Dinmun Itheih Kul Hi ~ Bob Tuangpi
Zomi te atamzaw in Pasian um Tapidaw thuzui vive kihi aa, pawlpi kibanglo upna/sandan tuamtuam kineitek hi. Pawlpi ciat in amau’ upna leh thupom (Doctrine) neitek uhhi. Tua mah bangin gamvai zong 2011 khit lam teh gamsung hong kikkhel hong kihong zawdeuhta ahih manin gamvai party tuamtuam phuattheihna hun hong om hi.
Tua bang teng tawh hun hong kikhel tak teh gamsung ah gamvai party tuamtuam hong tam mahmah pah ban ah party tuamtuam tek in dinmun leh thuguilet kibanglo (party policy) hong tangko tek uhhi. Gamvai nasepna ah minam leh gam ading phattuamna asepsawm vive kihitek aa tua tup leh ngimna/deihna ( political will) mualsuah nading kimasuantek hi.
Biakna pawlpi upna nei khempeuh zong avek vua Vantung gam tunsawm vive leh Laisiangtho siksan vive hinapi’n Laisiangtho apomzia uh leh leitungah nopsak lawhcin daupai nading leh sih khit tak teh Vantunggam zuatzia ding lampi asandan uh atawm atam kibanglo hi.
Athupi ah Zomi atamzawte in biakna pawlpi khat peuh ah a om uh ahizong, gamvai party khat ah i om tak teh amasa-in hih biakna pawl in bang upna leh sandan/thukhun nei-in bang ngimna nei hiam cih akan leh athei kitawm mahmah mawk hi. Biakna pawlpi makaikhat pawlzotna tawh ahizong tanaute/hamphat nading lametna khat tawh pawlpi kibang ding cih apualam hang khat peuh tam zaw gige aa, tua pawlpi upna alenkip leh tua pawlpi thukhunte tungah upna leh muanna hang hilo zaw thei hi.
Tua mah bangin gamvai party nasepna zong biakna pawlpi paizia bangin kimu lel hi. Party thukhun leh thupom/tupna leh ngimnate tungah upna leh sanna nei-in party khat peuh kipom hilozaw-in lametna/meetna (မက္လုံး) tawh atamzaw adiangdiang kitamzaw hi.
Gentehna in biakna lam pawlpi makaite leh tua pawlpi asuak pawlpi mite bang tua pawlpi upna thuguilet leh thupomziate tungah upna sangin tungsiah lam pan huhna/sum tawh kizopna ngah ding cih lametna khat peuh tawh pawlmi suak cih bang imuh leh theihna tungtawn tampi om hi. Tua mah bangin gamvai party nasepna ah zongh a party ii thumeilet/thupomte’tungah upna hang hilozaw-in tua party siksanin mimal hamphatna ngah theih nang cih lametna tawh akalsuan Zomi tamzaw kimu thei hi.
Kuakua party hita leh tulaitak ei Tedim leh Tonzang huam ah hong phualsat party tam mahmah hi. ZCD,NLD, USDP, Chin Party te, NUP cih bang omtek hi. Ahizongin a party makaite akipan party member atamzawte in a party thuguiletpite hoihsa leh upna hang hilozaw-in lametna khat peuh leh kiim-le-paam khat hang peuh tawh pawllut na tamzaw hi. Gentehna in ah Tedim leh Tonzang huam aa NLD leh USDP makaite atamzaw in NLD leh USDP policy adeih leh hoih asak man uh na hikhollo/um beeklo lai ding uh aa mimal khat kilaptoh nang siksan/platform dingin azanghnuam lel tamzaw pelmawh ding uhhi.
Tua ahih manin, Zomi te atamzaw in, kei bang hang hiah om ka hiam? Koi teng tun nading bang um ka hiam? Koilam manawh nuam ka hi hiam? ( လာရာႏွင့္လားရာ) itheihloh ziakin minam sung hi zelzul niloh hi.
Zomi atamzaw in biakna vai hita leh gamvai ah hita leh Pawite tawh kiteh thapai-in demsawm thapai mawk uhhi. I Pasian nasepna leh gamvai nasepna pen Pawite ciang demna ding ahimah hiam? Tulaitak enleeng adiak gamvai ah eilam sang’n Pawi lamte ana madawkna uh om simtham hi. Tu a dinmun atun nadingun eite ikitotot laitak, i ihmumut laitak amaute in bang ciang agam vua ding khaicii na tuh uh cihte kikan kiphawklo sese hi. Khaicii atuhte in a at tak teh ihazat niloh mawk lungkham huai hi. Hun piakkul khaicii tuhkul hi.
Biakna leh gamvai nasepna ahizong, tualsung mipi ading nasepna leh Media nasepnate ah Pawite demna ding ciang lungtang/hazaatman tawh panmunla ihih leh lungkham huai hi.
Pawite tawh kitawiteh-in amau’ ngah khempeuh ngah sawm, ingah loh teh haza eisung teng kitoknawi ciang gamvai leh biakna vai sem ihih leh khasiathuai hihang.
Tua hi-a, ei bang hang hiah om-in koilam manawh sawm ihhiam? Bang lenkip ding ihhiam? ci-in idinmun tatak iteel sitset tak teh igamsung leh minam sung kimasuanzia hong kinavaak zawdeuh ding hi.
Leitungah bangmah amawkna in kingahlo hi. Na khempeuh leh thu-le-la kici khempeuh in amau’ hun leh muntek nei uhhi. Khaicii tuhlopi’n mite in khaicii gah a at teh pumhazat/duhgawh theih omlo hi.
“Hun pia-in citaktak hanciam akul mah bangin pilvang/bilvaak akul ahihi . Siim sing apaak hun om aa, maal sing apaak hun om hi”. Bob Tuangpi
Comment piaknop aomleh...