Malaysia, Johor ah Operasi lutin gamdangmi 111 kiman, Myanmar 22 kihel

Malaysia, Johor ah Operasi lutin gamdangmi 111 kiman, Myanmar 22 kihel

Malaysia, Johor State sungah gamdangmi phalna kician neilo in nasem “illegal foreigners” akigawm in mi 111 kimankhia hi ci’n zanni in Immigration Department te’n genkhia hi.

Johor State sung aom Senai Industrial Area sungah State Immigration Department te makaihna tawh Operasi abawl uh hi a, nasem te omna leh giahna Worker’s Hostel teng asikgawp uh ahihi.

Department director-general Datuk Seri Mustafar Ali in agenkhiatna ah akiman gamdangmi tepen Bangladesh gammi 46, Myanmar gammi 22, Nepal gammi 17, Indonesia gammi 11 cihbang in kimankhia cihi. Tuaban ah Vietnam, Philippines, Indina, Sri Lanka, China, Pakistan gammi pawlkhatzong akiman lakah kihel uh cih kiza hi.

Tuaban ah Bangladesh gammi kum 48 aphakhin khatzong kiman a, tuapa pen Puaisa (Agent) khat hiding in ki ummawh hi. Operasi alut laitak in hihpa zong akimante lakah kihel a, hihpa khutsung panin Passport honkhatzong ki mukhia hi. Tua Passport tepen nasem te tungah ahawmding in apailaitak akiman hi ci’n Sunday ni in Immigration Department te’n Statement akhahkhiatna ah genkhia hi.

Tuaban ah Agent pa ii mawtaw zatlai zong kimanin, Passport honkhat mahtawh kiman hi. Tuabek thamlo UN Card atuh “Fake” honkhat leh abawlna in akizang Laptop khatzong kiman hi.

Tua akiman gamdangmi tengpen “Immigration Act 1959/1963 and Immigration Regulations 1963” thukhun tawh kizui in thu kibawlding cih kiza hi. Operasi pen Construction Site leh Factory pawlkhat ah lutkiaukiau theizel ahih manin, adiakdiak in UN Card neilo in nasemte kidop siamding thupi dinghi.

Related: Malaysia, Johor State sungah Operasi lutin, gamdangmi 315 kiman

UN Card natawi hanginzong lungnop luat, kipum muanluatding hituanlo hi. UN Card tawh thongakia, Camp sungatung tampitak omkhin hi. Na UN Card pen Malaysia gamsung ah naseptheihna “Work Permit” tetawh akibang hizenzenlo cih phawkdet huaihi. Hongki matkhakleh kumpi thunei te’n thukhun tuamtuamtawh thu hongbawlthei cih phawk huaihi.

Banghanghiam cihleh pawlkhat in UN Card kineisak lualiang in, kumpi thunei khatpeuh in thu asit ciangin thusimmello, zahtak mello in UN Card khawng lotpheiziau, a utbang in nadawng kikziauthei uhhi. Malaysia gamsung ah Myanmar gammikhat thukhun tawh kituak in Legal takin nasem in aomtheih nadingin Passport aneih masak kul a, tuabek thamlo Work Permit kiciankhatzong aneihkul hi. Tuate ihneih keileh “illegal foreigners” ci’n hongki ciamtehziau ahihi. Sawltak #zomidaily