Thantlang a CNF te bawlding Chin National Dialogue vai mimal muhdan ~ Cin Lian Khai

Amasa in Union Peace Conference-21st Century hong piang khiat ma, USDP Kumpi leh Ethnic Arm Organizations ten Nationwide Ceasefire Agreement bawl zawh nang tam veipi NCCT ah kikupna nei uh hi. 2015 Oct 15 ni-in Nay Pay Taw MICC II ah USDP Kumpi in NCA pen EAOs pan group8 tawh hongbawl uh a, tua in Mualmi Thauthawite kilemna sat khamh hi. NCA suaikai lakah CNF zong hong kihel dihmawk hi. Amau apattah KIA te tawh ding khawmlo in Political Advantage hong lasuak uh hi. Thudang khat in genleng ‘Ui-in an apia, api khut petsak’ cih tawh kibang hi.

Tua NCA ah, Political Road Map om hi. National Accord, Union Accord, leh Hluttaw ah kipsak ding cih thu zong kihel hi. Tua NCA Promotena in CNF khutzat Chin Human Rights Organizationten Peace Process paulap in Listening Project muntawh kizui in bawl kawikawi uh a, CNF in NCA banghang signed uh hiam cih promote kawm uh hi.Tua hun lai pen banghang CNF in NCA signed uh hiam cih mawksakna lianpi a om lai tak hi.

NLD Kumpi in tutna hong lak uh ciang, 2010 kum a, ZNC Birhtday paulap a Kawlpi ah kibawl, Kalay Declaration pen ASSK ki-ap a, tua thu ASSK in hong zom nuam ahihman in 2016 in Union Peace Conference-21st Century Panlong kibawl zawh nang Union Peace Dialogue Joint Committee hong bawl khia hi. Panlong nihna vaipen ZCD te patkhiat ahih zia, ASSK in 2013 Melborne, Australia apai in zong Interview adawnna ah gen khia hi.

22-23 July 2016 ZCD in Orchid Hotel ah Chin Statewide Consultant for 21st Century Panlong Conference abawl un NLD makai leh SNLD makaiten zong ZCD te patkik hi cih gen uh hi.Tuamah bang in Union Peace Conference -21st Century Panlong Nay Pay Taw MICC II ah akibawl in Pu Chin Sian Thang in inntek lampan lungdam kohna thu gen hi. Hih Conference zong ASSK in adeih kaih theih nailo cihthu, athugenna ah kuan peace deih a, deihlo cih mipiten natel nang un MRTV ah hih khawmpi Live in hong kikhah khia hi ci-in gen hi.

Peace ih deih mahmah ahitazong in, den a ih gen mahbang in EAOs kitam khamh hi. Tuaban ah 2008 Constitution pen Constitutionally Federalism tawh kituak lo hi. National Defence and Security Council ah Galkapte 6 om in, NLD te 5 om hi. Tua Council ah President pa in vote pia theilo cih thu ahihman in, Ceasefire taktak vai pen Galkapte thuthu hong hita hi. Ceasefire akibawl hang, Galkapte in Civil War tawpsak kei leh peace om ngeilo ding hi. Ceasefire bawllo in Galkapten Civil War bawl kei leh peace aom toto hi.

Ahihhang tua Union Peace Conference-21st Century Panlong ih cihcih in 2015 NCA based ahihman in peace process zekai lai mahmah ding hi. Amin mahmah zong 21st Century Panlong Conference cih ziau ding hia, tua cizo nailo ahihman un peace tawh ki gamla lai cihna hi. Galkapten tam letlai mahmah cihna hi.

Tua Peace deihlo Galkapte khutzat CNF te-in tu-in Thantlang ah Chin National Dialogue 27-28 Feb, – 1 March dong hong bawl ding uh hi. Akuaveina UPDJC meeting ah CNF te bawl ding aphalloh sa uh hi. UPDJC sungah CNF tangmi Lian Hmung Sakhong hong hanggawp ciang, ASSK in nuihsan ziau ci hi.

Ahihhang UPC-21st Century Panlong pen NCA based in Galkapte thuneihna tamzaw ahihman in Galkapte khutzat CNF in National Dialogue bawlkhuan hong ngah uh hi. Chin State khempeuh represent lo cih bel Tamadah zum leh Galkapten atheihluat uh ahihman in CNF thahatna Thantlang bek ah bawl sak uh hi. CNF ii Chin State represent lohdan gen leng, Tedim nangawn ah mipi in zum hon ding deihlo in Lungphona nei uh hi. Ahizong Galkapten phal ahihman in ong hong teitei uh hi. Tua khit zawh nihvei azum uh ah bomb kipuak sak hi. Falam khong ah zong ahon sak vetlo uh hi.

UNFC te nangawn maikha ni1 ah ASSK tawh UPC-21st Century vai kimu ding uh hi. Union lam ah hihbang buaina aom laitak, ei deih bang hong hi pukpuk lo ding hi. Ahihhang CNF in hih abawl man un financial Advantage leh Political Advantage hong nei veve ding uh hi.ZCD tawh kibang lo in NGOs, INGOs hon khat tawh kizom un, summet bawlbawl thei uh hi. Tua ciang, Chin Movement lam ah thakhauhna hong nei zaw ding uh hi. CNF nuai a, nasem CSOs ten region tuamtuam pan pai ding a, ko hiteng huam ungh na cizel ding uh hi. Tedim, Tonzang pan zong pai kha ding hi.

Minam zui-in akibawl ahihman in Zomi minsel kipawlna limlim apailoh ding thupi hi.2014 Myanmar Census a, 914 Movement ahoih lam thei un, hong khaktan theih nang lampi azongzong uh hi. Chin apom deuh mahmah Salai Lian Luai bang in Kumpipa hong pai-in 914Zomi vai akidot leh athu kawng hei ziau cih muh ding hi. Chin thulu nuai ah hong khumkhum ding vua, Kumpi lam va report den ding uh hi. Chin National Dialogue ah Sabak, Saseh kihawm ding hipeuhmah lo hi. Ih deihteng ih sungh hang in huih lak tup bang ding hi. National Accord pan Union Accord hipan ban ah Hluttaw cian lai hi.

Tua ahihman in Thanthlang a, Chin National Dialogue in bangmah metna hong pialo ban ah gambup level ah peace puak zolo ding uh hi. Ceasefire a signed a kipan un, business politics akicih sak hi. Mun tuamtuam aha met nang un Advocacy abawl uh hi.
Lungdam
Cin Lian Khai