Hong nungtasak kik in ~ Dr. Ngul Khan Pau

Hong nungtasak kik in ~ Dr. Ngul Khan Pau

Tutung in “Hong nungtasak kik in” cih Late 85:6 i bulphuh hi. “Nungtasak kik” cih ciang in khatvei nungta khin cihna lam kawk leh ki lawm hi. “A KIK” A kihel naak leh khatveina hilo cihna hi. Laisiangtho sungah nuntak kikna tawh kisai i gen ciangin ei’ gam hi-in ko gam hita leh tuhun in Pasian’ hehpihna tawh khanlawhna tungin Laisiangtho sunga thuciamna om mah bangin a lang a langah buaina om mah ta leh a lang a lang mahah Pasian’ nasepna lamdangtak om hi.

Laisiangtho sungah “Ni nunung ni ciangin Topa in ong veh ding a guah masa tawh guah nunung tawh zong hong veh ding hi. Kha guah thupha tuah tawh hong veh in i tanu i tapate in zong Pasian thu hangin muhtheihna, muhkholhna cihte nei ding uh hi,” cih kamciamna om khin zo hi.

Tua ahihman in nuntak kikna tawh kisai-in Jacob nuntakna sau lo khat genleng ka ut hi. Jacob nuntakna pen Pian 32 mateng khempeuh en leng nopsakna sangin dahna haksatna lam vive hizaw tham hi. Jacob pen a nu in a it mahmah, a u Esau sangin a deihsak zawk, mipa hi. A u tan ding teng sut sakna tawh inn pan taikhia mang hi.

A pu kiangah va om a, tua hun sungin a nu in zong nasihsan khin ta hi. Inn a tunkik ciang in thupha takpitak tawh inn tung hina pi a nu om nawn lo hi. Jacob nuntakna en leng bangmah lo tawh khual gamlapi ah khualzin dingin paikhia hi. Bethel a kicihna mun hong tun taktak cianga, a thungetna pen nak thupi mah mah hi. PIAN 28:20-22 Na ah:

Pasian in kei tawh hong omkhop a, hih ka paina lampi ah kei hong kem a, nek ding an leh silh ding puan hong piak a, lungnuam takin ka pa inn ah ka ciahkik leh Topa in keima Pasian hi ding a, khuam a ka phuh hih suang in Pasian’ inn hi ding hi. Nang mah in nong piak khempeuh sawm a khat nang tungah kong pia kik ding hi, ci hi.

“Leh” cih kamciam a om ciangin hihnop khat nei hi, cih ki lang hi. A ngimna leh atupna Pasian kiangah kokhol hi.Bangmah lo tawh paikhia hi. Bangmah nei lo in paikhia hi. A upa in thah dingin zong ahih manin a galtai taktak a hi hi. Galtai lampi ah Topa aw ci-in sawmah khat piak ding dongin kamciamna nei thei mawk hi. Tua hun laitakin sawmah khat zong nai se lo hi. Ahi zongin Jacob in Pasian tung a lungdamna hangin pia ding in kiciamkhol sehkhol khin hi.

Tua bangin a pu kiangah om in, zi leh ta hong nei hi. Hong ciah kikna lampi ah sihtheih ding namtampi tawh ki pelh hi. Hih Pian 32 ah Jacob leh Pasian kituak lo,ki buanlo hi peuhmah leh a lian 33 na ah a upa tawh a ki maituahna-ah Jacob suakta ken teh, ki ci hi. Jacob in a u hehna, thangpaihna, sinsona, thahsawmna pan a suahtak theih nadingin a zi atate leh aneih ganhing khempeuh ahi zongin amah nawngkaisak thei ding na khempeuh luigal lamah koih khin a, Amah bek mun khat ah giak hi. Tua amah guak a om khin khianna munah Pasian in veh hi.

Ute naute nuntak kikna ngah theih nangin mipi tawh lasak khop, thunget khopna, kikhop khawmna cihte nuam mah mah hi.Ahi zongin Pasian sunga nuntakna taktak neihtheih nangin nangmah guak Pasian tawh ki kholhna, nangmah guakin Pasian awnem ngaihna, cihte na neihh kei a hih leh na kha nuntakna pen zungkha zo tuan lo ding hi. Bang hang hiam cih leh mipi tawh kikhop khawm na ah mipi hu in nang hong zap laitengin na thahat bek ding a mipi hu in hong zap nawnloh ciangin na kiasuk pah lian ding hi.

