Malaysia, Kelantan sungah H5N1 Bird Flu ki mukhia

Malaysia, Kelantan sungah H5N1 Bird Flu ki mukhia

Malaysia, Kelantan State sungah H5N1 Bird Flu ki mukhia cih World Organisation for Animal Health (OIE) te’n zanni in genkhia uhhi. Malaysian agriculture Ministry inzong genkhiakhin uh a, hih H5N1 Bird Flu pen akilawhbaih mahmah Nattun natna (Tot-kuae) namkhat ahihi.

Kelantan State sung aom ak kikhawina Chicken Farm panin aki mukhia hi a, tua akimuhkhiatna munah akikhawi ak 26 tezong ki thatlumkhin hi ci’n Ministry in genkhia hi.

H5N1 Bird Flu pen nungdiak inzong Cambodia gamsung ah ki mukhia ci’n Reuters News te’n pulakkhia uhhi. H5N1 ahilo H7N9 Bird Flu zong nungdiak in China ah ki mukhia in, mi 110 takin sihlawh uhhi.

Malaysia, Kelantan State sung aom khuakhat panin hih H5N1 Bird Flu akimuhzawh tuakhua panin koimah ah aki lawhloh nadingin lampite ki khakcip (Road Block) kibawl in khualzinte hoihtak sitcianna nei uhhi.

Tuaban ah nungdiakin ak 15 bang asi in akimuhna Kampung Pulau Tebu panin 1 kilometer Radius huamsungteng ah kuamahin ak puaklohding in thukipia cihi.

Kelantan State sungah Avian Flu Outbreak aom nunungpen 2004 kum hi a, tu’n aki pankik, aki zakhakik ahihi. Tua ahih manin State Agriculture committee chairperson Che Abdullah Mat in hihpen koipan hongki pankhiahiam cih hoihtak kankhiatding genkhia hi.

Ahi zongin hih Bird Flu aki muhkhiatna khua khatbek ahih manin, adang khuasung aom ak leh vatawt Poultry te nekding in bangmah lauhuailo cih genkhia hi.

Tulaitak hih H5N1 Bird Flu natna Virus aneiding in aki ummawh mi 8 pen ki tuamkoih a, kuamah tawh ki sawhkha saklo in Tumpat Hospital ah kikem cihi.

More: USA, Tennessee Tyson Foods ah zuakding ak aki khawina ah Bird flu kimu

Malaysia’s Health Minister inzong H5N1 Bird Flu pen Kelantan State sungah kimu khiamah hi cih tuni Thursday (Mar 09) in genkhiatna nei uhhi. Ak kikhawi te tungpan in aki mukhia hi in, mihing tungah hih natna Virus lutnailo dinghi cihzong genkhia uhhi. ZD Sawltak #zomidaily