Numeite a siasak thu nam (9) ~ Job Cinpi
Hih thu pen keima ngaihsut le phuahtawm thu hi lo a, tangtawng pek a kipan Kawlte in a ciapteh suksuk thu khat ahi hi. Numei khat a lungsim le a gamtat a kampau bang zahtakin a hoih zongin hih a nuai a kigelh thute bangin om khain gamta kha zenzen leh a sawtna ah tua numei kisia ding hi ci uh hi.
Numeite pen a zawn luat uh manin kisia cih tam lo uh hi ci uh a, bek tham loin zawng lua uh ahih manin lungsim hoih ding le a pumpi hoihna le etlwamna uh limtakin a kepcing ding uh thupisak zaw sem thei lai hi ci uh hi. Lungsim picinna le a mel a duang etlawmna uh a neih lianpen bangin kemcing zaw thei uh hi.
Numeite’ siat theihna nam kuate….
1. Pasalte tawh kithuah nuam a sa numei
Nasep tawh a kisai thute hangin kithuah, vai kuan vai ciahna ah ton khawm, sep khop bawl khop nading munte ah kithuah cihte le pelh theih loh thute thu tuam hi a, ahi zongin numei pawlkhatte pen amah ngiat in pasalte tawh kithuah nopsa ahih manin pasalte omna zuan tawm, va neih tawm thei uh hi. Tua pen numei khat a siasak thei thubulpi khat hi pah hi.
2. Kha tampi a pasal tawh a kikhen numei
Pasal pawlkhatte pen zi le tate ading sumlepaai zong uh hi mah leh a khualzinna uah zi nei lo innkuanpih zi le ta nei lo bangin a om pasal pawlkhat om thei uh hi. Ahang gen ding kician mel om loin a ut a nuam tan uh khual gamla ah taam cip thei uh hi. A khualzinna mun ah zong a ut a nuamin om thei uh hi. Tua mah bangin numei pawlkhatte zong a pasal tawh a kithuah loh zawh a sawt ciangin lungleng thei uh a, lungzuan a nem ding peuh lunggulh kha thei uh hi.
3. Silhleten kitangsap luatna
Numei cih pen pasalte sangin silhleten a neih zawk ding uh ngeina khat bangin kiciamteh hi. Pasalte sangin numeite mah kizemkipuah nuam zaw uh a, siantohna lam zong numeite mah in hahkat zaw den uh hi. Tua hangin a kisap uh nate a lei zawh nadingun sumlepaai kisam ahih manin tua sumlepaai nung a zuih khak uh tak ciangin siatna thang sungah a awk numei tampi om uh hi.
4. Lupna tungah a pasal numei
Lupna tungah a pasal numei cih ciangin lupna tungah a pasal thahat lo cih nopna hi. Pongman numei khat adingin lupna tungah a thahat lua pasal zong a kisam masa hi tuan lo hi. Ahi zongin pongman numei khat adingin pongman pasal khat sangin lupna tungah a thahat lo zaw pasal khat pen lungkiat huai mahmah thei hi. Zahmawh thu ah pasal khat le khat zong a thaneihzah uh a kibat loh mah bangin numeite zong a thalawpzia uh kibang kim lo hi. Hih nupa kaal zahmawh kizopna thu a kicing zaw deuh dingin tawm khat kong behlap nuam hi.
A nupa un thalawp kei tuak peuh uh leh a phatmawhna om lo a, a thalawp khat le a thalawp lo khat a kituak khak uh tak ciangin buaina piang thei hi. Hih zahmawh thu pen a diakin nupa kaal sung nangawn ah zum huai dai huai ci-in kingaihsun bek tham loin a zaw deuhin numeite ading bangin hih zahmawh thu pen gen khiat dingin zong a kilawm lo thu bangin mipibup in kingaihsun ahih manin nupa takpi a lunggulhzia uh a kigen ngam lo nupa tampi om ahih lam nupa zahmawh thukan siahuante in gen uh hi.
Numei in ama lunggulhna le a nopsakna a pasal tungah gen nuam hi mah leh zahmawh thu pen kisiat muh phot ahih manin, [Hong theisiam unla a kitelcian ding deih ka hih manin kammal kilawm lo khat kong zang ding hi.] numei in ama lunggulhna le nuam a sak zia gen nuam hi mah leh a pasal muhna ah numei huk khat bangin a pasal in a muh khak ding le a ngaihsut khak ding launa tawh zan hun nuam zang kha ngei loin a om numei tampi om ci uh hi.
