Malaysia, Perak ah Myanmar gammi Biak Sang Nawi ki thatlum

Malaysia, Perak ah Myanmar gammi Biak Sang Nawi ki thatlum

Malaysia, Perak State sungah Myanmar gammikhat asisa in kimu cih theStar pan kiza hi. Tua Myanmar National akicipa pen amin S.P Biak Sang Nawi kici a, kum 35 aphakhin khat ahihi.

Perak, Malim Nawar khuasung aom innsung khatah asisa in tuni zingsanglam in aki mukhia cihi. Biak Sang Nawi pen tua khuasung ah singnosuan nasep asem “Plantation Worker” kici a, aomna innsung ah sitawh kidiah pikpek in aluanghawm aki mukhia ahihi.

Tuni Monday (Dec 11) zingsanglam 10:30am hunpawl in a nasepna Boss pa’n hih Biak Sang Nawi ii aluanghawm mukhia ahih manin Police te’n amanlang in zasakpah cihi.

Hihvai tawh kisai in palik thunei ahi Kampar OCPD Supt Ng Kong Soon in agenna ah Biak Sang Nawi pen alu munnih liamma omin, ahiam khattawh akisat hiding hi ci’n genkhia hi.

Biak Sang Nawi pen hih a nasepna Plantation ah asepzawh kha 2 bek hipan a, aomna inndei pen Myanmar gammi khatmah ahi kum 50 aphakhin khattawh aomkhawm uh ahihi.

Tua aompih Myanmar National papen hih buaina apianzawh mangcip a, aomna kitheilo ahih manin, Police te’n tuapa azonsan laitak uh kici hi.

Tua aompih Myanmar gammipa zong tua Plantation ah asepzawh khakhat khawngbek hipan hi ci’n palik te’n genkhia uhhi.

Palik thuneipa’n agenna ah Biak Sang Nawi ii aluanghawm pen akimuhkhiatma nai 12 hunlai in asikhin hiding hi ci’n genkhia hi.

Tua asipa Biak Sang Nawi ii luanghawm gei ah si abaang singkhuah khatzong Police te’n mukhia uh a, agei mahah asipa ii sumbawm, Handphone leh Beer bungkhatzong omhi.

Hih Biak Sang Nawi pen aompih Myanmar gammipa in asatlum hiding in ki ummawhpah a, ahi zongin athu akician in Police te’n akanciansan laitak uh ahihi. Nasep neipa Plantation Owner in agenna ah Biak Sang Nawi pen akamtam aciakciak theikhat ci a, akhatpa ahihleh apaukhia ngeilo, aomcip bikbekkhat cihi.

More: Malaysia ah Chin tekhat Rakhine te’n temta tawh dawtliam

Biak Sang Nawi ii aluanghawm pen Kampar Hospital ah Postmortem bawlding, asihna ahang taktak akicianin etding in kipuakphot cih kiza hi. Biak Sang Nawi cih minpen Myanmar, Chin State pan hikha ngelngel dinghi. Asatlum dingin aki ummawh Myanmar National akicipa pen amin ki pulakkhia nailo hi. Kawlte khutlum atuakpeuh hizel ahiam….. Sawltak #zomidaily