La khawng nuamtak a i sak khawm ciangin bel mihing lungdam thei dah thei i hih bangin nuam kisa mahmah takpi hi. Lungdam bawl khawnga la i sak ziahziah pawl bel a sa i ngak man a lungdam i hi hiam? A la zong nuam a sa takpi mah i hiam? Cih theih hak mah mah hi. Mipi lak a la i sak khop ciangin lungdamna ki hawm tuah, ki pia tuah i hihman in lungdam na om takpi mah a hi hi. A hi zongin zungkhakna, Pasian sunga nuntak na taktak i cih pen amah guak a Pasian hopih thei, Pasian tawh kilawmta thei, Topa tawh gam simtham munkhat ah a ki khawlkhawm thei te a hih kul hi.

Tua bangin Pasian maivil in i kikholh khawm theih mateng Pasian zahtakna taktak leh a lim a mel puak theihna nei lo ding hi. Laisiangtho i et ciangin Pasian’ mizatte zingsang thobaih in lol se se uh hi. Laisiangtho sungah Abraham zing thobaih a, Topa’ maiah ding hi, “ci hi.Joshua 3 na sungah “Joshua zingtung tho pah a,” ci leu leu hi. Late 5 sungah David in “Zingtunga kong ki ko na nong ngai ding hi” ci hi. Pasian’ mizat i cihte pen zingtung mite buaisakma in tho a, Pasian a sam, a hopih, thudong mite na hi citciat uh hi.

Ka mangngilh theih hetloh thupi kasak mahmah khat in Guwahati ka om zawh zingsang nai 4 ta in Muslimte in a biakinn panun amau pasian Allah sapna aw mike tawh gingsak den uh hi. Tua mike leh Mission compound kimaingat ahih manin zingsang simin kiza den hi. Nai 4 teh Muslim te siampupa in amau biakinn tungpanin mike tawh pasian dang omlo hi. Muslim te’ Allah pasian biading a a ki pia mite aw Allah in tuni-in note a bia dingin hong sam hi” Ci-in tangko den hi.

Hihthu kazak ciangin ka lungsim sungah,” Aw Pasian taktak a theilo nangawn in zingsang thobaih in hi ci bang in phalpi zing hita leh guahzu tuuk sung hita leh kiko ngap den uh ahih leh ei Pasian hing a nei ka hi, Pasian nungta abia ka hi a ci ten bang ding a sam zo lo mawki a hi hiam?” cih ka lungsim sungah hong nak om lua mahmah hi. Pasian na ki kholhpih mun hiam? Hun na zatkhawm hun uh a tam hiam? Na hunzat khawm uh a tamnak leh na nuntakna ama deihna na thei tel ding hi. I zite tawh i kiho tam peuhpeuh leh i thu paihi. I thu luangkhawm thei hi.

Gentehna mawk in “I kiteen zawh phet in ei ki teeng khin i hih teh ki ho sese nawn kei ni maw, kici-in ta khat i neih khit ciang in zong ki ho nai kei lai leng ki teeng suak lo maithei ding hi hang”. I ki ho ho nangawn, i kigen khopkhop nangawn i thu kikalh thei lai ta zen cileeng, Pasian tawh ki ho ngei kei leng ama deihna i theizo ngei kei ding hi. I kiho a tam semsem ciangin ama deihna kithei semsem pan hi. Kiho tawm peuh leh ei deihna bek hong pai pah hi. Ei deihna in sau hong tunlo hi.

Laphuakpa khat in,” Keima deihna tawh ka nuntak lai-in dahna hi a, Topa deihna ama cihna bangin Pasian tungah ka kipiak ciang ka nuntakna pen thupha luanna nuntakna hi” a cih bangin tuni-in i nuntakna pen eima deihna en nop i sak khop na ciang bek tawh nuntakna pan in nuntak kikna ngah theih na ding in Pasian tawh tukhawm, ki khawlkhawm, holim khawm in Laisiangtho simna, Thunget ki-apna, nuntakna mahmah ki piakna, cihte seploh theihloh ahi hi.Nuntak kikna leh khanlawhna cih pen Pasian kiangpan hong pai hi. Khanlawhna a om naknak leh Pasian kiang pan ahihi. Khanlawhna i gen ciangin i ngaihsutna ki bang kim lo hi.

A hi zongin hih lai a khanlawhna Jacob khanlawhna pen amah bangmah lo mikhempa, a pu nangawn tawh ki thu tuak lo a, a pu thawhsawm pa, …..vantung mi in khaam kei leh zong a pu nangawn in that mai kha ding hi. Mi banglo ahih kei leh thupha piaktaak mahmah lo khat pen Pasian in ki tuahpih ahih manin a nuntakna hing kik hi, ki khek hi, thak suak hi. Anuntakna khanglo thakin nungta kik takpi hi. Jacob nuntakna pen zattheih ding hong suak kik hi.

