Zolai zuuna ~ AS ThangBawk

Zolai zuuna ~ AS ThangBawk

Thupatna – Zomi i hihleh Zolai i neihloh a phamawh a hihi. Lai kiciantak in a nei lo Zomi te in Pasian hehpihna hangin 1910 kumpan Cope Topa in Zolai hong bawlsak ahihmanin tuni Zolai a zangthei i hita hi.

Tua Pasian hong piak i Zolai a khantoh nading, kumsawtpi a nuntak nadingin Zota te in i kep, i puah mahmah ding kisam hi. Zolai kepcingna ding, puahzia ding leh zuunzia ding mipil misiam tampi in i gelhkhin zo hi. Tuate mahbangin kei mimal muhna neukha hong gelh nuam ing.

1. Manglai pan i lak kammal te a zatdan

Zolai i gelhciangin i deih kammal khempeuh kicingzotaktaklo a hihmanin Manglai pan i lakkik hun om thei hi. Tuabang laimal te pawlkhat te in a Manglai mah in gelhsuak a, pawlkhat in Manglai pen Zo awkaih tawh gelh hi. Gtn: Manglai- Missionary pen Zolai in Misonari, America pen Amerika, Christian pen Khristian cihdan in a gelh pawlkhat ki om hi.

Kei mimal muhna ah Manglai pan i lakkammal te Zo awkaih tawh gelh nawnlo in Manglai mah in gelhsuak leng a hoihding hi ci in ka ngaihsun hi. Manglai mahtawh gelhsuak lel leng, a Manglai zong a kithei hipah a, tua in i Zolai hong susia zolo ding hi.

Minam tampi in Manglai leh Mangpau thupi tak mah in a zat a hihmanin zatloh a phamawh Manglai te Manglai mah in gelh ding hoih ka sa hi. Zo awkaih tawh a at te in, ‘ih Zolai a kip nadingin Manglai te zong Zo awkaih tawh gelh ding hi’ ci uh hi. Himun ah nang muhdan zong pawlkhat ompah dingin ka um hi.

Computer tawh Zolai i gelhciangin Kawllai keyboard zong nawngkai pian a hihmanin Zolai tawh i gennop a kitelzawhloh ciangin Kawllai sangin Manglai mah zatsawm ding zong hoih kasa zaw hi. Ahizongin Kawl gam sungah om i hihmanin a nih in etsiam zatsiam ding kisam hi.

2. Lai malgawm dan

Zolai i gelhciangin laimal ki gawm ding leh laimal ki hal ding teltak in zatsiam theih ding thupi hi. Kei mahmah in zong laibu ka gelhciangin hamsa ka sakpen khat a hihi. Kammal malkhat a hihleh laimal te gawm in at ding hi a, tualo te a ki hal in at theih a hihi. Gtn: gamtatna, kampauna, sanginn, khitui, cihte khempeuh gawm ding ahihi.

Mipawlkhat te’n ‘gam tat na, a citawh, gamtat na’ a ci tawh, kam pauna, a citawh kampau na’ a ci tawh i laigelh dan ki tukalh mahmah hi. Hibangte khempeuh lai a gelh mimal kim in ngaihsun tak a i gelhsiam ding thupi hi.

3. Laimal zatkhopna

Hih laimal zatkhopna tawh kisai pen Zolai sungah tampi gen ding om nawnlo hi. Zomi te ki pumkhat in, i lai puahkhawm, zuunkhawm i hihmanin laimal te ei khua leh ei beh awkaih tawh gelh nawnlo in Cope Topa hong bawlsak Tedim lai vive tawh gelh i hihmanin hihpen a lungdam huai mahmah thukhat a hihi. Tedim lai cihpen Zomi sungah omlo hi.

Sihzang, Teizang, Saizang, Khuano, Zo, Dim cihdan te khempeuh a kigawmna pen Zolai (Tedim lai) hong suak a hihi. Ka neulai in Zolai sumbu sungah T- Tedim pau ei mau pau’ ci in ki gelh hi. Hibangin ei ma awkaih tawh lai gelhlo, mi hon mai ah thugen nawnlo i hihmanin i Zolai hong khangto mahmah ding hita hi.

