Malaysia Police alianpenpa leh ulian honkhat gampua paiding kikhakcipta

Malaysia Police alianpenpa leh ulian honkhat gampua paiding kikhakcipta

Abeisa in Malaysia gamsung ah palik thukan alianpen asempa ngeipa Inspector-General of Police Tan Sri Khalid Abu Bakar zong gamdang apuapial theiloding in “Travel Ban List” ah kikoihta cih NST pan kiza hi. Amahpen Malaysia gamsung ah Inspector-General of Police kum 4 sung asemman hi a, ama sepsungpen 17 May 2013 pan 4 September 2017 ahihi.

Tuaban ah Attorney-General Tan Sri Mohamed Apandi Ali, former Treasury secretary-general Tan Sri Mohd Irwan Serigar Abdullah leh former Malaysian Anti-Corruption Commission chief Tan Sri Dzulkifli Ahmad cih ulianpi mi 3 tezong Travel Ban List ah kikoih uhhi.

Apandi Ali pen abeisa Najib ii vaihawmna nuai ah 1MDB Scandal vaitawh kisai in Evidence pawlkhat selcip cihtawh akimawhsak ahihi. Zanni akipanin amahpen ni 30 sung Unrecorded Leave kipia hi.

Irwan Serigar Abdullah ahihleh abeisa in 1Malaysia Development Bhd (1MDB) chairperson asem hi a, ahi zongin Monday ni akipan Ministry of Finance panin ki hemkhiata hi. Tuaban ah 1MDB vaitawh kisai in amahpen Witness kician mahmahkhat in Public Accounts Committee’s Investigations te’n aciapteh uh ahihi.

Online News Portal Malaysiakini te genkhiatna ah abeisa in 1MDB Affair tawh akisawhkha kumpi nasem ulian tampitak gamdang azintheilo dingin Travel Ban List ah kikoihhi ci’n pulakkhia uhhi.

Abeisa in Prime Minister asem ahi Najib Razak leh azi Rosmah Mansor tezong gamdang apusuak theiloding in Travel Ban List ah Saturday ni pekpanin akikoihkhin ahihi.

Senior Police Officers panmun kilaihding

Malaysia palik zumpi ahi Bukit Aman panin thunei te genkhiatna ah Senior Police Officers honkhat panmun kilaihding cih MalaysiaKini pan kiza hi. Tuabangin Senior Police Officers panmun akilahding pen ulianpi mi 5 hi a, June 18 ni akipan amau ii panmunthak akipiakna tawh kizui in nasep kipan pahding uh cihi.

Wednesday niciangin Anwar Ibrahim thongsungpan suaktading

PKR secretary-general Datuk Saifuddin Nasution in agenkhiatna ah amau ii makaipi PKR de factor leader Datuk Seri Anwar Ibrahim pen Wednesday niciangin thongsung panin suaktading hi ci’n genkhia hi.

Anwar Ibrahim pen tulaitak Cheras Rehabilitation Centre ah akikem hi a, tuni inzong PKR secretary-general vahawh in, nai 3 sungbang kihona nei uhhi.

Ama genkhiatna ah Anwar Ibrahim pen Cheras Rehabilitation Centre panin Sungai Buloh Prison ah apaikik kulnawnlo dinghi. Amahpen Wednesday sunlam akipan misuakta “free man” hitading hi ci’n genkhia hi. Kumpipa Yang di-Pertuan Agong Sultan Muhammad V inzong hehpihna Royal Pardon piakding in phalna piakhin cih kiza hi.

GST phiatmaiding ki hanciam suakding

Malaysia gamsung ah abeisa 01 April 2015 panin akizang toto ahi GST (Goods and Services Tax) pen phiatmaiding ki hanciam suakding hi ci’n Tan Sri Zeti Akhtar Aziz in genkhia hi. Amahpen Governor of Bank Negara Malaysia (Malaysia’s Central Bank) ah asem hi a, tuaban ah Council of Eminent Persons ahzong akihel ahihi. “No turning back on GST abolishment” cilian hi.

Malaysia gamsung ah Ramadan kipan tading

Malaysia gamsung ah Muslim te antanhun Ramadan pen hongtungding Thursday ni akipan akipanding hita hi. Hih Ramandan azat hunding tawh kisai in Keeper of the Rulers’ Seal, Datuk Seri Syed Danial Syed Ahmad in tangkona neikhiata hi. Ramadan hunsungpen abeisa kumte mahbangin khuasung ah palik hong tamphadiakding ahih manin hawhna ciahna ah kidawm ciatni. Tuaban ah palik ulian honkhatzong apanmun kilaih uh ahih manin, abeisa hunte ah akizangthei ki theihsiamna “naa-le-muh” cihte hong omnawnlo khatheiding hi. Sawltak #zomidaily