Thupha-ngah Minam pan Thupha-hawm, Thupha-zek Minam ah

Thupha-ngah Minam pan Thupha-hawm, Thupha-zek Minam ah

Zomi te’n thupha ih deih mahmah hi. Ih kam pan Thupha Thupha cih bekbek ging mun mahmah hi. Zong adeih huai takpi hi.

Thupha cih pen Pasian bek in hong pia thei a sum leh pai tawh kilei theilo ahih man in deih huai mahmah hi.

Mihai lo buang in thupha deih hi.

Ahizong “Thupha” zawi bang teng om hiam cih ih lungngai ngei kholkei hi. Topa Zeisu honpa leh gumpa a sang masalo in tua Thupha Zawi ah ki om theilo ahih lam bel theihsa ciat hi’n um ing.

Thupha Zawi tampi lak ah “Piakkhiatna” pen Thupha Zawi hoih mahmah khat ahi hi. Pasian’ zia zong ahi hi. LST pen hih Piakkhiatna thu tawh kidim cih theih phial hi.

Abraham’ tapa neihsun meihal biakna in apiak ding in Pasian in anget pen “Abraham khakham vei in cihmawh liangvai in om hen; ata neih sun nangawn sihsuah hen; genthei tapeuh hen” cihna na hi hetlo mawk hi. Pasian in Abraham thupha apiaknop luat man a atapa angen nahi mawk hi. Atapa apiak khit teh ensuk leng Pasian in Thupha abiik abaak in pia hiau mawk hi.

Abraham’ nuntakna atom in en leng;

1. Abeh aphung, anu apa leh akhua atui nusia hi. (Ama’ ading in nuam asak mahmahna mun a comfort zone anusia himawk hi)

2. A it mahmah Lot nusia hi. “Nang’ pailoh nana lam ah pai ning” cingam hi. A it mahmah hang nusia ngam hi.

3. Ishmael nusia hi. Paikhia sak hi. Asung pan a piang ata mah hi. It mahmah ding hi.

4. Isaac that ding dong in kizo hi. Teknung guai nung a angah hi. A zi tawh akhantawn uh thu anget nung vua angah uh hi. Nak pammaih mahmah hi. Ahih hang Pasian in anget teh piangam hi. Apiakha vat hilo hi. Apiakna ding mun ni 3 sung pai ngiat lai uh hi. Lampi ah kisik kik hun ding ngah mahmah hi. Kisik tuan lo hi. Piakhia ngam taktak hi.

Thupha ngah tak kasa hi. Thupha lianpen ahi Topa Zeisu pen Abraham’ khanggui sung pan in hong piangkhia hi.

Thupha nangah nuam hiam ?

Piakkhiatna pen thupha zawi hoih khat hi. Piakkhiatna ih cih pen nusiatna khat hi. Bang lo khat nusia lo pi in piakkhiatna piang theilo hi.

Pasian in zong a Tapa Neihsun hong piakkhiat pen Ama’ zia mah Ama’n azui ahi hi. Tua piakkhiatna pen pung mahmah a tuni dong pung toto lai hi.

Punna cinna, thupha ngahna ih cih pen Piakkhiatna pan a kipan ahi hi.

Naneihloh pipi mah napiak athupi ahi hi. Abraham in ta 10 nei a 1 apia hilo hi. 1 aneih pen mah piasuk lel hi.

Na piak te’n kisam unteh cihna hi masalo hi. Nang thupha ngah ding a kilawm na hih man a apia nahi zaw hi. Hallelujah !

Zomi te thuphangah Minam pan in thupha hawnkhia ziahziah leh thupha zek khia ziahziah Minam ih suah ding lunggulh huai mahmah hi.

Tuni kipat pah ding hi.

Khasiangtho Pasian in hong lawng ngiat hen, Amen !

Nong-it

(Mung Laan Thang)
Zangkong