Tua pen Pasian tungpan a ngah a hi hi.Laisiangtho sunga om khanlawhna tuamtuamte lakah khat enleng: Nehemiah 8 sunga om khanlawhna thupi mahmah khat om hi. Thuciam lui sunga khanlawhna thupi pen dinga ki ngaihsun hi. Hih khanlawhna tawh kisai in a thupi mahmah pen Ezra siampipa in mipi kikhawm te maiah Pasian thubu tawi-in simkhia dingin a, Laibu hong phen ciangin mipite ding a mipiten tua Pasian thubu kisimpen ngai uh hi, ci hi. Pasian thu ngaiin Ezra leh siampite in tua Laisiangtho pen zingtung panin hong sim uh a, hong simsim in mite theih nadingin a khiatna hong gen uh hi.

Tua a genzawh ciangin bang piang hiam cih leh, Mite nasiatak in kap uh hi. Nasa uh ahihmanin Pasian mai-ah kisikna thupitak om hi. Bang hang a hihlai ah khanlawhna piang hiam cihleh Pasian aw, Pasian kammal a ngaih a zakna pan vua piang a hi hi. Laisiangtho pan a piang hih khanlawhna peuhpeuh pen Pasian kiang pan, Pasian thu pan piang hi. A genpa tungpan piang lo hi. Ken khanlawhna kem lo hing. Kem hi leng kei hong pai lo in laito panin hong khak lel ding hing. Tua bang hi thei hi leh koimah pai lo in zum sungah tut hithiat kul ding hi. Hong samte kiangah no a ding hi zah ci-in Pawlpi liat leh neu tawh kizui-in kikhawl ziauziau lel ding hi. Khanlawhna pen kei tawh kisai lo in Pasian kiangpan bek in hong pai hi.

Ezra haksatna khat ah Pasian kammal a sim laitak in a miten Hebia pau thei nawnlo uh hi.Babylon gamah sal kum 70 bang tang uh a hih manin pau mangngilh khin ta mai uh hi. Tua manin Ezra leh siampite in a sim khit ciangin a khiatna gen kik hilhcian kik uh hi. Tua bangin a gencianuh ciang in mipite lungtang thal a sut bangin nasa uh a, Kapp uh hi. Khanlawhna diktaktak pen Pasian kiang pan hi-in ama kammal pan hong piang hi. Ama kammal in nuntakna hong ki khelsak hi. Migilote migina hong suaksak, zu-ngol veite zu duhlo hong suaksak, mawhnei mite mi siangtho hong suak sak hi. Topa kiangpan khanlawhna hong pai a, Ama kammal bekbek in hong kikhelsak thei hi.

Jacob a khanlawh na dingin Pasian in kibuan pih hi. Kilai uh hi. Ki boxing uh hi. Ki buan tak tak mah uh hi. Jacob pen kibuan a hat mahmahleh a siam mahmah khat zong ki kha ding hi. A pian tunga kipan a tuhsawm den ahih manin a pian a ki pan ki buan a sawm denkhat hi. Pasian tawh kibuan in Pasian inlel, Jacob in zo ci hi. Laisiangtho sung ah “Pasian in lel dingin a ki muh ciang…… ci mawk hi,” Pasian hat hetlo a hi tam, Pasian lawmlawm…. Van leh lei a bawlpa, Jacob nangawn a bawlpa in Jacob lel lawm lawm ai tam, cih huai hi. Nang deihna leh Pasian deihna a ki buan ciangin kua in na zo zaw uh hiam?Nang deihna in zo zaw maw? Pasian deihna in zo zaw?

Nang leltak in zong tuni ciang dong ama thu na man nop loh gige, Pasian in nang hong lel gige ahi hi. Jacob in Pasian zongin ” Nang mah beelsek pa kei tungman bang” i cih ngam nawnloh ciang in Pasian a zo mah i hi hi. En i zawh mawk ciang in “Pasian in Jacob tua mun ah thupha a pia hi” a cihna munah Pasian in eite thupha hong pia thei lo mawk hi. Banghang hiam cihleh Pasian zo mawk, a man hong lel mawk ahih man hi. I nuntakna sungah tamveipi eima deihna lunggulhna in hong kai-in i hihna i nuntakna pen manpha mahmah dinga Topo’n hong bawl hinapi, Zattheih loh ki suak zel mawk hi.Man tawm mahmah mawk hi hang.

Ei i kiphal nak leh Pasian in i gamah cialpi a bawl siam ding, Laisiangtho hilh siam ding hong pia lai ding hi. Kha khualzinnate ah ka gentheih zelzel khat pen kei pen B.A ka zawh in bi-inn nuai mah pan ka hi a, B.D zo in kong ciah ciangin zong bi-inn nuai mah ka tung hi. Khuata mahmah pan a khangkhia ka hi hi. Kumpi’na khat peuhpeuh sem hi leng Manipur gamsung koi lai ka tung tam? Motor Cycle khat bel Pasian in lem a sak leh ki nei mai thei hi. Ka sau phak penpen leh phaipi zum ciang khawng hiding hi.

