Malaysia ah Syria Refugee mi 500 tunbehding

Malaysia ah Syria Refugee mi 500 tunbehding

Malaysia gamsung ah Syria gampan in Refugee mi 500 tunbehding cih Foreign Minister Datuk Seri Anifah Aman in genkhia hi. Hih Syrian 500 te pen kumbeikuan ah Malaysia tungding in ki lamen hi. Hihpen nunglam in Malaysia Prime Minister Datuk Seri Najib Abdul Razak in tualgalpianna Syria panin Refugee i 3000 lakding agenkhiatna tawh kizui in asemtoto ta uh hi a, kum 3 sungin Syria pan Refugee 3000 laksawm taktak uh hileh kilawm hi.

Tuciangciang Syria gampan Malaysia atungkhin Refugee mi 78 phakhinta hi.

Minister’s Question Time hunsung dotna akineihna ah Foreign Minister in agenkhiat ahihi.

Nungkumsung United Nation General Assembly akibawlna ah Malaysia Prime Minister Najib in thugenna nei a, Syria Refugee Crisis panpih nading in Malaysia gampen zong kigingkhinta cih genkhia hi.

Syria gamsung tualgal hangin khuasung mipi te cimawh genthei mahmah uhhi. Agamsung ah omtheilo, om ngamnawnlo uh ahih manin agamveng uh ahi Lebanon, Turkey, Jordan cih te ah taikhia ngeingai uh a, tualgal hangin Syrian gammi ataikhia mi 4 Million bang phading kici hi.

Malaysia kumpi inzong agamsung ah aomsa, atungsa Kawlgam Refugee te athudonloh banglo in Syria gammi Refugee te veimahmah bilbel uhhi. Tuahang mahin Malaysia gammakaipipa in Syria panin Refugee mi 3000 lakding agenkhia ahihi. ZD Sawltak #zomidaily