21st Century Panglong ah Aung San Suu Kyi thugenna (Zokam)

21st Century Panglong ah Aung San Suu Kyi thugenna (Zokam)

(Kum zalom 21 Panlong Thukikupna Khawmpi zialbawlna ah lungdamkoh thugenna, Naypyidaw,3 Sept.2016) Tutung i Thukikupna Khawmpi pen gamsung kilemna leh nopsakna ding vai thupi khat hi a, vai khat peuhpeuh a omciang i kinbawl ding kisam hi. Hih i thukikup na hunsungteng leh thukikup laitak bek gamsung kilem nang leh nopsaknang ngaihsut ding hi lo in atawntung in bangcih leng gamsung ah daihna leh nopsakna omthei ding cih i ngaihsut ngitnget ding kisam hi. I gambuppi nopsak theih dennang i ngaihsut tek ding a hihi.

Hih i Thukikupna Khawmpi a, thukikup te, mipi’ theih ding-in kitangko khia hi.Mipi te, ihgam sung kilemnang leh nopsaknang in akihel nading leh asansiam nading un kitangko khia hi. Mipi te’n ihgamsung kilemnang leh nopsak nading, haksatna te bangcih leng phulzo ding cih, a theihtel dinguh kisam hi. Haksatnate tel khin lehang,tuate zawhtheih nading lampite kizong thei pan dinghi.

Tutung ih thukikup natungtang in,kua pawlte’n bang thugen,kua te’n a beisa thu bekbek bulphuh, kua te’n mailamthu ding bulphuh cih ong kilangkhia ding hi. A hihhang mailam ah kikhel toto ding hihang cih lamet nei hang. Tuhun a, a beisa thu bek agengen te zong mailam ah ihgam a ding mailamthu khual in thu hong gen ding cih zong lam-en hihang. Nungthu, a beisa thute kihen cipsak laiding maw, ahihkei leh mailamthu khual in, ngaihsun a, hangsantak in kalsuan dingmaw, cihpen ei mimal khat kimciatin i khensat ding ahihi.Tuabang in i khensat nate pen mipawl khatbek a ding zong hilo, mimalkhat nopsak nang bek zong hikei, minam khat-ai guakding bek zong hilo in, ihgambup nopsaknang ahihlam ihtelding kisam hi.

Gambuppi kilemna leh nopsakna cihpen leitungbup nopsak nading tawh kimemat hi. Tua ahih man-in hi-teng a, i thukikupte leitungbup in hong lunghimawh pih mahmah uhhi. Hihbang gambup kilemna leh nopsak nang cihpen a haksa mahmah vaipi khat hi. Gamdang mundang ah zong tuabang haksatna te phulzo in kilemna leh nopsakna na-la uhhi. Tuabang in khat leh khat thupha kipaih in lungnuam tak-in om uhhi.Mihing te pen i kizopna om dimdiam ahih mahbang in, munkhat ah kilemna leh nopsakna ihngah teh,ihgam a ding lametna hoih hong ompah hi. Eigamsung ah kilemna leh nopsakna hong om leh gamdang te a ding zong lametna hoih abawl tawh kibang hihang. Tua ahihman in i vaipuakpen, lian mahmah a,bangzahta in thupi cih manghilhlo in,vaipuak i siamding kisam hi.

Hih i Khawmpi pen akipatna hipan hi. Akhatvei kikupna hi-a,mailam ah thukikupna nei laiding hihang. Tua kikal ah minam makaite kikupna zong hih thukikupnapi ihzialbawl khit teh kivaihawm pah ding hi. CSO(Civil Society Organizations) tethu sun-na zong neihtheih nading vaihawm pahding hihang. Sepding bawlding tampi om hi.Septak bawltak in, gimtak hi.Banghanghiam cih leh ihgam’ mailam ding hi.Gam mailam ding i cihciang sauveipi a ding hi.Mailam hun ah ihgamsung ah a om ding, ateengding mitampi ongpiang dinghi.Hih leitung bangtanvei omding cih kuaman theilo hi.Leitung omlaiteng ei-mihing te,i nopsaknang bawl thei lehang mihing hihna manpha angah hiding hihang.Mi a piang buang, mihing manphatna ihngah nang leh ihbawl nang,tutung Khawmpi a kihel tangmi khempeuh-in hanciam tekding hihang.

