Zogam khuapi Tedim gamhuam ah gilsan vei tam ~ Zingsol

Zogam khuapi Tedim gamhuam ah gilsan vei tam ~ Zingsol

January 26, 2017. Tedim :: Zogam, Tedim gamhuam ah gilsan natna tam in mi tampi zato lum uh hi cih thu kiza hi. “Hih gilsan natna pen abeisa January 15 ni kiim pan kipan in hong tam semsem hi” ci in Tedim zato aa sianu khat in Zingsol ah hong gen hi.

“Tedim zatopi Medical ward ah tu laitak cina 30 a om leh 25 pen gisan vei veve hi.” ci in zong hong gen beh lai hi.

“Tu aa gilsan vei cina te lak ah atam zaw pen naupang hizaw pian in aihang ulian zong om veve veh aw” ciin Laaitui khua pan Tedim zato pi ah gilsan vei aa zato lum te khat in Zingsol ah hong gen hi.

“Cina te bel asuk lua om sam kei ko bang nithum sung hong lumsak in dam pah sam ung aih hang gilsan vei bel tam peuh mah ko tuak laitak bang mi, gilsan vei hong tun sansan lai hi ven” ci in hong gen beh lai hi.

(Hih bang in Zogam ah gilsan natna hong pian natawh kizui in Zingsol tanu te in Gilsan natna tawh kisai theih huai pawl khat kaikhawm in zolai in kong suaksak uh hi.)

Gilsan natna tawh kisai theih huai pawlkhat

Gilsan natna ihcih in bang ahihiam?

Gilsan natna ihcih pen anpaina ih gilpi ih gilzangte (digestive system) sung ah bacteia, parasites (ahk) virus pawl khat hang aa piang natna ahi hi. Hih lungno te hang in gilnatna, sungpai-na le luakna te hong piang hi. Pawl khat pen ni nih ni thum sung in ama thu in zong dam kik thei hi. Atung aa lungno teng lak ah Rotavirus akici virus lungno hang in naupang te in gilsan natna vei pha diak pen hi.

Gilsan natna ii kihil zia te
Gilsan natna ii kihil zia pen anuai aa bang te ahi hi.

Ankam limlo

• Lua/hawk
• Gilna
• Sungpai
• Eklak ah simal kihel – pawl khat te ah
• Eklak ah napnel kihel

Gilsan lungno te koi pan hong pai uh hiam?

Glisan lungno te pen nekledawn na pan kingah penpen hi.

• Tuisiangtho lo dawnna
• Asiangtho lo mehteh mehgah te asial aa nekna
• Ganhing cina te sa te nekna pan zong kingah thei hi.
• Natna nei ganhingte ih sawk na pan khutsial sianglo pi in annekna pan kilawh thei hi.
• Gilsan natna nei mi in a innkuan pih bek thamlo in aveng te nangawn lawh thei hi.
• Natna nei mi tung pan kilawh mun pen hi.

Natna pan kidal kholh nading bang thupi hiam?

• Umlebel kuanglekeu saingtho sak ding
• A siangtho an/tui ne/dawn hamtang ding
• Innkuan sung ah anhuan anthuk te in atawntung in khut silsiang hamtang ding, kuanglekeu siangtho sak hamtang ding
• Awnghawh khit ciang le annek ding ciang khut silsiang hamtang ding

Natna vei te bang ci kikhoi ding?

• Awnghawh khit le annek ding ciang khut silsiang hamtang ding
• Sungpan apaikhia zahzah Oral Rehydration Salt (ORS) datsa tui dawng ding (tam dawn zo semsem, hoih semsem)
• A manlang in siahuan/sianu te kiang ah kilak ding

Khutsil dan (poem dan in sim ding)

• Tui hong, khutte kawtsak in
• Saban tawktak, khutsung nuh
• Nawtsiang ding hi khut tung zong
• Khutme kawm te zong nawtsiang in
• Khuttang, Khutme nusia lo
• Khutcin dawn zong mangngilh lo
• Tui tawh buak siang, dialsiang zang
• Ka khutte ka nul keu ta.

Ref: 1) https://www.betterhealth.vic.gov.au/health/gastroenteritis…
2) www.drugs.com/cg/gastroenteritis-discharge-care.html
3) https://www.cdiffoundation.org
Lailet – Petert Suumpi
Jan 25, 2017