Japan gamah khe uih gimnam anamtheiding Robot uino kibawl

Japan gamah khe uih gimnam anamtheiding Robot uino kibawl

Japan gamsung aom innsung khempeuhphial akilutding ciangin khedap kisuahkhia hi. Tuabang in khedap asuahkhiat uhciangin khe uih theidiak te adingin maizumhuai mahmah hi. Pawlkhat te akhe ulsuak phadiak, uih phadiak in midang te khutlela theihi.

Ahi zongin khe uih te’n amau leh amau kitheilo, amaukhe a uihlam theilo uhhi. Midang khatpeuh kiangah kakhe a uihhiam ci’n dotdihdih ding, napsak dihdihdinglah maizumhuai mahmah hi.

Tua ahih manin, Japan gamsung aom Technology Company khatin khe uih anamtheiding Robot uino bawlkhia uhhi. Tua uino in khe uih leh a uihloh hong napsakthei dinga, a uihleh maitang zahtaklo, hehpihhuai hongsalo (aa na lo) takin honggending cihi. Khe uih mahmahte tua Robot uino in anapkhak ciangin, uih asakluatleh sibup in tukval liangding cimawk hi.

Tua Robot uino minpen “Hana-chan” ci’n Japanese minkhat vawh uh a, akhiatna pen “nak” acihna ci uhhi. Hih Hana-chan in khe uih gimnam azak peuhmahleh hongnakpah leklekding cise hi.

Hih Hana-chan kici Robot uino pen asauna 15-centimetre (6in) khawngbek hi a, anak munsan ah agimna atheiding in “odour detection sensor” kikoih hi. Khe uih gimnam bekthamlo, Air Freshener akhauhlua mahmah tezong hih Robot uino in zathei in hong hilhsawn theiding cihi.

Manufacturers Next Technology te’n mipi ngetna tungtawn in hih Robot uino abawlkhiat uh kici hi. Khe uih pen midang napsakding maizumhuai ahih manin, hihbang in Robot uino abawlkhia uh ahihi.

Japan gamsung ah gim namsia pen kihua mahmah cihi. Pumpi gimnam akhauh simsim tebang nawngkai kisa mahmah in, ki nawlkhin pianpah cihi.

More: Japan gamsung misipuah kidemna kibawl in numei khatin akhatna ngah

Hih Next Technology te bawlkhat Robot uino pen maikum kipatbawl in kizuak khiatading ci a, khatciangin Yen 100,000 (US$890) tawh zuakding uh cih kiza hi. Japan te’n Technology pen zawhthawhbawl mahmahleh kilawm a, adeihdeih uh bawlziauziau theimai uhhi. Zi ding nangawn mihing numei tangin, Robot numei bawl uh a, tuatawh alungkim tampi omkhinta cimawk hi. Sawltak #zomidaily