Malaysia, Perak State ah mawtawpi khatin adang mawtawneu khat phukha in mi 6 sipah

Malaysia, Perak State ah mawtawpi khatin adang mawtawneu khat phukha in mi 6 sipah

Malaysia, Perak State, Tanjung Malim khua geinai aom North South Expressway lamzikpi tungah tuni Sunday ni in Trailer mawtawpi khatin MPV mawtaw khat nawkkha in aphual ah mi 6 in sihlawhpah cih theStar pan kiza hi.

Trailer mawtawpi pen asungah leitang adimtak in apua phitphet hi a, apeital in Direction akibang in atai MPV (Multi-purpose Vehicle) khat nawkkha citciat ahih manin, tua MPV mawtaw sungah atuangteng in asihlawh citciat uh ahihi.

Police te genkhiatna ah hih tuahsiatna Accident apianhun pen zingsang 7:40am hunpawl ci uh a, MPV sungah atuangpen mi 6 hi in, avek un aphual mahah sipah uh cihi. Trailer mawtawpi ahawlpen in a mawtaw lenkip zolo, Control zolo ahih manin, tuahsiatna apianghiding kici a, MPV mawtaw in athuaklawh dikdek dihdih ahihi.

MPV mawtaw sungah atuangte pen Lam Leong Choy (kum 76), Low Wai Loon (kum 46), Lam Jie Yang (kum 19), Wong Check Lee (kum 53), Lam Jie Hong (kum 13), Lam Wai Keat (kum 38) cihteng ahi uhhi. Hih mi 6 tengpen bangci bangin kinaina, ki meltheihna omhiam cihpen ki theician nailo hi ci’n Hulu Selangor police chief Supt R. Supramaniam in genkhia hi.

Trailer mawtaw hawlpa, ataihkhapa ahihleh bangmah liamna ngahlo hi. Palik te’n amatkhit uhciang in Hulu Selangor Police Station ah kikem a, guihtheih khamtheih zangdingin ki ummawh ahih manin, azun leh asisan Test kibawlding cihi.

MPV mawtaw pen limsiatlua mahmah in, zangawpphial a, asungah atuang asi mi 6 te ii aluanghawm zong alakkhiat hamsa mahmah cihi. Kuala Kubu Bharu Fire station panin Firefighters mi 6 ki paisak in, aluang phamsak uhhi.

More: Malaysian Chemical Engineer numei khat mawtaw Accident in si

Asi mi 6 te ii aluanghawm tengpen Kuala Kubu Bharu Hospital ah kipuak cih kiza hi. ZD Sawltak #zomidaily