Mahatma Gandhi banghang in Christian suaklo hiam?

Mahatma Gandhi banghang in Christian suaklo hiam?

I theihciat sa bangun, Mahatma Gandhi (Mohandas Karamchand Gandhi) pen leitungbup in a zahtak mahmah mihing khat ahi hi. A nasep bek hilo in, a nuntakzia pan sin ding tampi om a, ngaihsutnate leh a thugente tuni dongin tul theilo hi. Mikang kumpite khutsung pan India suahtakna ding a a hanciamna leh a sepdante leitungbup in thupi a sak mahmah khat hi. Tua pen ‘thagum zanglo’ (non-violence) ahi hi. Amah omlo hileh, tuabang suahtakna ding kalsuanna ah thagum bek lo in sisan naisan luangin mi tampi in sihlawh ding hi.

Amah pen Hindu biakna a zui khat ahi hi. A khankhiatna mun tuamtuam pan, a sepna leh mun tuam gam tuam a zinnate pan in Christian biakna pen thupi sa in, ‘Christian ka hi,’ ci a a genkhiat loh man bek a Christian a kicilo hiding in ki-ummawh hi. Bang hang hiam cih leh thu a gen ciangin ‘Mualtung Thuhilhna’ genkha thei zel in zong nuntakpih mahmah hihtuak hi. Lai Siangtho zong a simsuak dikdek khat ahi hi.

Nikhat missionary E Stanley in hici in thudotna nei hi. ‘Mr Gandhi aw, thu na gen ciangin Christ kammal pawlkhat na hel den cih ka thei hi. Ahi zongin Jesu nungzui suah ding pen na nial tentan mawk in kong thei hi.’ Gandhi in hici in dawng hi. ‘Oh, Christ pen nial peuhmah lo hi ing. Christ pen it mahmah ing. No Christian tamzawte’ nuntakna pen Christ’ nuntakzia tawh kibanglo lua hi. Christiante in Topa Jesu hong thuhilhnate, Lai Siangtho sunga om bang teek in gamta hile uh cin, India mite khempeuh tuni in Christian suak khin ding uh hi,’ cih beh hi.

A khangno’ lai in South Africa ah Ukil (Lawyer) sem in tawlpi khat va om hi. Tua hunlai in Christianity leh Christian te tawh hong kinahvawh kha hi. Lai Siangtho zong sim zel in, Topa Jesu’ thugente zong hoih sa mahmah hi. Christian suah ding hong ngaihsun ngei hi. Tua ahih manin nikhat a omna venga pawlpi khat ah kikhawm dingin va pai ngei hi. Tualai a a tuahkhak/ muhkhiat thute lamdang sa mahmah hi.

Bang hong mukhia hiam I cih leh- ‘Christian biakna sungah minam kideidanna omlo ding ka sak leh na om mawk a, pawlpi mite in ka sungtum ding hong dal uh hi,’ ci hi.

Tua biakinn a a pai leh kong bul ah Mikangte khat in, “Kaffir aw (S Africa a Bantu kampau zangte’ kisapna), koi a pai ding a kingaihsun himawk na hiam?’ ci in simmawh bawl leh engho kawm in na ci mawk hi. Gandhi in dawng in, biakna pia dinga a hong pai ka hi hi,’ ci hi. Tua biakinn a pawlpi upa khat in, ‘Kaffir te’ adingin hihlai ah mun omlo hi. Manlang paikhia in. Na paikhiat kei leh ka nasemte sam in hih kahlei tungpan hong lawnkhia sak ding hi ing,’ cihsan mawk hi.

Tuabang teng tuakkha ahih manin Gandhi in Christian suah ding sawm nawn vetlo hi. Ahi zongin, Chritianity a phuankhiapa Topa Jesu leh Christianity tawh kisai nuntakna hoih leh man a sakte pen limtak zui in lenkip tinten in nuntakpih ngiat hi.

