Malaysia kumpi: Refugee gambeel te amanlang in gamthumna puakmengmeng un

Malaysia kumpi: Refugee gambeel te amanlang in gamthumna puakmengmeng un

Malaysia kumpi thunei te’n International Community tuamtuam te kiangah Refugee gambeel in aom te aomna gampan in gamthumna ah amanlangin Resettlement akipuaktheih mengmeng nading in vaihawmpih un ci’n genkhia hi.

Malaysia Deputy Prime Minister Datuk Seri Dr Ahmad Zahid Hamidi in hih Refugee vaitawh kisaipen USA, New York ah akibawl ahi a (71) veina “United Nations General Assembly” ah zanni in agenkhiat ahihi.

Ama genkhiatna ah tuabang in gamthumna ah napuak mengmengkei uhleh Refugee gambeelte aomna gamsung ah sumlehpaai zonna Economic vai, Social vai, Political gamvai tuamtuam leh gambitna Security vaite ah nawngkaina omsaktheiding uhhi ci’n genkhia hi.

Hihvai tawh kisai in UNHCR (United Nations High Commissioner for Refugees), IOM (International Organisation for Migration) leh 1951 Refugee Convention ah akihel State Parties khempeuh tungah agenkhiatna hi a, tua kipawlna te in limtak in thupi ngaihsut in aseppahding uh lunggulhna taktawh agenkhiat ahihi.

Ataktak in cileng Malaysia kumpi in amau gamsung ah atungkhinsa Kawlgam Refugee tepen hongdeih masa hetlo a, UNHCR leh IOM te’n gamthumna apuak mengmengding uh a ngaklah mahmah uh ahihi. Zomi te lunggulh leh lamet zong tuamah hipahlel hi.

Ahi zongin Malaysia kumpi in Refugee adeihlo himasalo a, nungkum inzong PM Najib in Syria gampanin Refugee mi 3000 lakding kamciam pia ngeikhin hi. Rights Group pawlkhat in Malaysia gamsung ah aomsa Refugee tezong hoihtak ennuamlo in, banghangin Syria panin Refugee mi 3000 lakbehsawm ahiam cih dotna limneih mahmah uhhi.

Tua akamciamsa uhtawh kizui in tukum May khaciangciang Syria gampan in Refugee mi 79 te Malaysia gamsung ah lutsakkhin uhhi. Tuaban ah tukum beima in adang Syrian Refugee mi 421 hongtunbehding cihzong kiza hi.

Tuahi a, Malaysia gamin amau gamsung ah Refugee te adeihlo himasalo a, ahi zongin amaugam tawh akibatpih biakna tebek adeih uh cih hong kilangkhia dekdekta hi. (agamsung ah aomsuakding in adeihloh uh Zomi te gamthumna apuak mengmeng hangin, Zomi tezong kiheh gawplolel ding, hoihzawlai 🙂

Tuaban ah Malaysia gamsung ah Rohingya mi 60,000 bang omding in kigen a, tuate Malaysia gamsung ah aomsuaktheih nading un vaihawmsak sawm cihthu zong Bernama News in genkhia a, International Conference khat asawtlo in sapsawm uh cihzong kiza hi.

Tuabang in International Conference abawlzawh uhleh Kawlgam pan makai te leh adang ASEAN gampan makai te, UNHCR, IOM leh adang Refugee tawh akisai Organisations tuamtuam tezong sapsawm uh cih kiza hi.

US President Barack Obama zong Syria gamsung aom Refugee te a ngaihsut ciangin alung nopmawh mahmah cih kiza a, mundang aomte adingin bel lunghimawhtuak luakhollo hi. Tuahangmah in mai Fiscal Year sungin Refugee mi 110,000 lakding ageel hi a, Syria gampan in atampen lakhading uhhi. ZD Sawltak #zomidaily