Pasal pawlkhatte amah le amah a zi lungkimsak zo lo cih kithei ahih manin siahuan siamte tawh kilak thei uh hi. Pawlkhatte ahih uh leh amau nupa ngiat mah kithumna tawh bangci cih leng hoih pen ding ci-in kikum khawm thei uh hi.
5. Pawi le gualnop ding lunggulh luatna
Numei pawlkhatte pen biakna pawite nangawn biakna a uk man uh hi peuhmah loin gualnop ding uk luatna tawh biakna pawi a siim om thei uh hi. Pasal pawlkhatte zu le sa tawh gualnop ding ut manin pawi kibawlna peuh a pai nuam, ama bawlpi tawh kisai kisai lo cih om lo, ama minam tawh kisai kisai lo cih om lo, amah kisam maw kisam lo maw cih ngaihsun loin pawi omna peuh a ut pawlkhat om thei uh hi. Numei pawlkhatte zong tuaci thei uh hi. Nu le pate kihel lohna pawite ah thalawp zaw thei lai uh hi.
Numei pawlkhatte pasal a neih zawh nangawn ciangin zong a nungak lai mah bangin lawm le gual tawh nopsak ding a lunggulhna a khiam zo nai peuhmah lo pawlkhat om uh hi. Biakna a hahkat lua hi lo napi biakna pawi a om nak leh pai loh theih loh bangin ngaihsun thei uh hi. Tua bek tham loin pawlpi khangnote peuh tawh kithuak suk kithuah toin om thei uh hi.
6. A thadah numei
Thadah cih pen numei pasal a klilawm zaw kuamah om lo hi. Ahi zongin pasal thadah sangin numei thadah pen etlawm lo zaw bek tham loin hoih lohna zong tam zaw lai hi. Numei thadahte pen numei dangte sangin a kam uh zong tam zaw thei lai uh a, bek tham loin thadah mahmah uh hi napi midangte sepsak mawkmawk deih loin a hoih theithei lunggulh thei lai uh ahih manin lungdam koh ding baih ngaihsut lo thei lai uh hi.
Thadah uh ahih manin a baih lampi zong den uh ahih manin tua a baih lampi a tawn numei pawlkhatte siatna sung a tung bek hi nawn loin a nuntakna nangawn a suplawh a taanlawh om thei uh hi.
7. Mi kikaihkhopna mun pai nop luatna
Mi kikaihkhopna mun pai nuam cih ciangin inn ah om nuam ngei pha lo cihna zong hi pah hi. Tua bek tham loin tua banga mipi kikaihkhopna mun a tam pai numeite pen zum thei pha nawn lo uh hi. Mi tampi tawh kithuah, kikhawl, kimu uh ahih manin zum nading thute ah zum pak thei nawn lo uh hi. A zawdeuhin a khangto gamte ah mi khat le khat kimuakna-in kipom kinam cihte zang uh ahih manin kitheihpih mikim tawh tua bangin kipom kinap kul se lo hi ci-in a ngaihsun pawlkhat zong om uh hi.
8. A pasal tawh loin midang inn ah sawt a om numei
A pasal tawh loin mundang ah sawt om cih ciangin a pasal tawh kitawng kihau ahi a, thudang khatpeuh hangin a pasal tawh kikhen a, a nung lam zuan, ahih kei leh a lawmte inn khatpeuh ah sawt a om numei pen numei dangte sangin a siat ding baih zaw hi ci uh hi.
Pasal pawlkhatte in khual sawt a zin ding uh ciangin a tun kik dong a sunghte/ a zi nu le pate inn ah tawl khat sing a zi omsak kik thei uh hi. Tua zong lungmuan a om hi tuan lo hi. Tua bang ka cih ciangin numeite pen pasalte om kei uh leh muanhuai lo hi a ci nuam ka hi kei hi. Pasian kammal Laisiangtho sungah zong Pasian in nupa cih pen zan sawt kikhen ding pha lo ahihna kimu thei hi.
9. A mawk vakvak thei numei
Hih thu tawh kisai tam gen kul dingin ka um nawn kei hi. Numei pawlkhatte pen tangval lengkhawl bangin vakvak thei uh hi. Pawlkhatte a lawm numeite tawh vak cih ciang bek zong hi nawn loin a lawm pasalte tawh kithuahin mawk vakvak thei uh hi. Numeite pai nadinga kilawm le kilawm lo cih zong ngaihsutin nei nawn lo uh hi. TuhTayThi BoneMyintTwe Laibu sung pan kong let khiat kik ahi hi. Job Cinpi (Zomi Laisim nuamte)
Comment piaknop aomleh...