Malaysia gamsung ah zatepna hangtawh akizom natna hangin kumsim in mi 20,000 tabang siden cih Bernama pan kiza hi. Kumsimmah inzong zatep mimal pen khangsemsem ci a, zatepna paninzong natna akingah tamsemsem cihi.
Consumers Association of Penang (CAP) vice-chairman, Mohideen Abdul Kader kici ii genkhiatna ah zanah “Tabacco” pen leitung ah sihna apiangsak penpen khatin ki ciamtehlai ci’n genkhia hi.
Malaysian gammi khatin nikhatin tawn 20 apha Cigarette bungkhat atep in tuatleng, nikhat sungin zatawn akitep bekbekpen 4.6 sticks bang phading hi.
Tua za kitep ii akhu hangin aki thuaklawhna, tua za kitepteng akileina hangin sumbei te ngaihsunleng innkuansung bekthamlo, gam adingin zong supna lianpi ahihi ci’n Press Conference ah Mohideen Abdul Kader in genbeh hi.
Tuaban ah zatep khatin khakhat in Cigarette aleinading in asumbei pen Average RM178.8 bang hitawntung ahih manin, innkuansung sumzatna zong tampitak in sukha mahmah hi.
Tulamlam ciangin Cigarette mawkmawkbek hilo in, Electronic Cigarette cihmah ki omsak a, tuatezong ahoih hituan hetlo ahih manin gamuk kumpi in khauhtakin akhamcipding kisam semsem tahi.
Electronic Cigarette ahih keileh e-cigarette tepen pawlkhat in alauhuailozaw in ngaihsunkhial uh ahih manin, gamsung ah zatep atam semsemding pen patauhhuai mahmah hi ci’n Mohideen Abdul Kader in “World No Tobacco Day” ah genkhia hi.
Malaysia gamsung ah abiakna in zudawnding kham ahih manin, zulobuang zatep leh guihtheih vankham azang tammahmah kici hi.
Philippines President Rodrigo Duterte inzong nungdiak in agenkhiatna ah khuasung mipilak Public Area ah zatep peuhmah thong kha 4 sung kiathei, ahih keileh liausum $100 ki liausak theiding cihi.
Related: Philippines khuasung ah zatep te thongsung ah kha 4 sung ki khumcipding
Khuasung mipi lakah zatep akhamcip pen thudik mahmahkhat ahihi. Zatep te’n agim namsia atheihloh uhhangin agei aom te’n ki thuaklah mahmah hi.
Zatep bekzong hituankei, Khaini, Sahdah, Kunpawng, Tuibuk cihtezong azang amuamte’n agimnam atheihloh hangin agei aomte’n thuaklah mahmah uhhi. Na zatkhakleh phawkthakna in nei inla, kidawm in 🙂 ZD Sawltak #zomidaily
Comment piaknop aomleh...