Malaysia ah kum 4 aphapan naupang khat inndawl 17 pan kia in sipah

Malaysia ah kum 4 aphapan naupang khat inndawl 17 pan kia in sipah

Malaysia gamsung aom Apartment inndawl 17 na panin naupangno kum 4 aphapan khat kiasuk in, sisuakpah cih theStar pan kiza hi. Kum 31 aphakhin apa in khitui naptui tawh kidimin khasia mahmah a, pasian in hong zia etna tamlua mahmah ta hi ci’n zanni Sunday ni in Hospital Kuala Lumpur misibuk mai ah genkhia hi.

Naupangno ii apa minpen Mohd Azmil Amat kici a, innkuan sungah kamsiatna khatkhitkhat hong sulzuihden cihi. Anu inzong atanu asuahzawh kha 6 khitciang in sihsan hi. Tuazawh asawtlo in Tanjung Malim ah ahon Restaurant Business pen supna piang ahih manin khakcipkul cihi.

Tuakhit ciangin atanu pen alungtang hoihlo ahih manin, Surgery bawlkul leuleu hi. Tu’n atapa in nusia leuleu ahih manin, thuak hamsa salua mahmah hi.

Atapa inntung dawl 17 na panin akiat laitak inzong azi pen zato ah aom laitak ahihi. Atanu uh kum 6 aphapan hi a, alungtang hoihlo ahih manin, zato ah Surgery kibawl in, azi in akem ahihi. Azi omloh laitak in atapa kum 4 aphapan penin inndawl 17 pan kiasuk in asihsan ahihi.

Kum 60 aphakhin apu tawh innah akikem uh hi a, Chow Kit vengsung Lorong Haji Hussein 2, Off Jalan Tunku Abdul Rahman aom Apartment ah aputawh alumkhawm uh cihi. Naupangno pen thomasa in innsung lengnakhan “Living Room” ah aom hiding in apu in ummawh cihi.

Police te genna ah hih naupangno akiat hunpen zingsang 5:45am hunpawl hiding ci uh a, innmai Balcony ah khuadaknuam ahih manin tutna 2 thuapto in akahtoh khitciangin anuai ah akiasuk hiding ci uhhi.

Apu inzong innmai pan akiading in ummawhlolua ahih manin, koi ah om hidinghiam ci’n innsungteng zongkawikawi hi. Khatveivei bukteh “Hide and Seek” khawng kimawltheizel ahih manin, tuabangin munkhatpeuh ah aki bucip hiding in ummawh hi.

Firefighters te’n naupang inntungpan kia cih aki zaksak ciangin delhpah uh a, aphual atun uhciang in anei kitheilo hi. Tuaciangin Firefighters te’n Apartment inndei teng khatkhitkhat kiukawikawi in, kua naupang hidinghiam ci’n dongkawikawi uhhi.

More: Malaysia ah Nuta te inndawl 32 pan kia, anih in si

Anunung ah inndawl 17 na pan akia nahi a, apu inzong Firefighters te’n agen ciangin umlopipi in innmai Balcony panin adaksukleh atupa in inntungpan kia in asihsan takpi nahimawk hi.

Naupangno ii aluanghawm pen Tanjung Malim ah kivuiding cih kiza hi. ZD Sawltak #zomidaily