Malaysia, KK Airport ah Bomb cih kammal azangkha Engineer khat kiman

Malaysia, KK Airport ah Bomb cih kammal azangkha Engineer khat kiman

Malaysia gamsung aom Kota Kinabalu International Airport ah tuzingsang in pasalkhat avanpuakding Checkin abawllaitak in asungah alauhuai aomhiam ci’n nasemte’n adotleh “Bomb” ci’n dawngkik ahih manin, Airport Police te’n manpah uh cih Bernama pan kiza hi.

Tua akimanpa pen Engineer khat hi a, kum 40 aphakhin khat ahihi. Malaysia gamsung Sarawak State sungpan akhangkhia Sarawakian khat hi a, Brunei gam ii PR (Permanent Resident) zong aneikhat ahihi. Kota Kinabalu ah ahawhpak hi in, Royal Brunei Airlines tawh aciah khiakikding vanlengtual ah aom laitak ahihi.

Tuzingsang Wednesday (Feb 22) zingsang 7:45am hunpawl in Kota Kinabalu International Airport ah Luggage Checkin abawl laitakin asungah alauhuai aomhiam cih Checkin Counter te’n adot uhpen Bomb cih kammal genkha citciat hi. Agei aom Malaysia Airlines Berhad pan nasemte’nzong na galzakpahlian uh ahih manin, Airport Police te mansakpah uhhi.

Amahzong khial kisa mahmahin Airport sungah tuabang kammal zat huailo cih kiphawkin thuumkik hi. Ahi zongin apau khiatsa kammal tawh kizui in vanleng tungah kahkhuan kipialo in, avanteng zong ki hemkhia hi.

Police te’n avanteng hoihtak sitcianna nei uh a, ahi zongin asungah bangmah alauhuai, apuakkhamthei van bangmah mulo uhhi.

Avan sungah bangmah akimuhloh hangin Sabah Police Central Lockup ah kipuak veve a, tualai ah thusitna neidingin kikem hi. “Section 506 of the Penal Code for criminal intimidation” cih thukhun tawh thu kibawltheiding cih kiza hi.

Ciamnuih pen ahoihbek khat om cih phawk huai hi. Tualeh adiakdiak in vanlengtung ahi zongin, Airport sung limlim ah Bomb, Explode, Bang cihbang kammal te mawkzat huailo hi. Tua kammalte Phone sung ahi zongin apualam ahi zongin nazatkhakna panin muanmawhmi Suspect khat kisuak thei cih phawk huai hi.

More: Ciamnuih zong ahoihbek ciangkhat

Nungkum inzong Kota Kinabalu mahmah Malaysian Soldier khatin Checkin abawl laitak in kavan sungah Bomb om ahimaw ci’n mawkciakkha ahih manin, zankhat Lockup ah ki kemcippah hi. ZD Sawltak #zomidaily