Tua ciang ka tun pen sau tung kisa mahmah ding hing.Mihing ngaihsutna in a bat khak loh ka nu ka paten zong a lam khiat zawhloh ding sumlehpai i zat khiatsa, Pasian in gam hi tanta hong bansak a, gam hizah ta hong zin kawikawisak banah hehpihna tampi hong muhsak pen hampha kisa mahmah mai ing. Sumh kisa hethet lo hing. Pasian thumang leng ki sumh het lo hi, cih pen ka gen den khat ahi hi. Nidang tan 4 ka sim kum in Tangnuam Middle Hight School en ding pen ki lungdam mah mah hi.Phaipi mu ding bang zingsangtamveipi ki khanglo a, Zun bang suak pahpah a, a suak ci leng lah pai lo, innsung tum leeng lah suakkik zel cih bangtawh an bang nih vei thumvei kine man zawzen hi.

Khat vei ne Motor gingza khawlkik phot cih bang tawh ne buang ne lo buang bang den keei mawk hi hang. Tangnuam bawhlung tual ah Bus in hong ngak ding cih pen kinak lawp mahmah hi. Ngaihsutna ah Phaipi bang limlangh khawng a ki phah dingin kingaihsun hi. Kinaklawp lua mahmah in ki munuam lua mahmah hi. Kei bang zingsang an ne in tua zawh ciang kalawmte a ki thawi nai hiam? ci-in ka ettoh leh ki thawi nai lo uh a hihman in kilehkikin khatvei an ne leu leu hing. Ei sum ei paai i hih zawh zah pen tua bang ciang khawng bek a hi hi.

Pasian in hih ciangbek a mu ding atung dingin hong bawl hilohi. Ei kiphal peuh leng a sangzaw semsem a tung dinga ki lamto zo ding a hong bawl himawk lo i hiam?I kiphalloh man hi leltak hi. CBA gamsung bek a sem ding in Topa’n hong bawl hi tuan lo hi.India gamsungah Pasian’ nasep nang a tam dan gen zawh hilo hi. Mailamah a kong lianzaw hong hon’nsak lai ding hi.Hi banga Pasian thu i gentheih nadingin ei’ maiah thungkuah khat kuah a, a khe uh tawh pai kawikawi in Pasian thu a gen Pastor pawlkhat na om hi. Tuate i zantak mahmah hi.

Tuhunin Pasian’na nasiatak in i septheih nadingin laisiam laisinte a ding in zong ki cingmahmah, kha thu ah zong ki cing mahmah ta hi. I luahsuk ziahziah theih dingin Pasian in tu laitakin kong hong hon’ hi. Tua ahih ciangin ken Assam gam khawngah ka cih inah, no na kipiak ngam naknak uh leh ka ci den hi. Kei Israel gamah na pai ing. Ka nu ka paten zong hong nuntakpih lai-in thei uh hi leh um kei phial un teh. Mizoram ka nite khua ah Israel gam ka paina thu gen in ka holimpih leh pawlkhat in um thei mahmah lo uh hi. Pai taktak ken teh Jerusalem cih khawng vantung gam hilo maw, bangci banga va paito a hong ciahkik thei hi ding hiam, ci uh hi.

Pai ken teh, a ci pawl leh pai in teh, a cipawl namnih pha in amau leh amau zong ki sellawh liang phial uh hi.Banghang hita leh i leitung nuntakna na en le uh cin, Pasian in na ki buanna vuah hong zawh a, ama geelna(Programe) sungah na kidiah naknak leh hamphatna a tamzia gen zawh lo hi.Laibu khat ka simna-ah Red India te khat in muvanlai tui va la hi. Akpi tawh opkhawm sakin hong keuhta a, aknote tawh tua muvanlai no zong kizui kawikawi hi.

Tangtel khawng leikha khawng zongin ki zui uh hi. Kha 6 zawh ciang tua muvanlai no pen a pi cia mah phata hi. Ni khat ni teh tua muvanlai no pen in vantung lam a ettoh leh vandum kilkel mu a, huihlak a leng muvanlaite zong mu hi. Akno khat kiangah “ka tung ka et leh vandum kilkel ka mu a, huihlakah zong vasa lian mahmah leng hi, ci hi.

