Mainawt teitei lel in ~ Dong Mung

Mainawt teitei lel in ~ Dong Mung

Filippi 3:16 Bangbang hita lehang, i tunna ciangciang panin mainawt ciat ni. Tuciang na nuntakna sungah ahoih tampi na tuahkhak zong om-a, a sia tampi na tuahkhak zong om hi.

Tua ahoihte tungpan ahoih semsem dingin mainawt inla, a sia na tuahkhakte tungpan pilna sinin mainawt teitei in

Na ukna, na lunggulhna mualsuah dingin na kalsuanna lampi ah hong panpih, hong huh mi tampi tawh na kituahkhak mah bangin hong langpanin hong elbawl mi tampi tawh zong na kituakkha hi.

Bangbang hitaleh hong panpih hong huh mite tawh mainawt teitei inla, hong langpan, hong el mite hangin thasan in mainawt teitei in.

Topa ading le midangte ading na hoih na sepsa tampi zong om dinga, na sepzawh nailoh zong tampi om ding hi.

Na sepsa na hoihte zom toto inla, na sepzawh nailohte na sepzawh teitei nadingin mainawt teitei in.

Na hihtheih tawpin na hanciam hangin na lamet bangin hong piang zolo kha dinga, na ngaihsut bangin hong tangtung lo kha ding hi.

Bangbang hitaleh hanciam pha lai inla, gel pha lai in. Ki thadah sak kenla, mainawt teitei in.

A lungkiat huai, a thadah huai, a lungzin huai, a khasiat huai tampitak na nawk kha ngei ding hi.

Leitungah mi lawhcing mi gualzote in tua bang lungkiatna, thadahna, lungzinna, khasiatna, haksatna tampite a nawkkhit ciangun gualzawhna hong ngah thei pan uh ahih manin lungkia loin mainawt teitei in.

Mite nuntakna na etet leh na lungkia in, na thadah kha dinga, lamet bei in na om kha ding hi.

Pasian in leitungah nang hong piansakna ahang in Amah phat ding leh a thupiakte zui dingin hong piansak ahi hi. Bangbang dinmun ah na om zongin Pasian tungah lungdamko inla, ama mai zong kawmin mainawt teitei in. Hong tavai sak ngeilo ding hi. Mite nuntak khuasak en kha kenla, nangma maban ding khuat in mainawt teitei in.

Na hoih na sep ciangin hong gensia ding pawlkhat mah om dinga, a sia na gamta zongin hong gensia ding mah om veve ding hi.

Tua ahih manin mite gensiat, mi kosiat ding lau ngaihsut kei inla, na hoih semin maiawt teitei in.

Na siam zah, na pilna zah, na hoihna zah, na kicinna zahzah…na hihna bangbang in hong it, hong ngai, hong vei om veve lel dinga, nang ading beidong huai nailo hi.

Mihingte in a pilte pakta, a siamte pakta, a hoihte ngai himah taleh Pasianin ihihna zahzah tawh hong it, hong ngai hong angvan veve hi. Bangbang dinmun ah na om zongin nangkia na hi ngei peuhmah kei dinga nang hihna tawh kituakin lawm le gual na nei veve ding hi. Tua ahih manin lungkia thanem kenla, mainawt teitei in…

Na mai ah San tuipi bangin lametna bei huai na ma bing taleh, na nungah Egypt galkapte bang lauhna le dipkuatna in hong zui taleh…cihnang theilo na om zongin lungmang kenla, na khut lamto in mainawt teitei in..

Na upna sangkhan inla, mainawt lecin, San tuipi hong kiphelkham dinga, Egypt galkapte tuipi sungah hong maimang lel hi. Lungmuanna tawh galkhat ah gualzawhna la sa in, phatna la na sa thei ding hi.

Na mainawt teitei nakleh hunkhat, nikhat ciang gualzawh matutna na ngah dinga, mi manpha khat na suak pelmawh ding hi… Deihsakna lianpi tawh, Dong Mung