Mipilte dem sawm dah in ~ Pau Khat Suan

Mipilte dem sawm dah in ~ Pau Khat Suan

Pilna cih pen etziau tawh a kimu theilo, a pilpente’ khauk nangawn va phelkhia thei phial mah lehang zong a kimu tuanlo ding hi a, tua pilna pen a sitna kician a om ciang bek in ki muthei hi.

Leitung paizia tawh kizui in “a thatang pil, a ciim ngiat, a tei ngiat” cihbangte a ciaptehna dingom theilo a, a banban a a kisit khit ciang a zawhzah tawh kizui “pil-ciaptehna, degree” om thei, kipia thei pan ahi hi.

Pil-ciaptehna degree bangmah na neih kei leh bangzahtak na-pil na-ciim zong in ong teltheih mahmah mi tawmno khat in “i lawmpa’n thu theihna khat nei mah” cih ciang a ong ciapteh loh buang midangte’n a pil a ong ciamteh hetlo ding hi.

Tuabang mah in midangte in ong tel theih sese takei leh pil-ciaptehna degree khat peuhpeuh (or) a thuapthuap in na nei leteh theihtel masak kullo in mipil in ong kingaihsun pah lel ding hi. Haitat haipau mulmul kei peuh leh tuabang mite ki-thupi ngaihsut pah lel hi.

Bangbang ahi zong in mite’n pilsa a pil-ciaptehna degree apiakte apil mah in ciamteh pah lel in, amau’ tung pan bang pilna kangah thei hiam.. ci’n a thugen, a nasep uh limtak ngai in sinsawm leteh na demsawm sang tawldam huai zaw ding hi.

Tua bek thamlo in, mipilte va demsawm niloh pen pil ong kisak cih thadah “a bangci a le!” … ci’n lamdang sakna leh a cinglo ahia a bangci a hia…. cihbang ngaihsutna tawh ong ki-encik zawzek ding hi.

I lung hihmawh mahmah leh i ngaihsutna gen in ong kuppih ding uh ngak ni. Ong kuppih kei uh leh lah amau’ ong kuppih loh bang icih de maw.. cihding himai lel ding hi. Tua na vei, ong kuppih ding a na lunggulh pen mipi tawh kisai thu thupi ahih leh pil-ciaptehna a thuapthuap a nei khat in a ciim takpi leh ong kuppih lel ding hi. A kisap a, na ngaihsut khialhna a om leh ong hilhcian lel ding uh hi.

Mipilte a pil in ciamteh lel in, dembawl bawl sedah lel in! Na demnop mahmah leh nang zong amau’ ngahdan “pil-ciaptehna” ngahsawm zaw in. Pau Khat Suan