Akno in “si….Laulo na hiam? Hua huihlak a leng a ham ngeungeu pen vasate kumpipa hi. Vasa khempeuhte kumpi hi. Tun zong na kikep kei leh na theihloh kalin aman hong zuan sukin nek dingin hong la man thei hi.”Tua ahihman in tua bangte peuhmah na muh ciang ki kem in” ci hi. Tua ciangin muvanlai no in” Aw ahi mah ve maw, amah pen vasate kumpi hi a, eipen akno bek hi ve hang maw,” ci hi. Tua muvanlaino pen a dam sung in pi 6 tungsiah khatvei zong lengto ngei lo hi, ci hi. Akpi zong a sanglen pen ciang pi 6 tan bek leng hi. Tua munvanlai pen a nu len hattan bek in lengin aksih in si hi, ci hi. Tua laibu gelhpa in bang nuam hiam cih leh Pasian in sangpi a leng thei ding in hong bawl lai-in bang hang in tangtel leh leikha zong lailai mawk na hiam? ci hi.

Tangtel khawng zonga a niam lam bekbek khuat maimai ding hi masa lo hi. Ute naute tuni-in hih thu kong gen ciangin a gamlapi ah pai khia pah ding ka cihna hilo hi. Ei Pasian’ Programe adingin ki hong peuh leng hong lamto lel ding hi. Ki sumh mahmah lo ding hi, cihna hi. Na pu na pa khang a na theih ngeilohte uh hong theisak dinga na pu na pa khanga lamzawh ngeilohte uh hong lamsak zo lel ding hi.

Mihingte lam Babel tausang pen Pasian in phukpaihsak hi.Ahi zongin Pasian lam ahihnak leh kuamah in phuk zo ngei lo hi. Tuni-in kha khanlawhna diktak Pasian kiang pan hong pai hi. Kha khanlawhna hong tun ciangin Pasian tawh ki buan hi hang. Ei’ deihna leh Pasian’ deihna ki buan hi. Tua deihna nam nih ki buanna ah “Topa bang leh bang leh nang khut sungah kong ki pia hi” na cih nak leh nalawhcing pah ding hi.

Salvation Army a phuankhia pa William Bott nikhat ni-in mikhat a kiangah pai hi. William aw, thuguk thuselsim khat nei ni teh” Bang hangin Pasian in nang hong zang thei hiam?na thusim hong gen in” ci hi. William in tua tangvalpa kiangah “ka thusim khat hong gen ning, nikhat ni-in William Bott pen si a, ama deihna teng khempeuh si khin hi. Jesuh deihna tawh amah ki pia hi” ci hi. Khanglamten zong hi thu ciing thei mahmah mawk uh hi.

Khanglam pan a hong pai a om teh “Thusim khat nei niteh hong gen dih in, hong ci thei mawk uh hi. A tungin ken thei loin thuguk, thusim cih ciangin na khawng a ki-imsim khat a om ding in ngaihsun kha hing. Amau’ gen nopna ah; Nang bang na cih a leh Pasian in hong zang thei hiam? bang hiam khat na hih man a Pasian in hong zang thei hi, cih thu a kan na hi gige uh hi.

Ute naute , Pasian deihna cih pen lamdang mahmah mai hi. Pasian deihna mihing kam tawh gen zawh ding hilo hi. Dr. Ngak Lian ka phawk mahmah na khat ah, aman India kumpi in kum 5 a ding geelkholhna, ahihkei leh kum 7 ading geelkholhna cih khawng nei hi. Tua geelkholhna a nasem dingin mite kituh in deih zahzah kilut ciat hi. Ahi zongin Pasian in a tawntung a ding geelna nei hi. Tua a dingin lut peuhmah leng…. ci ngei hi.

Tua bang i cih ciangin hunbit in i vekpi in pangkhawmg ni, ka cihna hi pah lo hi. Pasian deihna pen i sangkahna mun, i kumpi zum kahna mun, i nasepna mun ciat ah Pasian deihna manga teci i pan a, I Bethel mun, i Peniel mun i suahsak ciat nak leh Topa’n tua mun teekteek mahah thupha hong pia ding hi. Na nuntakna pen khanlawhna Pasian tawh hong kipan ahih nak leh a tunga i gen banginah hong piang lel ding hi.

Sawltak paul in Galati 2:20 na sung ah ” Jesuh Khris tawh ki kilhcip, kilhkhop in ka om zo a, tu a ka nuntakna pen kei’a hi nawn kei, kei ama nuntak na tawh hong leipa’ aa ka hi ta” ci hi.sawltak Paul in nuntakna a hang theilua mahmah hi.Hih ka gen laitak a kaphawk thu khat in, tu nai a Laisiangtho siam khat i lai-at ka simna ah sawltak Paul cinatna, ama damlohna pen khutme kuaih a sim ngiat ngiat dign hi leh sim theih sitset 12 val tak tawh khual a zin kawi kawi hi” ci hi. Tua tham loin Dr.Luka in zui kawikawi kei leh sawltak Paul in Khristian galhang sihna a hi(Martyr)twh si manlo ding hi, ci hi. Martyr sih a tun hun ma in a nat na ten netum man in teh, ci uh hi. Dr. Luka hangin Martyr ciang a tung thei hi, ci uh hi. Hih pen a dik a kilawm mahmah kasak khat hi.

