USA, Mississippi State sungah meileng in Bus phukha, mi 4 si in 35 liam

USA, Mississippi State sungah meileng in Bus phukha, mi 4 si in 35 liam

USA, Mississippi State sungah Tuesday ni in meileng khatin Bus khat phukha ahih manin mi 4 in sihlawhkhin a, aliamzong mi tampi om cih AFP News pan kiza hi. Biloxi City sungah Tuesday 2pm hunpawl in thupiang hi a, meileng lampi kantannading in akibawl Railroad Crossing ah meileng in Bus aphukha ahihi.

Police chief John Miller in agenna ah meileng leh bus ki phutkhakna munpen limkhap huai mahmah ci a, ahi zongin tu’nbel akisamteng ki vaihawm khinta cihi.

Tua Bus pen Texas State, Austin City panin aki bupsaap Charter Bus hi a, Biloxi CIty sung aom Casino lam azuan hiding kici hi.

Tuahsiatna aphual ah mi 3 sipah uh a, adang khatpen adenlamdeuh ciangin si hi ci’n Fire Chief Joe Boney in Sun Herald Newspaper te kiangah genkhia cihi.

Hih Charter Bus tungah mi 43 atuangkhawm uh hi a, mi 35 liam uhhi ci’n Newspaper te’n genkhia uhhi.

Hih tuahsiatna ageipan atheikha khat ii genna ah Charter Bus pen meileng lampi tungah Railroad Crossing kibawlna ah akantan laitak in awkcip citciat cihi. Meileng painading akibawl sikzawn tungah Minute 5 sungkhawng awkcik in aom laitak in meileng hongpaitawh kituaklian ahih manin, meileng in aphusukkha cimawk uhhi.

More: USA ah Kawlgammi khat mawtaw Accident in si

Laisim te’n Comment ah nong cihsuk gawpzelma un 🙂 keizong ka ngaihsut ah banghang in Bus a awkcip lehzong, Bus tungah atuang khempeuh ki hemkhia, kumkhia sakphotlo uhhiam? cihnop huai mahmah hi. Ahi zongin tuahsiatding ciangin bangmah gentheih hilozel a mataw….. ZD Sawltak #zomidaily