Eima khua leh eima beh awkaih zanglo in Tedim pau, Tedim lai tawh i gelhna pen i khua, i beh leh i minam i itna a hihi. Lai a gelh lai ding khempeuh te in zong i Zolai citak mah in gelhsawm tek ding hihang.

Hibang sephuai gelh ding hileng tampi om toto ding a hihmanin hih thu 3 tawh zialbawl phot ding hihang. Hih thu 3 i zatsiam theih nading leh i minam lai hong khantohna dingin:

1. Lai tawh kisai makai neih ding kisam

Lai tawh kisai minam huam in makai (ki pawlna) kician i neihding thupi mahmah hi. Tua makai te in laibu ki bawl khempeuh edit sak ding, laimal zatdan, a kigawm a ki kak a vek in etsak ding hi. Minam itna a susia thei ding, lai leh pau a susia thei ding lai khempeuh hepkhiatsak pah ding hi.

Laibu ki bawl khempeuh tua ki pawlna te phalna bek tawh zuak ding thupi ding hi.

Hihpen Zolai a khantoh ma, a picin taktak ma ciangbek kisam ding hi. Tuciangciang laibu a edit sak a tamzaw te in a thubek in a etsak hi a, Zolai kepna zuunna lungsim tawh hilo cihpen mikim in i muhtheih a hihi.

Tuabang minam huam in ki pawlna omlo a hihmanin mimal in a bawl laibu te genloh mikim in a zat Laisiangtho nangawn ki thukhat nawnlo hi. Kammal khat in pai nawnlo hi.

Hih Laisiangtho pen minam khat i hihbuangin a kibang zangthei leng bangzahtak a lungdamhuai zentam? Ki pawlna leh ki pumkhatna a omloh manin i Laisiangtho nangawn kammal kibang nawnlo a hihmanin khasiat huai mahmah kasa hi.

2. Media nasepna te

Lai a khantoh nadingin media te thupi mahmah hi. Media hun a hihna tawh kizui in nisim in mitampi in media te thusuaksak laite ki sim den hi.

Tua a hihmanin Media lam nasem khempeuh te in i minam i itna ngiat mahmah tawh i laigelh khempeuh Zolai zuunna in i ngaihsut pah ding thupi mahmah ding hi. A thu bek a gelh hilo in a lai gelhzia mahmah midangte a hilh bangin i ki ngaihsut leh i lai hong khangto ding hi.

Tuhun ah sapna lai khempeuh kam tawh ki gen nawnlo a, lai vive tawh ki gelhta hi. Mopawi sapna, Meeting sapna, Thuzaksakna khempeuh lai tawh hiaa, a diakdiak in Computer laigelh te nasep a hihi.

Tua ahihmanin computer lai khen te khempeuh in zong i minam leh i Zolai i puahna ngiat in lai te i gelhsak ding kisam hi. Computer lai khen te’n mun khatkhat ah: ‘Mopawisapna’ ci in gelhsak hi. A denciang mikhat a’ding: ‘Mopawi sapna’ cihsak leuleu a, a dangkhat tungah: ‘Mo pawi Sapna’ cihbangin i gelhciangin i Zolai thahat nawnlo hi.

I zolai gelhdan a ki pumkhat theih nading Computer sai te leh Computer laigelh te tungah ki nga mahmah hi. Hibang nasep a semte in Zolai bangci gelh ding cih a theihlohman a hihmanin Zolai siamte (ki pawlna) in i hilh theih ding kisam ding hi.

Thukhupna

Zomi in piangin Zomi mah in a si ding vive i hihmanin Zomi, Zogam, Zopau leh Zolai te aituam ngaihsut in i hihtheihzah in i puah i zuun ding hanciamtek ding hihang. Lawhcinna pen a mi tamna tungah ki nga masalo in ki pumkhatna tungah ki nga zaw cih i theihtek a hihi.

I Zolai thahat in hong khantoh nadingin i laigelh dan khempeuh luankhat in luangin, lawngkhat in i gintheih ciangin Pasian hong piak Zolai in Zomi te hong ki pumkhatsak semsem ding, hamphatna a tamzaw sem hong pia lai ding hi. AS ThangBawk