Malaysia gamsung aom Kawlgammi te kidop huai semsem

Malaysia gamsung aom Kawlgammi te kidop huai semsem

Myanmar, Rakhine State, Maung Daw sung aomte buaina hangin Malaysia leh Myanmar gamnih kikalzong buaina tampi piangsak hi. Abeisa Sunday ni inzong Malaysia gamsung ah gammakaipipa (aminpi zong gelhgelh nawndahni) kihelliang in lungphona neimawk uh a, tuapen Kawlgam ulian te’n diksa hetlo uhhi. ASEAN gamsung ah gamkhatleh gamkhat gamvai ki ukna nawngkai sakloding cih thukhun aom ci a, tuapen Malaysia gammakaipipa in apalsat hihtuak mawk hi.

Rakhine State sung buaina zong atakpimah hiam cih akanding in Aung San Suu Kyi leh Kawlgam ulian te’n Kofi Annan (ex-Secretary General of the United Nations) makaiding in cial uhhi. Kofi Annan in amuhkhiatna uh nungkalsung mahin leitungbup theihding in pulakkhia a, Rakhine State sungah minam beiliang in kithahlupna Genocide omlo hi ci’n pulakkhia hi.

Malaysia gammakaipipa ngiatin Kawlgam makaipinu pen “Genocide” nung Sunday ni in a otsansan hi a, Kofi Annan ii pulakna tawh hongki lehbulhpian mahmah tamawk hi.

Malaysia gamsung aom Kawlsai tezong ki vauna (Threat, ခြိမ်းခြောက်မှု) om cih BBC pan kiza hi. Malaysia gamsung aom Kawlgammi tezong vaksuk vaktohna ah nakidawm mahmah uhhen ci’n Malaysia gamsung aom Myanmar Embassy pan U Tin Aung Moe in genkhia hi.

Kawlgam kumpi inzong December 06 ni akipan Malaysia ah nasemding in mi paisak nawnloding ci’n genkhia hi.

Hiteng bilbial kawmkal ah UK News Website minthangkhat ahi “Daily Mail” te’n Rakhine State sungah Kawl galkap te’n Rakhine State sung aom mivom te (amin taktak gelhgelh nawndahni) bawlsia uh ci’n Video Clips leh News khahkhia uhhi. Tuapen thumanlo, ataktak hilo ahih manin Kawlgam kumpi hehmahmah a, Daily Mail te bangci bangin thubawlding cih “Myanmar State Counsellor Office” te’n akan laitak uh ahihi.

More: Rohingya tebek UN Card kipiahen ci’n Malaysia Minister khatin genkhia

Christmas hongtungding hita a, Malaysia gamsung aom Zomi te’n ihomna gampen Christian gam ahihlohlam zong ihphawk zelzelding thupi khading hi. Carol Singing ci’n zanvak (asunvak zong om) khawngzong kidopding akizasaksak om uhhi. ZD Sawltak #zomidaily