December leh Khup’ nuntakna ~ Sia Do Khup

December leh Khup’ nuntakna ~ Sia Do Khup

Mihing a ka pian kha hi. 1990, December Pianthak kum hi a, degree neite bekin Pasian na a sem ding sa ka hih manin cinatna tawh Topa in thu hong hilhin hong sam teitei hi. Damkaang phet mah ciangkhut khun sain Gospel ka pai hi.

PUAN NGET KHA

Vanglai khua ah Sia Nangtawng puan ka ngen a, kum 31 sung Topa nasepna ah puanak nget, a patna leh a tawpna hipah hi. Khan tawntung Topa’ nasem dingin khensat kum leh kha hi.

SINGGIAL AH JESU NAUSIA CI

Upa Gotawng in lungdambawl la bawng go, tua lai huna khangham ten December 24 ni zan 12 lian a Topa Jesu a suak hi, ci uh a, zan 12 lian a thunget pen um deuh uh hi.

Nitak kikhop man ciangin ko seidei lam pan ka numeite uh khawl theiloin zan 12 dong kamtuam pausuak mawk uh hi.

Zan 12 thunget a thupisak papi pawlkhat in nawngkai sa uh ahih manin inntung kikhopna panin a innnuai ah seidei teng sawnsuk gawp uh hi. “No hangin Jesu tolh (nausia) hi” ci helzen khe zezen uh hi.

Tua thu teng kei kiangah hong gen kik uh ciangin seidei numeite ei pau tawh pau thei nawn loin kamtuam bek tawh hong gen uh a kamtuam pen kihona pau-in ka zang thei uh hi.

Seidei tengin midangte nawngkaisak kei ni, ci-in khuakhung a biakinn ah thu ka ngen uh hi. Upa Sentate’ inn ah zanpi-in Kawltu ka khiak uh a, kamtuam bekbek tawh ka ho thei ciat uh hi. Zingsang khuavak ciangin kamtuam pen kihona pau-in ka zang thei nawn kei uh hi. Tua inn nei upa Senta suan leh khakte tuin thupha sang mahmah uh hi.

KHUAPI AH HONG KISAM

1993 December Kalaymyo Emmanuel leh Tonzang Tuiphum ah cialpi bawl, Kansau inn 7 pan khuapi ah hong kisam hi.

1993 DECEMBER LAWHCINNA

Sia Haupu (Rev. En Khan Hau) in “Sia Khup necktie thuah ni” ci-in ama a khat hong pia a, khih theilo ka hih manin hong khihsak pah lel hi.Necktie ka thuah hangin Taihkhedap neilo kahih manin Kawlkhedap sawngkauh tawh ka kilawm mahmah hi.

Kikhop man ciangin Sia Khen (Evan.Thang Khan Khen) in ama taihkhedap a taih (nawt) san kilkel suahkhia-in biakinn sungah hong bulhsak pah hi. Kikhop ma hileh hoih ngel ding hi a.

Mawza lopi khe guak tawh bulh ka hih manin uih mahmah hi. Kansau tuikuang zawn ah Kabawleih satpiang tawh ka sawp a, nisa ah ka pho keu hi. A gamh ciang bel khauh geugau zawzen. “Savun khedap tui tawh a sawp masa pa” cih pahtawina hong pia un maw.

1993 DECEMBER TONZANG THUPIANG

TTBA G/S a sem Sia Kap Mang in “Kei nong it hiam?” cih Topa hopihna za a, a sih dong Topa adingin citak mahmah hi. Pastor Khan Cing in “Kha Siangtho puksak hi kei na sawn puk uh hi” ci se hi. Kha Siangtho in amah mai puksak ahih manin a muk tat bawk neunau, nungak melhoih nop lailai-in muk bawk sain kikhawm den, Kha daan tuak hi.

