Macau khuasung ah Typhoon Hato huihpi hangin mi 3 si, 84 liam

Macau khuasung ah Typhoon Hato huihpi hangin mi 3 si, 84 liam

Macau khuasungteng tuni Wednesday ni in Typhoon huihpi in nawkgawp ahih manin mi 3 bangin sihlawhkhin cih AFP pan kiza hi. Tua Typhoon huihpi pen “Typhoon Hato” ci’n amin kivawh a, leitung ah Game kimawlna khuaminthang “Gambling Hub of Macau” khuasung pen limnawk mahmah ahih manin, innsia losia zong tampitak om hi.

Macau khuasung bekthamlo, agallam aom Hong Kong khuasungteng zong tuni Typhoon Hato in nawkgawp hi.

Local Media aki khahkhia te genna leh Video Clip te ah hih Typhoon Hato huihpi hangin mawtaw te tuipi sungah kilawngawp in, khuasung lamzikpi tungahzong tui dimpikpek hi.

Macau Government te genkhiatna ah asi mi 3 tepen kum 30 panin kum 65 gualpawl ci uhhi. Tuaban ah adangzong mi 2 bang mangthangciplai cih kiza hi. Asi pasal khatpa pen Typhoon Hato huihpi in anawk ciangin inn kicimsuk in dengkha in asi cihi. Adang khatpen inntung inndawl 4 na panin kiasuk in asi cihi. Athumna asipa pen Chinese Tourist khat hi a, Truck mawtawpi in nawkkha in asi cihi.

Apple Daily te’n Video akhahkhiatna ah nidangin mawtaw lampi in akizang khuasung lampi te ah tui dimcip in, mi pawlkhat tuitung ah zaam uhhi. Pawlkhat pen huihpi khauhlua mahmah ahih manin huihlak ah lenggawpliang uhhi.

Video: Three dead in Macau as Typhoon Hato smashes casino enclave

Macau khuapi sungah Electric Power ngahnawnlo ahih manin, Air-con te kizangtheilo, meivak gina omlo in ki cimawh mahmah hi ci’n khatin genkhia hi.

Khuasung kikawmna leilam, tuilam, vanlam “Air, Ground, Sea” avek in kikhakcip in, Macau khuasung ah khualzin Tourist tezong awkcip uhhi.

International Airport tuamtuam panin Macau City zuanding vanleng zong akigawm in 50 Flights bang ki Cancel khinta cihi. Dawnding tuisiang takpi zong agina in omlo ahih manin, khuasung mipi te cimawh mahmah uh cih kiza hi.

Related: Taiwan gamsung Typhoon huihpi in nawkgawp, mi 80 val liam

Typhoon Hato hangin Macau City ah asi mi 3, aliam mi 84, cimawh dongtuak in Shelter ah aom mi 280 phakhinta hi ci’n Government te’n genkhia uhhi. Sawltak #zomidaily