Malaysia, Terengganu ah gulpi in mikhat vialgawp in si

Malaysia, Terengganu ah gulpi in mikhat vialgawp in si

Malaysia, Terengganu State sung aom Jabor khua ah gulpi khatin mikhat vialgawp in si cih Bernama in genkhia hi. Tua asipa pen kum 49 aphakhin Safar akicikhat hi a, aphual ah sipah cihi.

Kampung Batu Rambutan, Jabor akicihna khua ah zanni Friday (17 Feb) ni in thupiang hi a, aviallum gulpen Python akici Thampi ihcih tepawl ahihi. Thampi ii viallup Safar kicipa pen Indonesia gammi hi a, Jabor khua ah alawmte kiang ahawhkhit ciangin Motorcycle tawh amahguak aciahkhia cihi.

Aciahna lampi ah gulpi in lamzik akanlaitak atuakkha hiding in ki ummawh a, amanzong matsawm hileh kilawm hi. Ahi zongin tua gulpi pen agitloh suaksakkha ahih manin, tuapa pen navialcipgawp hihtuak hi.

Agei ah amukha Mohd Yazid Ibrahim kici kum 30 khat ii genna ah amahzong Kampung Jabor panin innlam zuanin aciahkhia cihi. Tualaitak huhna ngetna aw zakha ahih manin, adelh ciangin gulpi in mikhat navialcipgawp cihi. Akhe panin a ngawngdong vialcipgawp in, bangmah tangkhiathei vetlo cihi.

Tuapa’n zong ahot khiatsawm hangin gulpi pen gilolua ahih manin, amanzong khuasung mite kiangah huhna ngending in azi taisak hi. Khuasung mite huna tawh tua gulpi pen sattan in, thatlum thei uhhi.

Ahi zongin khuasung mite ahuhding in atunma naikhat sungbang gulpi ii vialcip gawpkhin ahih manin, liamna tampi tawh aphual ah sipah hi.

Tua gulpi thampi zong ki thatlum in, agihna akiteh ciangin 100 kg pha cih kiza hi.

Kemaman District Police Chief khatinzong hihthupiang amanmah ahihlam genkhia a, “Sudden Death” ci’n ciamteh hi. Aluanghawm pen Kemaman Hospital ah Post-mortem bawlding in kipuak cih kiza hi. ZD Sawltak #zomidaily

Thuthak tuamtuam natheihnop leh Zomi Daily Page facebook.com/ZomiDaily ah Like napia inla, Follow namek khitciang “See First” acihpen namek ve lawm…..