Syria kumpi in Aleppo panin nautangte leh Rebels te kihepkhiat theihnading Ceasefire thukimna zukkik

Syria kumpi in Aleppo panin nautangte leh Rebels te kihepkhiat theihnading Ceasefire thukimna zukkik

Dec. 16, 2016: Syria kumpi leh rebels ten rebelste ukna Aleppo nisuahna panin nautangte leh rebelste kihepkhiat (evacuation) theihna ding kikaptuahna khawlsanna ding thukimna (ceasefire deal) a neih hangun rebels ten nautang kihemkhiate lakah thau neu leh thau golte selsim uh ahih manin hih thukimna Syria kumpi in zuk kik/la khia kik (withdraw) hi.

Syria government-run SANA news agency in hih thukimna a kizuk kik ma-in Aleppo nisuahna lam panin nautang leh rebelste kigawm in mi 8,000 mun bitna munah kihemkhia man hi hi ci-in gen hi. Rebelste gum Turkish state news agency in bel Syria kumpi tawh kipawl galkap ten (pro-government forces) ten nautang leh rebels kihemkhiate kipuak khiatna mawtawte (convoys) suam uh hi ci-in rebel commander in Reuters newste kiangah gen hi ci hi.

Turkish Foreign Minister Mevlut Cavusoglu in khuapi ki-umcihna Aleppo nisuahna a omte kihe khiat theihna dingin Syria kumpi leh kumpi lehdo galkap (opposition forces) a sawt loin Kazakhstan ah kihona nei ding uh a, Turkey in zong Syria uliante kimaitang kituah in hopihna nei ding hi ci hi.

Russian President Vladimir Putin in tua ma-in Syria gambup ah ceasefire om theihna dingin Turkey tawh Syria ah kilemna om theihna dingin kamkupna kinei ding hi ci hi. UN Secretary General Banki-moon in Aleppo panin nautangte leh rebelste kihepkhiat theihna ding hun UN in lawhsam a, ki-it leh lainat a om mateng tua bang piang thei lo ding hi ci hi.

More: Kawlgam Rohingya buaina pen Saudi leh Pakistan tetawh kizom

Al Jazeera reporter Imtiaz Tyab in Gaziantep (Turkey-Syria gamgi) panin a genna ah kikaptuahna piang kik a, Fua leh Kefraya khua-a omte Aleppo a omte kihepkhiat theih bangin a kihepkhiat ding uh deih loin lungphona piang a, Syria kumpi in mi 800 kiim a mat banah Iran panin galdo ding a kipiakhia militia kici ten nautangte a kihepkhiat ding uh dal ta uh hi ci hi.

Tua loin Damascus ah sihpih bomb puak a, mi thum a sih banah mi 4 in liamna tuak a, Midan district (Damascus) ah zong bomb puak hi. Rebel pawl tuamtuam ten Damascus rocket leh mortar zang in Damascus kap uh hi. Sources: Al Jazeera and News Agencies/ Thang Khan Lian