Malaysia, Penang Bridge tungah Taxi khat meikang in mi 2 si

Malaysia, Penang Bridge tungah Taxi khat meikang in mi 2 si

Malaysia gamsung, Penang khuasung aom “Penang Second Bridge” akici lei tungah Taxi khat meikang in mi 2 si cih theStar pan kiza hi. Taxi sungah mi 2 bek atuang hi a, khatpen Taxi Driver, adang khatpen Passenger hiding in ki ummawh hi. Mei limkat mahmah ahih manin anih in amel asa zong hoihtak ki theicianzo nawnlo cihi.

Palik thunei te genna ah tua meikang Taxi pen Proton Persona mawtaw te hi a, Saturday (Feb 25) ni zingsanglam 8:10am hunpawl in thupiang cihi. Bridge Patrol Unit te’n Penang Second Bridge ii KM27 munpawl ah Taxi khat akhawl galmuh uh a, Taxi sungpan in meikhu leh meikuang ki galmuhpah cihi.

Leicing in aom Patrol Unit te’n agalmuh ciangin delhphei uh a, ahotkhiat sawm uhhang in honkhiazolo uhhi.

Mawtaw Engine panin apuakkham, agin ngaihmahmah zong kiza ci a, meikuangpen thakhatthu in kizelgawp ahih manin asuang ah aom mi 2 tetawh kanglum hi.

Patrol Unit te’n ami lah honkhia zolo, ameilah phelhmanlo uh a, tuaciang in Police te zasak uhhi. Penang Police te’nzong CCTV panin Video Footage te kaikhawm uh a, athu piangzia kancianna nei uhhi.

Hih Taxi aneipen A. Gopal Krisnan kicikhat hi a, ahawlpen atapa cihi. Atapa pen kum 28 aphakhin G. Saravanan kici minnei khat hi a, Simpang Ampat ah sangsia asem ahihi. Aman kalkal in Taxi hawlzel a, abeisa kum 2 sungbang nadang sepding aomlo ciangin ahawlzel cihi.

Taxi sungah asi khatpa pen kuacih ki theician nailo hi.

Penang Second Bridge pen “Sultan Abdul Halim Muadzam Shah Bridge” zong kici a, asauna 24 km (15 mi) bang pha hi. Malaysia gamsung ah lei asaupen “Longest Bridge” hipah hi. Tuabek thamlo, Southeast Asia ahzong lei asaupen “Longest Bridge” mah ahihi.

Kamsung a lei saupen hilo maw 🙂 ZD Sawltak #zomidaily

Behlapna: Khatveivei pawlkhat in Zolai tawh ihgen thukhat telpakpak zolo uh ahih manin, Manglai tawh helhzelleng buaina tawmzawdeuh dingin lamen hang. Gentehna: Zokam in “lei” cih malkhat bekbekzong akhiatna tampi omthei hi.

• Lei = Bridge,
• Lei = Tongue,
• Lei = Earth,
• Lei = Soil,
• Lei = Buy

Nungdiak inzong Mexico leh USA “gamgi aom lei (Bridge) tungpan lengkhia” cihpen Facebook ah Gabriel Tuang Pu in hihdan in Comment citciat hi. Link >>>

“Inn khum zang pan aa leng khia hi leh pha dawm ..tui sung ah a tuak hi leh pha dawm..lei tung pan leng khia ..cih bang tel siam ham sa si e…keen.(kham!) ah a leng khia lah hi lo..lei tung pan koi ah ki leng khia thei a hia..”

Tuahang mahin hih News ii thulu zong “Malaysia, Penang Bridge tungah Taxi khat meikang in mi 2 si” ci’n Penang Bridge tungah cih akizang hitamai ei 🙂