Malaysia, Terengganu ah Operasi lut in, mi 14 kiman, Myanmar kihel

Malaysia, Terengganu ah Operasi lut in, mi 14 kiman, Myanmar kihel

Malaysia, Terengganu State sungah Immigration Department te’n “Ops Ikrar’ raids” ci’n Operasi bawl uh a, gamdangmi phalna neilo in nasem “illegal foregin workers” mi 14 mankhia uh cih NST pan kiza hi.

Kuala Terengganu leh Hulu Terengganu sungah zanni in Operasi alut ahihi. Department director Wan Suhaini Wan Mohamad in agenkhiatna ah akiman gamdangmi tepen Myanmar, Bangladesh leh Indonesia gammi te cihi. Akiman gamdangmi tepen kum 19 panin kum 45 kikal ahi uhhi.

Chendering (Kuala Terengganu) leh Hulu Terengganu sung aom Kampung Tok Randok sungteng ah nasem in aom gamdangmi te lakah Operasi alut ahihi. Construction Site muntuamtuam ah alut kawikawi uh hi a, nasemte omna Workers Quarter (kongsi house) panin aki mankhia cihi.

Immigration Department’s enforcement officer Malik Zaliman Deraman in makaih in, Officer bekbek akigawm in mi 13 in Operasi abawl uh ahihi. Naiguksung akizom in Operasi abawl uh hi a, nitaklam 3pm hunpawl in mansiangpan uhhi.

Tuahunsung ah Myanmar gammi 4, Indonesia gammi 5 leh Bangladesh gammi 5 kiman in, phalna omlo in nasem cih mawhna tuamtuam tawh “Immigration Act 1959/63” thukhun palsak ci’n thu kibawl uhhi.

Akiman gamdangmi te lakah mi 9 in Travel Document neilo uh ci a, adang mi 4 tepen Social Visit Pass tawh aomsuak cihi.

Related: Malaysia gamsungah Operasi hangin akiman mi 2832 phakhin, Myanmar 223 kihel

Akiman gamdangmi tepen Hulu Terengganu aom Ajil Detention Centre ah kipuak cih kiza hi. Malaysia gamsung ah phalna kician neilo, Work Permit leh Travel Document cihte neilo in gamdangmi te aomlaisiah Operasi pen abawlbawlding uh hilel hi. Ahi zongin tualak ah ihki helkhakloh nadingin kidopsiam, kikepsiam ding thupi dinghi. Nasepna Boss te inzong hongdeihsak uhleh tampi hong huhthei, hong busakthei ahih manin, nasepna Boss tetawhzong ki thuhualding, amaipha ihmuhzawhding thupi khading hi. Sawltak #zomidaily