Malaysia gamsung ah 2017 kumsung gamdangmi 47,092 kiman

Malaysia gamsung ah 2017 kumsung gamdangmi 47,092 kiman

Malaysia gamsung ah abeisa 2017 kumsung in Immigration Department te’n Permit kician neilo gamdangmi “illegal immigrant” amatkhiat uh akigawm in mi 47,092 pha cih Bernama te’n pulakkhia uhhi. Tua akimante lakah naupang “Children” akigawm in 885 kihel hi.

Naupang mat athuak tepen angek mahmah asuakcil nikhat aphapan zong kihel uh a, tualo adangte pen kum 12 nuaisiah vive ahi uhhi.

Immigration Director-general Datuk Seri Mustafar Ali in agenna ah 2017 kumsung Malaysia gambup ah akigawm in Operasi 16,208 vei kibawl a, gamdangmi “Foreign Migrants” akigawm in mi 188,884 te thusitna kinei cihi. Tualak panin mi 47,092 te aki mansuak ahihi.

Akiman te lakah mi 33,079 tepen pasal hi uh a, numei pen akigawm in 13,128 ahihi. Naupang kumcinglo, kum 12 nuaisiah akiman tepen pawlkhat anu apa te’n Malaysia gamsung ah hong lutpih uh hi a, ahi zongin atamzaw pen Malaysia gamsung panin asuak cihi.

Gamdangmi nasem “illegal workers” te bekthamlo, tuate nasep aguan Boss “Employers” zong akigawm in mi 1,257 kiman hi. Tuate pen Permit neilo te nasemin azat, acialkhak manin akiman uh ahihi. Tua akiman Boss 1,257 te lakah 80% pen thu kibawlkhin a, adang 20% tepen thusitna thuakding in akisepsan laitak ahihi.

Immigration Director-general in agenna ah hihbangin Malaysia gamsung ah Operasi bawlkawikawi in, Permit neilo te akimatna pen gamsungah buaina aomloh nading, Security ahoih nading lunggulhna hi ci’n genkhia hi.

More: Malaysia, Johor ah Operasi lutin gamdangmi 514 kiman, Myanmar pawlkhat kihel

Gamdangmi honglutsim te tungpan in natna hoihlo tuamtuamzong gamsungah honglutthei, kilawhthei ahih manin, tuahang inzong gamdangmi Permit neilo te aki limsit mahmah ahihi. Tua ahih manin Immigration Department in Operasi pen ahunhun in kibawl totolai dinghi ci’n genkhia hi. Sawltak #zomidaily