Lungsimthu – Lungsimtawng

Lungsimthu – Lungsimtawng

Lungsim thu ih cih pen khemna tawh kidim a, lungsimtawng (conscience) ih cih pen theihna tawh kidim hi. Mihingte ih na khat peuhpeuh ih lungsim thu hi ci uh hi. A maanna ciang zong om mah ding hi. Ahi zongin tua lungsimthu in na hun tawp ni ciangin gupna le khamuanna hong pia zo lo ding hi. Lungsim thu in zingciang thu masuan tawntung ahih manin a theih loh kalin hun in amah a gugu ahi hi (Procrastination). Lungsim thu in a sih ma teitei in gupna ngah man ngap sak mahmah hi. Lungsimthu in geelgeel sam a, ahi zongin lungsimtawng pen tu hithiat hi. Tua daante pen geelgeel tu gipgiap kici hi.

Lungsimtawng ih cih pen tulaitak thu tawh kisai ahi hi.Tu laitak mahin Lai Siangtho simsim mi, thu ngenngen mi, la sasa mi, kikhawm khawm mi, mizawngte a hehpih mi, Pasian’ min tawh nahoih a sem mi, a kiniamkhiat mi, nisim nuntakna ah a etteh tak mi le khamangthang vei mi na hih kei leh lungsimthu in na nat na sat lup mun tungah khamuanna hong guan zo het lo dinga, na sih ding hun nunung adingin gupkhiatna lungsimthu tawh na ngah ziau thei kei ding hi. Khrih upna sungah kibup-apna pen lungsimtawng ahi hi. Leitungah nitang khuavak, awging le thautang sangin a manlang zaw khat om a tua pen mihing lungsimthu ahi hi.

Lungsimthu ih cih pen a khem hat mahmah hi. “Na khempeuh lakah lungsim mah a khem hatpen hi a, a kisia pha mahmah ahi hi. Kua in lungsim thei zo ding ahi hiam?” (Jeremiah 17:9). Lampi ah mi khat tawh kituakin a mu lo ih kineih ziau pen lungsimthu hi a, ahi zongin a mu taktak na hihna pen lungsimtawng hi. Tua ahih manin Lai Siangtho sungah “Amau’ lungsimtawng mahmah amaute adingin tetti hi ding” na ci hi (Romans. 2:15). Their conscience also bear witness. Lungsimthu in “ken thei kha keng e” a cih nop hangin Lungsimtawngin “na keel luphum hong kilang ding” na ci hi.

Gennop bulpi in, lungsimthu pen kineihna hi a, lungsimtawng pen kitheihna hi. Jesuh’ ong tatkhiatna Singlamteh Lungdamna thu hangin khamuanna a nei lo mi khat a zi a ta a pasal a sih ciangin a lungsimthu tawh khitui luang het lo dingin a kineih teta hangin tua kineihna in a lungsimtawng ah hehnepna taktak guan zo lo ding hi. Mihingte in a lungsimthu uh tawh a sih ma un hotkhiatna ngah ngap mahmah uh hi. Ahi zongin Lai Siangtho sungah tu mahmah in na lungsimtawng tawh Jesuh Khrih ong tatkhiatna Singlamteh upna sungah hehpihna hanga upna bek tawh diktang mi na hihna na nuntakpih kei leh tua lungsimthu in hong gum zo lo ding hi, na ci hi. Lungsimthu pen kineihna hi a, lungsimtawng pen kitheihna hi.

Evan. Suang Dal