei RM456 million pen abeisa July 2016 masiah kumnih leh alangsung in akizang sumbei hi cih Transport Minister in genkhia hi. 2016 July kha ciangin bangmah ki lamdanna omlo ahih manin Search Mission pen dinkhawlphot uhhi.

Ahi zongin upmawhhuai pansan kician “Credibel Eviden” aomkik zenzenleh Search Mission pen kipankik dinghi ci’n genbeh hi. Anuai ah athu akitelzawdeuh nasimbeh nopleh…..

A mangthangcip Malaysia vanleng vai “Final Technical Report” pulakna omding

A mangthangcip, aki mukikzo mahmahlo ahih Malaysia Airlines Flight MH370 vaitawh kisai in “Final Technical Report” pulakna pen tukumsung in kineiding cih theStar pan kiza hi.

Malaysia Transport Minister Datuk Seri Liow Tiong Lai in nungkal in agenkhiat hi a, tulaitak MH370 vanleng akizonna khempeuh akiciantak in “ICAO Annex 13 Safety Investigation Team” kicite’n kaikhawm uh a, avekin gawmtuahkhawm uh cihi.

Malaysia Airline MH370 pen 8 March 2014 ni in amangthangcip ahihi. Malaysia Kuala Lumpur International Airport panin Chinna Beijing International Airport zuanding in alengkhia himahleh lamkal ah mangcip hi. Leitung gamtuamtum tawh kipawlkhawm in aki upmawhna khempeuh zongkawikawi himahleh ki mukhiazo mahmahlo a, tu in kum 3 acingding hita hi.

Hih vanleng pen amancipzawh aki zonzon hangin kimuzo mahmahlo ahih manin, 22 July 2016 ni in Malaysia, China leh Australia gampan ulian te’n bangbang hileh sumtampi bei in kizongkhin ahihciang dinkhawl photni ci’n kizongnawnlo phot hi. 2015 kumsung bekbek inzong Malaysia kumpi in apulakna ah hih vanlengmangcip akizonna in sum Rm79 Million beikhin cihi.

Malaysia Transport Minister pa’n agenna ah vanlengzon aki dinkhawlzawh Investigation Team te kiangah amukhiatna khempeuh uh kaikhawmding in akigen hi a, “Final Technical Report” pen tukum beima limlim in ki pulak khiatheiding hi ci’n Reporters te kiangah genkhia hi.

Tuaban ah nungdiak inzong MH370 ii athemneng hiding in aki ummawh 2 zong ki muhbeh cih pulak khiatna neihi. Tuciangciang MH370 ii athemneng hiding in aki ummawh pen 27 bang ki kaikhawm khinta hi.

Tuabek thamlo Malaysia kumpi inzong amau gam ii vanleng mangcip himawk ahih manin, Indian Ocean tuipidung aom gamkhempeuh tawh thukimna “Memorandum of Understanding (MoU)” bawl uh a, tuinawl ah MH370 dingin upmawh athemneng khatpeuh namuhkhak zenzen uhleh hong zasakpah un ci’n ngetna nei uhhi.

Tuabang in athemneng dingin aki ummawh khatpeuh aom ciangin ki zasakzel a, Malaysia kumpi in Response Team te paisak in, kaikhawmsak zelzel uhhi. Tuabang in akaihkhop khempeuh athu akicianzaw in pulak khiatna zong asawtlo in neiding cihi.

More: Malaysia vanleng MH370 zonna in sum RM79 Million kibeikhin

Hih amangthangcip Malaysia Airline Flight MH370 tungah nasem Malaysian Airlines Crew mi 12 leh Passengers mi 227 atuangkhawm uh hi a, akigawm in mi 239 pha uhhi. Gamtuamtuam akigawm in gam 15 pan ahi uhhi. Tua mi 239 tepen kum 3 bang acingding himahleh bangmah muhkhiatna omvetlo himawk ahih manin, a innkuanpih te adingin khasiat huai mahmah hi. ZD Sawltak #zomidaily