Ute naute sawltak Paul in, a nuntakna hatlo mahmah in a om lai, haksa mahmah in a om lai hunte nangawn in zong Jesuh’ aa ka hita, ci hi. Tuni-in nang zong Jesuh’ aa na hih nak leh na nuntakna manpha ding hi. Na nuntakna ahoih suak ding hi. Hamphat na nuntakna hipah hi.Ka khualzin na ah ka muh thu khat in, Talent siamna hoih mahmah nei napi a kizang thei hetlo tam mahmah ka mukha hi.

Ka mulkim mahmah khat pen America ah kum 6 sung Laisiangtho sin in, Ph.D zong Theology tawh a lakhin, ama leitung pilna zong M.Sc a sin khin zo khat pen a mau pawlpi sungah lai-at Secretary nangawn a ngah zolo khat va mukha mawk hing. A Pastor pa kiangah ciamnuihna kawmin ” hi ci banga laisiam pilna a nei a tei mahmah khat nei napi uh cin, bang dingin zang lo mawk nai vua” ka cih leh aman”a zat in zattheih loh hi” hong ci hi.

Banghang a zattheih loh a hia, ka cih leh tulai lawpna kamin tamkham lo”ahihman in a zattheih loh hi” hong ci hi. Nitaak khat amau inn ah CBCNEI makaiteng anne dingin hong sam uh hi. Aman a zi na phin phin hihtuak hi. ka zakkik uh teh ” Nang kei theihloh kalin hih inn sung ah hua makaite anne dingin sam na hiam? Kei makai za zong ngah zolopa hong mu ding in bang hangin kei thulo in samna hiam?” cih khawng tawh a lawmnu na phinphin hih tuak hi.

Tua bek hilo in amau inn ka tun uh teh khut hong len(nohset) a tua zawh teh aman a tu note khat a kiangah koihin, zatep kawm, zu haikhat dawn kawmin a tuno tawh ki hoho uh hi. Kei hibang hing, kei zong maizum lo hing, a ci nuam hi leh ki lawm hi. Ei’ ma khom ciat in mi kisa mahmah ve hang aw……ka ci hi. Zattheihna pen pilman hilo, Laisiamna hang zong hilo, Degree ngah man bek zong hi lo hi.

Ute naute tuni-in Pasian zat i cih mite pen ama nuntakna ama’ deihna teng sisak a, Jesuh ading a ki piate, a ki piato zelte hi . Eima taksa deihna a ni ni, a hunhun in ” Nang a sikhin ta hiteh ci-in kaikhia kik a, Topa’ sungah a kipiate Topa’n zang hi”. Kha khanlawhna a tun hun ciang in amah bek in thei cih om loin mite in zong theihpih hamphatlawh, thupha ngahlawh uh hi. Hih ka gen teh ka phawk thuin Jacob kammal khat khat in ” Thupha nong piakkeileh hong khah kei ning” cih ahi hi. A khelpiguh zong ki lawi khinzo a, a khelang khat bek tawh nungta(apang) mipa hi ta hi.

A kawng hiam khatah mancip vet hikha ding hi. Thupha nong piak kei leh hong khah kei ning, na ci ngei hiam? En bel khah kha pahpah hi ve hang. An khatvei tang(Ngawl) leng hong hoih deuh tam, ci pah in en pah lian lian zaw zen hi hang. Khatvei a ki muh gawn’nading a bawlte tawh ki bang sa ing. A thau mahmah mi pawlkhat a gawn’ nadingin sinna nei uh hi. A hilhnu in 50 vei hi cih ciat ni, ci-in amai vuah sinsak hi. Khat, nih, thum, ci to to in 30 vei ciang hong tungto uh hi. 50 vei hong tun ngawngaw takuh teh a gil uh a kiam tuam hiam, ci-in amauleh amau in en suk ciat pah uh hi.

Tua ci bang a zingsang khat a 50 vei kisin man a kiamsuk pah henhan ding hipah sam lo hi.Tua mah bangin an khat vei ngolhna khawng tawh piangthak pah tammaw, cih pen tom lua mahmah sam hi. Tua bang ziahziah a piang ding hi leh thu tom nget lua mahmah ding hiteh. Ta 5 nei-in an 5 vei ngawl le teh a vekpi un piangthak khin ding uh hi. Tua zawh teh ngawl nawn het lo ding na hih teh, ci-in Topa in kum 5 zawh teh khat khawng hong pia pan hi mai thei hi. Tua pen na ngolh tohtoh na ding a hi hi. Ei pawl bel thupha khawng hong pia leh kisathei lua pha ding i hih ciang a Topa in a khakna mek to to hi mai thei hi.