Leitung nuntakna tomkal sung bekhi.Kumbangzahciang nungta zoding ihiam? Katheih ciangciang leitung ah kum sauvei anungta penpen kum 120 ciangbek hi.Sauvei hetlo hi. Gamkhat a kip hun leh i simleitung khanhun ding ngaihsun le hang,kum 120 pen hun tomno khat tawh kibang lelhi.Ei i cidam in khansau mah le hang zong, kum 120 ciang khawng bek hi lel a,tawmveino khat hiziau hi. Kei khangualte bang kum 120 anungta ding-in kingahsun le ung zong kumtam nawnlo hi. Tua ahih man-in, hun neih sunsun,thupi tak in zangthei-in,a beisa thu hangtawh khat leh khat ki-elbawlbawl nawnlo a,khat leh khat bangcih leng kihuatna, ki-elna te beithei ding cihleh, i mite bang thuhoih leh gamhhoih nusiat theiding cihte, ngaihsut in neini ci-in ong hanthawn nuam ing.

Hih ih Thukikupna Khawmpi bawl nading huntam kineilo hi.Huntam neilo, tua leh banghang bawlteng tuung ong cinuam zong omkha ding hi.Hih pen hun khin tohtoh ding pawl hiphalo aihman in,hun neihsunsun kal a, akibawl hi. Hun neih sunsun a bawl cihteh ko a-ding bek ahih kei leh tulaitak kumpi asem te ading bek cihbang zong hihetlo hi.Kua kumpi, kuakumpi hita leh mipi te’n a sang kei leh kawimahah mualsuak ngeilo dinghi. Tua ahihman in mipi in a telsiam ding leh asantheih ding thupi kisa-in, Thukikupna Khawmpi zong ama’ atunzawh nading hanciam ciatding hihang.

Mipi te’n hong-en in, thugente hong ngai in, ong lam-en tek uh a,bang acitam maw ci-in thu na ngaisungsung uhhi. Kua te’n bang thu ngaihsun,kua te’n gam a ding ngaihsun,haksatna te kawici gualzawh ding cih mipi te’n ong khensat ding uhhi.Eiteng in khensat thei lo hihang. Mihing khat i manphat napen nikhat leh nikhat kibanglo hi.Nisim in nahoih bawltheih nading hunhoihkhat hi zelhi. Zingsang ni hong suak ciang, nahoihkhat bawltheih nang hunpha khat ngahzel hi hang.Tua hunhoih ihngahte amanpha in ihzat ciatnang ong hanthawn ing.Tuabangin hunhoih zangsiam le hang, i tupna leh i ngimna tungding hihang.

Lungsimsiang taktawh kisapna kigennate khempeuh zong bangmah launading omlo hi. Ei tangmi a pai, eiteng sungah lemlohna zong omkha thei ding hi.Tuate pen patauh ding hilo hi.Haksatna omlo bang a i om leh tua haksatna te ki phuzo ngeilo dinghi.Haksatna te hangsan tak in ihphul zawhnang,hanciam in, kisin ding hihang.Khat leh khat kipanpih ding, khat leh khat ki thupi bawl ding, i thu te akituah kei leh zong bangcia kituak theilo cih ngaihsun ding hihang. Tua bang teng ihsepciang i-tup-i-ngim’ kilemna leh nopsakna ngahzo panding hihang.

Thukikupna Khawmpi ah nisim in bel ongpai zolo mahhing,ahihang hihpen thupi simmahmah hi-ing. Ko kumpi thahatna pen mipi khutsung ah omcih, kathubullet uhhi.Kumpi cihpen mipite’ ngaihsut leh a deihnate, a thupi ngaihsut ding uh kisam hi.Ko kumpi zong kumpi hoih kahihnang uh hanciam mahmah ung. Kum zalom 21 Panlong Thukikupna Khawmpi pen,1947 kum a, akibawl Panlong Khawmpi bangmah in,i gam ading thupi mahmah, alipkhaphuai vaipi leh a angtan huai thukikupnapi asuah nading in,i vek-in hanciam kimni ci-in ka thugen kakhup hi. (Source: Myanma Alinn Daily, 4 September 2016) Luan Tuang