Malaysia Puchong ah Bomb kitam pen IS te gamtatna ci

Malaysia Puchong ah Bomb kitam pen IS te gamtatna ci

Malaysia Police te’n June 28 ni Puchong aom Movida Nightclub ah khuttawi Grenade puaktam pen IS te gamtatna hi ci’n kipsakna pulakkhia uhhi.

Inspector-general of police Khalid Abu Bakar in agenkhiatna ah “hoihtak in aki kancian ciangin hih Movida Cafe’ ah apuakkham thupiang pen IS te tawh kizopna om cih ki mukhia hi” ci’n Reporter te kiangah zanni in genkhia hi.

Tuaban ah Malaysia gamsung ah a ngongtatsawm mi 15 aki matkhiatlam zong palik ulianpa in genkhia a, tua akiman mi 15 te lakpan in nihte pen Puchong Bomb puakkham ah agamtang te ahi uhhi cihi.

Syria gamsung ah atungkhin Malaysia gammi IS makai khattawh kizom in tua mi nihte in sawlna angahkhit uhciang in hihbang in agamtang uh hihtuak hi. Malaysia gamsung aom kumpi nasem, palik ulian te leh thukhen te in IS te nasepna kankhia in khakcip, dalcipden uh ahih manin, tuate ngimna tawh ulian te omna munte ah ngongtatna bawlding akipan uh cihzong kiza hi.

Tuaban ah Islam biakna ahilo te ki kaihkhopna munte, Shopping Mall, Entertainment munte pen IS migilo te’n mitsuan in nei uh cihzong kiza hi.

June 28 leh July 01 kikalsung bekbek in IS migilo mi 15 bang abengkhia uh hi a, tuate pen Kedah, Selangor, Kuala Lumpur, Malacca, Penang cih State tuamtuam panin amatkhiat uh ahihi.

Malaysia gamsung aom Zomi te hawhna ciahna ah kidop theihzah in kidawm ni. Gammi te biakna pawipi zong tukalsung nasiatak in bawlkawikawiding uh ahih manin tuate lakah ihki helkhak luatlohding zong thupi khading hi. ZD Sawltak #zomidaily