Lungnopna koi ah omhiam?

Lungnopna koi ah omhiam?

Khatvei sahangno keukeu khat in anu khiangah ” Nu aw lungnopna koiah om mawk hiam?” ciin dong hi. Anu in “Lungnopna maw, lungnopna na mei dawnah om veh e” ciin na dawngkik ziau hi. Tuani zingsanga kipan nitaak nitum dongin sahangno in amei dawn a Lungnopna pen lak sawm in delh niloh hi. Anu in amuh ciangin “Bawino aw, lungnopna na ngahnop takpi leh tua bangin delh thapaai keizaw inla, hoih takin na mailam nawt peuh lecin na meidawn a Lungnopna in nang hong nungzuih tawntung lel ding hi” cihiat hi.

A hoih mahmah Pengpelep pen na delhdelh leh na pha zo ngei kei ding hi. Phak gen loh tua Pengpelep ii hoihna na gaalmu niloh dinga, na lunggulhna khangsak semsem zaw ding hi. Na deih takpi leh munkhat ah khawl hit-hiat lel lecin asawt lo in tua Pengpelep pen na liangko tungah hong tu liauliau ding hi.

Himah lo maw guaite!

a) Numeite pen hoih na sak man in a It na hi kei a, na It manin hoih asa na hizaw hi.
b) Itna tangthu khempeuh a zaaknop lo khat zong om lo a, ahizongin nang leh kei ih ki Itna tangthu sanga zaaknop ka sak zawk khat zong om lo hi.
c) Itna icih in khiatna nei takpi ahileh nang tung pan a ka zaak kamkhum awmnemte, nong khualna nong deihsakna, nong kepcing denna leh nong kawina khut te hikha dingin ka ummawh hi.
d) Kong It luat khat na hihna tawh ka kicinlahna tuamtuam… hehtheihna, lungkham sinkhamna, khatsiatna, ka thanemna leh ka lungnop ka dahni cianga hong luang khia ka Khituite hong musak ngam bek ka hihi. ((()))

Ciam teh hamtang in! (Cimphawng)

a) Pilna leh haina a kilamdanna khat bek om hi. Pilna in mong nei a, haina in mong nei lo hi….
b) Thugen siam icihte’n thu a gen uciang in tulai numeite’ niikten tawh kibangsak thei uh hi. A thupitna mun teng seel napi, a kimu thei tengin mihingte lawpna khanglo sak thei veve hi…
c) Cidam ding lunggulh takpi na hileh na neek nop loh teng ne inla, na dawn nop loh teng dawn inla, na sep nop loh teng sem in…..
d) Kei aa ding in TV et hun pen pilna ka ngahna hun hi citciat hi. Bang hang hiam cileh ka lawmte’n TV a et laitak un mundaihna khat ah ka kihem khia a laibu ka sim hit-hiat lel
hi….
e)Numeite pen Phone tawh kibang uh a, lenden in na holimpih nuam hi. Ahizongin tualai tak meek loh dingpi khat na meek khak zenzen leh hong mit pah lianse uh hi….
g) Mi khempeuh ka it a, ka ngai mahmah hi. Pawlkhat te bang pen suih ding bet ding in ka iplah mahmah hi, ahizongin ahua ka hikei hi. ((()))))

Zo Sunni pa’n Itna tawh,

Francis Lamthang ( Zomi Quavadis)

I am just a sinner saved by Grace.When I stood condemned to death, He took my place. Now I live and breathe in freedom with each breath of life I take. I am loved and forgiven, back with the living, I am just a sinner saved by Grace…