Lungsim paipi nam 4 ~ Thawn Tuang

Lungsim paipi nam 4 ~ Thawn Tuang

Greek mipil ten mihing lungsim a tangpi in nam 4 bek in na khen uh hi. Tua nam 4 tengah a nuai bangin ih sut suk ding hi. Ei leh ei zong ki theih ding ban-ah ki pawlna makai ding, tanu ding, sum kem dingte ih teel ciang hong huhzo kha ding hi.

Khatna : Choleric ci uhhi. Lungsim khauh mahmah te ahihi. Na khat peuhpeuh sin ngamtak, laulo takin sem ngiap ngiap ngam uhhi cihi. Lai Siangtho sunga Joshua cihte, Paul cihte dan hi. A hoihlo lamin gen leng amau mahmah ki that ngam zah dongin lungsim khauh neih uhhi. A hoih lamin cileng a sepna peuhvuah matunlo pi in khawllo in, sem taktak lel, laisim ahihleh zong a tawp dong sim cih dante hi.

Nihna : Melancholic ci uhhi. Amah leh amah ki muang ngammel lo, tua ci kha leh cih lungsim neih mi hi cihi. Lai Siangtho sunga Moses dan hi. Thuhoih semding omleh amah bek in sem ngam pahlo cihdante hi. Lai asimteh hoihmah veh aw.. zuileng bang ka ci tam ci-in ai a sansante cihna hi.

Thumna : Sanguine ci uhhi. A lungsim a manlang mahmah te hi. Ngaihsun siamin gamta zalzal, pau zalzal cihte hi. Lai Siangtho sunga Peter dan pawl hi. Lung hi mawh baih in, uk zong hau hi cihi. Ki pawlna sungah hih dan mikhat aom keileh a ki sam khat omleh ki lawm kicici hi. A kamtam thei, ahi zuaizuai mi ki sam veve hi.

A li na : Phlegmatic ci uhhi. Dai tak in om hit hiat hi. Ahi hangin thulah manglo, thulah nial sese lo cih mite hi. Tawl dam tak in om kingkeng lel cihte hi. Awl mawh luat haulo cihdan mite hi.

Hih a tunga teng pen a pai pongpi etna hi aa, ki pawlna khempeuh ah amau mun ciat bangin ngah leh semtoh hong suahleh a vekpi mahin bucing sak in, thunam tui hong suak pan hi. Amau mun lopi khat a ngah uhteh buaina piang thei hi. Amau adingin zong van gik khat suak thei hi. Ei lungsim puakzia theilopi-in midangah peuh ut pong mawk cihzong gimna namkhat hizel hi. Lungdam, Thawn Tuang (April 16,2015)