Spurgeon in a genna ah “Topa buan i cihpen baihlo hi, mi na buan a, a hih leh na gim ding hi.Na khua-ul zong kai ding hi” ci hi. Topa Jesuh in Pasian deihna leh ama deihna Gethsemany huan sung ah a ki buansak ni-in si dektak in ka dah hi , ci hi. Pumpi pen gim hi, khual-ul kai bek loin sisan nangawn tawh ki hel hi.Pasian buak taktak a, a kizosakmite’n ” Topa aw tun bangbang hita leh nang deihna bang hita hen” ci ta uh hi. Ka behpa Sia Lam Cin Thang Laisiangtho sangkah dingin India gamah hong paito a, ” Topa aw ka sang luttheih na ding kei deihna hiphot hen la, tua zawh teh nang deihna bang hi hen!” ci hi.

Kawlgam pan a kah lian dinga hong hi in a Laisiangtho sang zong tung khin zo hinapi sang luttheih nang muzo lo in kilehkik ding hita hi. A nasepna teng zong pawlpi pan lah khawlkhin ta, a kik hi mawk leh a sum neih teng tawh zong hong kuan himawk ahih manin ngah kei in kileh kik leh sumh lua kha ding hi. Tua ahih manin Topa nang deihna bang hita hen a cih pen lau lua mahmah ahihman in, Topa aw sang luttheih bek kei deihna bang hita hen,” ci hi.

Nipikal nih sung luttheihna ngah zo loin thu ngengen a, sanginn maiah giak hi. Ama hong genna ah zan khat hih lai ah a kei a hai banga bang hih ka hiam? Mi’n hong deih hetlo a kei om tentan cihmawk pen Pasian in hong deihsak leh kihong in teh, hong deihsak kei leh zong phamawh kei, tun zong kapai tohtohna ah thugen toto lel ning, ka cih leh a zingsang teh sang lutnang muta ciai hong pai-in , ki cimawk hi” ci hi. Ei pen kihat lua mawk hi.

A tung a pat in Topa ka muh leh pha, ka muh kei leh pha, nangma thuthu ci ziau leh bel musuk pah khamai thei ding hi. Ahih bang a muh ding pen kei’thu hi phot hen, tung lam a Pa thu hi nai kei hen, cih himawk hi. Ei zong i thulian thei mahmah mawk sam hi. Nungak tangval pawlkhatte bangin a zi a pasal ding uh a mau’ deih ahih khakloh ding lau in Pasian kiangah nupa kikal vai ding thunge ngam lophial uh hi.Topa ka pasal ding pen nang deih bangbang a cih ding uh pen a hoih hetlo khat a ngah kha ding kisa gige uh hi. Nang deih bangbang hong pia in ci leng a hoih hetlo, i teel hetloh khat hong pia kha zen zen leh, ci uh hi.

Ute naute na theih mahmah ding uh in nungak tangvalten amau deihna bangin teel a, a kapkap mi tam zaw hi. Pasian deihna teelna in haksatna omlo cihna hi zenzen lo hi. Pasian deihna i teel leh gimpih hun zong om ve ve ding hi. Jesuh in a Pa deihna a teel pen sihpih hi. Tuni-in Pasian deihna na teel manin nuampah henhan in teh, cihna hilo hi. Ahi zongin Topa deihna na teel peuhmah leh ama minthan nading a teel na hihmanin aman hong huh dinga haksa taleh nopna gualzawhna na ngah veve ding hi. Khangno te aw, Pasian lawmlawm in nang hong tuaci khelbawl dingin um na hiam?

Nang pen amah sangin a pilzaw na kisak khak man a nang thu naklut lua in kei teel mah hi hen la, tua ka cihcih pen tawh ki teng khinleng tua zawh teh aman ko nupa thupha hong pia leh cihbek a deih himawk hihang. Thupha pia ding bekin Pasian i deih leh thupha ngah taktak zolo ding hihang.Topa in Jacob a kilaina munah thupha pia pah hi. Jacob pen a zingciangin a khebaisa in pai pah hi. A bai ngeilopa, a zanni a bai nai lo pa, hong baita mawk a hih ciangin miten mu in Pasian in lawng hi, Cih pen ki tel lua mahmah hi. Ama adingin kitellua ahih ciang AW….. Jacob a pianpih hi het lo hi ven, bang thu a hitam maw….. Jacob pen Pasian in a lawn taktak manin a nuntakna ah khebaisa in paikhia hi.

