Malaysia gamsung ah tukumsung vankham tawh mi 55,903 kimankhin

Malaysia gamsung ah tukumsung vankham tawh mi 55,903 kimankhin

Malaysia gamsung ah guihtheih khamtheih azang tammahmah a, tukumsung April khazong beinailo in guihtheih khamtheih azang leh azuak mi 55,903 kimankhin cizen hi. “Drug-related Offences” ci’n vankham tawh akisawhkha amatkhak khempeuh uh hi a, avankham mahmahzong RM81.67 million manneiding vankhia uh ci’n Malaysian Police te’n pulakkhia uhhi.

Guihtheih khamtheih amankhia makaipipa “Narcotics Crime Investigation Department director Comm Datuk Seri Mohd Mokhtar Mohd Shariff” in agen khiatna ah January 01 panin April 13 nidong tukumsung bekbek in vankham tawh akiman mi 55,903 phakhin a, tualak ah gamdangmi Foreigner 2,304 pha cihi.

Vankham avan in amat uhpen asum in akituat ciangin RM81.67 million aphak banah inn leh neihsa “Property” amattezong asum in atuat uhciang in RM49.16 million phading ci’n Monday ni Bukit Aman Press Conference bawlna ah genkhia hi.

Anunung tunai akimanpen Taman Pusat Kepong ah hi a, Nigerian gammi 2 akiman ahihi. Vankham “Syabu” akiman pen asum in akituat ciangin RM400,000 manneiding cimawk hi.

Tua vankham tepen China panin Malaysia gamsung ah alut hi a, Malaysia Customs Department leh China National Narcotics Commission te kipawlkhawm in amatkhiat uh ahihi.

Tua vankham te kimanlo hileh Malaysia gamsung leh Malaysia tawh gamgi gamveng te ah zuakding in akipua ahihi. China pen agam panin vankham “Syabu” kilim puakkhiat mahmah a, Global Syabu Exporters lakah alianpawl hiding in ki ciamteh hi.

Nidang in Malaysia gamsung ah vankham alutte pen Golden Triangle akici “Myanmar, Thailand, Laos” kuamteng panin alutzel ahihi. Tuazawh ciangin Iran gam panin vankham lutleuleu a, tulaitak pen China panin Malaysia gamsung ah vankham limlut mahmah cihi.

China panin vankham alut ciangin vankham zong aman kiamtuam cizen hi. Nidang abeisa kum 6 hunlai in vankham Syabu tepen Kilogram khat ciangin RM250,000 mannei ci a, tu’n China panin alutzawh RM50,000 bek manneita cihi. Aman kiamgawp ahih manin mikim in noptak in leizo a, guihtheih khamtheih azang tammahmah cihi.

Malaysia gamsung ah guihtheih khamtheih azang pen mi 2.5 million bang phading cih kiza hi.

More: Sengam ah Kawlgammi khangno khat vankham zatui tawh kiman

Behlapna: Hih Syabu vankham tepen Metamfetamina acihte tawh akibang hihtuak a, katheih khialh keileh “Mehza” ihcih tetawhzong kibangpian khading hi. Nidangin India panin mehza kipusuk in, Sengamgi tengah kizuak hi. Tu’n Sente’n agamsung panin bawltheita uh a, Asia gamsungteng ah ahawmkhia hileh kilawm hi.

Sente peuhmahpen van atuh abawl asiam ngiatte uh himawk ahih manin, hih vankham tezong atuh hikha ngelngel dinga, asit hilehzong alauhuai banah Senbawl vankham bel lauhuai mahmah khading hi. ZD Sawltak #zomidaily