July 28, 1925 ni in Women Missionaries kikhopna ah thugenna nei a, tualai ah hibang in thu gen hi. ‘Kei Christian ka hihloh hangin, Lai Siangtho sangnaupang (humble student) khat ka hihna tawh kituak in, Christian upna, Christian nuntakzia dinga a Topa Jesu in hong hilhnate leh Mualtung Thuhilhnate na lungngaih kikkik dingun zahtakna lianpi tawh na mai uh ah kong luikhia nuam hi. Tuni in leitung mun khempeuh ah, a tul a sim, numei leh pasal, Lai Siangtho thu a za khalo leh Topa Jesu a mukha lote, Christian Lai Siangtho thu thei leh Thukham Sawm a gengente sangin Pasian a kihta zaw a dim in om uh hi cih phawkkhial kei un la mangngilh kei un,’ ci hiathiat hi.

Christian missionary khat kiangah, Gandhi in hibang in ci hi. ‘Gospel tawh kituak a nuntakna pen, a patna a laizang leh a tawpna dong ah manpha in tuamah bangin manpha taka nuntakpih ding ahi hi. Thuhilhna bek a zat ding hilo a tua vak (light) tawh kituak a nuntak ding pen thupi penpen hi. Tua ahih manin note in zong midangte’ adingin nungta in tuate mah zong midangte’ adingin a nungta dingin hanthawn le uh cin, theisiam mahmah ding uh hi.’

‘Christian tampite in John 3:16 sung sim in mite tua thu um dingin na zawn uh hi. Tua tektek ken zong ka sang siam kei a, midangte in telzo lo ding uh hi. Gospel i cih pen gen dingin ei mahmah in zong zui pah leng manpha se in, hiam mahmah hi. Lingpak (Rose) in ka namtui mahmah hi ci in tangko lo hi. A gimnam mite’ dik dingin paikhiasak hi. Tua ama’ gimnam pen ama’ sermon ahi hi. Gospel gimnam pen tua pak gimnam tawh teh theih ding hi peuhmah lo hi.’

‘Topa Jesu hong kum kik hileh Christiante in Christian min suanga kisem na tuamtuamte pen kih in mudah mahmah dingin ka ngaihsun hi.’

‘Hih thute ka gen laitak in Sadhu Sundar Singh nasepna leh upna thu ka phawk mahmah hi. Amah pen India gambup a pawlpi omsate khempeuh sangin etteh huaizaw ka sa hi.’ Sadhu Sundar Singh in, ‘Note in Christianity pen Tumlam gamte’ haipi (Western Cup) tawh nong tulh sawm uh a, Suahlam gamte’ kuangdai tawh hong tulh/pia hile uh cin, ka dawn kim thei ding uh hi,’ ci hi. ‘Amah pen Sikh biakna pan hi a, 1905 kum, kum 15 a phak in, zingsang khat a khan (room) sungah Topa Jesu mahmah va kilang in, a kimaituahna uh pan a Christian hong suak ahi hi.’

Stanley Jones in khatvei Gandhi kiangah hibang in thu dong hi. ‘India gam sungah Christianity pen bang cih leng gambup biakna suakthei ding hiam? Gandhi in hibangin dawng hi. ‘A masa in Christian te leh Missionary te in Christ nuntak bangin nungta photphot ding uh hi. A nihna ah Gospel pen nuntakpih bek loin amau’ hoihsak bangin hoih kaih kawikawilo in, kheng lamdang/ hei lamdang/ gen lamdang kawikawi se lo ding uh hi. A thumna ah itna pen Christianity a thupi pen ahih manin itna bulphuh masa peuhmah phot ding uh hi. A lina ah Christian ahilote’ biakna pen zong sin uh henla, tua sunga a hoih a manphate zong zat sawm ding uh hi. Tua ahih manin Christian te in thu-umlo mite lakah Christianity nuntakpih takpi ahihna uh lak le uh Topa Jesu itna taktak amaute in zong tel pan ding uh hi,’ ci hi.

Tuabang ahih manin in Zomi Christian te bangci bang Christian I hi uh hiam cih kisit tel huai mahmah hi. A telsiam a nuntakpih thei ciat dingin, mimal kim Pasian in thupha hong piata hen. Amen.

(Translated from Vikas Vani (Vol.II, No.8, Sept 2012) by GS Naulak, also published in ZCF Kolkata Silver Jubilee Sovenir 2012 and ZCF Delhi Newsletter).