Ute naute aw i nuntakna ah Pasian in hong lawn taktak a hong nuntak kiksak naknak leh miten hong thei ding hi. Miten hong muhpih ding uh hi. Miten amah pen Pasian’ kha teenna mi hi, hong ci ding uh hi. Assam Centenial ah June kha in thului(Article) khat ka gelh hi. Tua a kigelh article te lak ah bang om hiam? cih leh limsuaih siam mahmah Michael Angelos i leitungbup limsuaih siam kidemna a limsuaihna zia ki suaksak hi. Limsuaih siam cih ciangin suangtum khawng milim suaksak thei uh hi. Michael in a minthangpih mahmah tuni donga a minthangpih khat om hi. Tua a limsuaih pen David kici lim ahi hi. Suangtumlianpi khat gei a ki koih, a khua miten zong deihlo a, a zat nang uh zong a theihloh khat om hi.

Tua pen mizawng mahmah Michael in tua suangtum ki paaipen a bekbek in lakhia a, a lakkhiat zawh ciangin leitungbup a minthanlawh David lim suaksak hi. Tua hangin amah pen mi hau mah mah hong suaka, London a limsuaihna ah amah zong kidem ding in sam uh a, tua mun pan zong leutungbupah minthanna a hoih pen ngah hi.Michael pen a laivuanna vuah hibang in thu ki dong hi. Tua suangtumpi David lim in suai in, a mel a sa, a silh a teen khawng nazep lai-in haksa nasa hiam?ci uh hi. A dawnkikna hoih mahmah hi.Tua suangtum ki paai mi deih loh kamuh phet in ah David lim mu khinzo ing. A suangtum nu lo in David mu ing. A dang a kisam lo teng bek ka hahsianga ka paaikhia hi. ” Tua akisam loteng ka hahsiang khitteh David lim hong suak hi lel hi” ci hi.

Tuhun in zong nang zong a ki paaikhia suangtum leltak na hi a, Pasian in aman tam penpen hong suak nuam in, Khasiangtho in a kisam loteng hong sui sui hi.Na nuntakna ah nang hong et ciang in mantam hi teh. Nang hong et ciangin zattheih ding hi teh. Nang hong deih hi. Nang hong et ciangin zattheih David lim mu hi. Nang hong et ciangin Josef lim mu hi. Nang hong et ciangin Esther lim mu hi.

Pasian zattheih loh ding teng hong paaikhia a hong suihlaitak in ” Topa nang deihbang hita hen, kei a ding a kisam loteng lakhia in, Paaikhia in, kei na zattheih ding in hong seek in” ci leng nuntakna manpha suak ding hi hang.Tuni-in nang tua bang na cu nuam hia?Suangtum tunga a kisam loteng suangginalo tampi ten nang hong giksak hong melsiasak uh hi. Tua manin Topa kiangah, ” Topa hong suikhia in, hong hahsiang in, Nang deihna lim leh mel bang ka puak theih na ding in ka kiphal hi, ” Ci-in ki ap ciat ni.

THUNGET SAPNA

Khanlawhna Topa kiangpan hong pai hi. Ama thu hanga hong pai hi. Khat veivei ei deihna in Pasian deihna zomawk ahihman in thupha kingah thei lohi.Ahi zongin ama deihna zui peuh leng thupha ngahna mun suak pah hi. Topa in nang hong sui nuamhi. Nang hong zeem nuam hi. Nang hong et ciangin a manpha lim leh mel mu hi. Akisam loteng suikhia nuam hi. Tuni’n na kiphal hiam?

HON THUNGETNA

Topa tuni-in hong suikhia in. Hih mun hong hahsiang in . Ka nuntakna hong langkhia sak in. Na vangliatna tawh hong tuam in. Lungdam ung Topa.

THUNGET KHAK NA

Topa nangma lim leh mel ka sutlohna khempeuh uh, nang ma deihna ka dalna mun, nangma cih thute ka man zawhlohna munte uh nangman hong hahsiangthosakin la hong paihkhiatsak in. Ko nong et ciangin amanpha mahmah na muh pen mah hong kilangsak in. Nang adingin amanpha sem a, bel siangtho akizahtak nasepna a kizang ding beel ka suah theih nadingun hong hahsiangsak in. Kanuntak na uh tua thupha mah tawh hong tuam inla, nangma zat dingin tuni-in Jacob pen Peniel munah thupha napiak bangin komau’ Peniel ciat muhah thupha hong pia ta in. Nang tungah nong hehpihna sate hangin lungdamna ko in, hi teng khempeuh hong tan Jesuh Khris Minin kong thuum uh hi. Amen! Rev. Dr. Ngul Khan Pau