Rev. Vial Nang’ zi kiangah thungen dingin pai, a khuadam lua ling keuhkeuh “Topa aw puanlum na guan in” ka cih leh “Hihte thunget tadih ding hilo nang a pia lecin lum pah ding” cih hopihna ngah, puanlum neihsun suahkhia pia pah. (Gamnuam Christian Home neipa Rev. Pau Khaw Lian hong piak khat bek ka neih Suaita (Sweeter))

Sia Vial Nangte inn panin khualai lam inn khatah pai, khat hai, khat pau theilo unaute mu, puanak kang sitset neih sunsun pia leuleu. (Emmanuel upa Thawng Khaw Go in hong piak hi a, “pulpit puan nei ta” ci a nuam man peuhmah hiveng, Kansau tun zolo)

Tua ni zingsangin suaita leh puanak pai mawk ahih manin Tonzang khua lai-ah puantungsilh anghui kawmin zin lam zuan. (Puantungsilh pen Lamzang tate, En Thawn a ka kawm hi a, angkilh om lo hi.)

LIPO PEN ZU SA MAI

U Suan Cing (Yn, FGA, Rev. Zelpi’ Nu) in lipo maanhai tawh hong pia, naipak kilkel, zu sa dawn nuam pak lo, hong sawl teitei ahih manin ana’-na tawh dawn, “Muiciai kha leng maw” ci patau, lung-am sam lo aih ciang lungnuam kik. Khuata mipa ka cih tuate hi, tuadan gen ding tam lua himai.

KA U GAL TEN THAT

“Amaute’ mit panin khitui khempeuh nulsak ding hi. …MAANGMUHNA 21:4 1993 cialpi tawpni-in hih LST gen ding hong suak a, mipi lawpsak mahmah ding ci-in ka gen kal ka ngaklah mahmah hi. Ahi zongin ka gen taktak ciangin ka khitui hong luang mawk a lamdang ka sa hi.

Tua zanin ka unau sung uah ka ngaih penpen ka U Laang Suan Maishu ah gal ten hong thahsak mawk uh hi. Sinlai gubang hong zen December ahi hi.

SINGDANG VANGKHUA AH

Cialpi bawl zawh kum 31 sungah ka hat mahmah hun, a beisa kum 25 hun sung pen Christmas leh Christiante ni thupini teng mundangah ka zang den zaw hi. Hun thupite ah thugen dingin hong kisam kawikawi hi. 25 pan 31 kikal bel pumpi hat nawnlohna hangin innkuan tawh ka zat hun tamzaw ta hi.

TAWPNA GEN NOP

Covid 19 tawh a si ding kimlai nuntakna hong pia a Sweet December hong zangsak kik Topa tungah lungdamna lianpi ka ko hi. “Topa aw, nang a dingin kong nungta ding a, nang a’ ding bekbekin kong nungta ding hi. Ka ci hong damsakkik inla, hong nungtasak in!” ISAIAH 38:16 TDB

SI DING KIMLAI

“Kei ka si kei ding a, ka hing ding hi. Topa’ sepnate ka gengen ding hi.” ‭‭Late‬ ‭118:17‬ ‭TDB‬‬ Covid 19 hangin ka gim mahmah ngei a, sih leh hin kitello dinmun ka tung ngei hi. Ahi zongin huhna nasep i sem teitei a, Topa in hong hehpih ahih manin damna hong pia hi.

SUAHNI DAWN NADING

December 24 ka suah ni, dawn thei dinga hinna hong pia Topa tungah lungkohna pawi bawl nading thupha hong lut ziahziah ta hi.

USA panin Sia Do Khup’ lawmte in bawng khat lei zawh nading hong khak khin uh a, Kawlgam kiu khat a om Kha tate ahi, Sia Cin Thang & Lunbawi leh Singapore a om hong huh den Lia Julia Ciin-te in zong gan luang khat ciat lei zawh nading hong khak khin uh hi.

KHITUITE NUNG AH

Ka ute Langh Kap leh Rev. Cin Mung, ka u tapa Thang Khup in Covid 19 tawh hong nusia uh a unau ka tawm mahmah ta uh hi. Ka u Pau tapa khat neihsun Hawm Lian in i gam adingin hong beisan lai hi.

Pasian naseppih tampi leh Zomi tampi in hong beisan ahih manin khitui tampi luang hi. Tuate nungah hih hun manpha hong pia Topa tungah ka lungdam lua hi.

A ITHUAI MITE TUNGAH

A it huai mite tungah ka kum zah zui-in thupha dawhin hong vaksak kawikawi Topa hehpihna i phat hi. Tukal bel Suih & Friends-te a a kipan thupha hawmin nisim a hong vakkhia zosak Topa hehpihna phat loin i om thei kei hi. ~ Sia Do Khup