Pastor te gamdang zinna vai ~ Lian Tuang

Pastor te gamdang zinna vai ~ Lian Tuang

Tulaitak pen Pastorte gampua zinna tawh kisai thu kigen tuamtuam ong om pianpian ahih manin ken zong ka ngaihsutna tawm ong sung nuam ing. Nuntak hamsatna hangin lampi tuamtuam tawh gamdang mundang kizin ngeingai ciat hi. Kei mahmah zong Tan 10 ka zawh phet in kumpi zum khat ah nitha tawh nasep kipanin innpan a zinkhia suak vingveng khat ka hi hi. Ut leh ut loh thu hi loin seploh a phamawh thu hi a, muh bangbang a kisem hi lel hi.

Nitha tawh nasem ka pai kawikawi na ah Tamu ka om sungin ka naseppih kawlte khat in “ No, Zomite gamdang pai uk taktak uh teh mate” ong ci laizang hi. Ka dawnkik nading thei pak loin “ he” ka ci pong hi.

Kikhangto zaw

Gamdang pai theihna lampi ong kihon ban ah gam kikhelnate hangin mipite I nisim nuntakzia pen a beisa hunte sangin tampi noptuamzaw ta hi hang. I sum muhzia kikhel in I nuntakzia zong ong kikhel toto hi.

Abeisa hun lai in I vekpi in hamsa sa kim I hih manin I nuntakzia zong kibang pianpian khin hi. Ahi zongin mipite sung panin a zongzo agelzo le gamdang paizo zawdeuh khat le nih ong om ciangin amaute innkuan sung le u leh nau sungah noptuamna khantohna kikhelna tampi ong om to hanhan hi.

A nik a puan uh pak zawdeuh a, a nek a dawn uh zong limci zawdeuh pah hi. Neih le lam zong kibeh laplap hi. Gtn: Phone, cycle, inn le lo, …, . Ahi zongin summuhzia le nuntakzia a kikhel lualo bangkua zong pawlkhat ki om veve hi. Tua lakah I Pastor pawlkhat zong a kihel ahi hi.

Pawlpi hau

Mimal in i sum muhzia a kikhel ciangin kim le pam leh pawlpi sung mahmah ah kikhelna kinoptuamna tampi ong om hi. Akimu thei pen ah I sumpite zong ong khang hanhan hi.Sumpi a kikhol pian ciangin biakinn le pawlpi inn ding, pawlpi van ding vive kihanciam pian ngeingai hi. Van kileilei Inn kilamlam hi mai hi.

Kikhello

I gen sa mah bangin khuahun zui leh summuhzia le pawlpi sumlut a kikhel mah bangin nopna dahna ah sum a kitawi ciangin abei sa hun in 100, 200 ks bang a, tu in 1000, 2000 ks bang kitawi ta hi. Sumlutzia a kikhellote adingin ong hamsa pianpian hi.

Silh le ten, nek le dawn zong mi zat dan khat na om gige bek tham loin, telepone, cycle leh hunthak van le nate neih ding a kisam pawlkhat ong om lailai hi. Kim le pam in nei khin mah taleh sumlut kikhellualote adingin ong hamsa semsem hi.

Ka theihkhialh keileh pawlpi a tamzaw in siate bek thaman kiguai a, siate innkuanpihte ading bangmah ki etpihzo phalo hi. Ka theih tunga kipan tudong mah ahi hi. Inn papi pen bang Pastor hi zenzen leh abuaihuai mahmah ding na hi mawk hi. Innvengte tate in nik hoih puanhoih a neih ni pen siate lunglen ni peuh ahi ding na hi mawk hi.

Lampi khat

Ahuampi in kikhelna leh khantohna ong om ciangin kim le pam tawh kibangin amau innkuan a khantoh theihna dingin I Siate in zong a vaihawm loh phamawh ta hi. Mite sang ahoihzaw ahi zo kei zongin mi neih bangbang mi nek bangbang ciang hanciam loh phamawh ta hi. Tua bangciang hi zo keileh a innkuampihte mi lakah maineu dinga, mipite mahmah in zong zahtak lo lailai ding hi.

Tua ahih manin I Pastor pawlkhat gamdang a om u le nau lehpawlpi mite kiang hawh kawm, innkuan sung noptuamna om ding zong lunggulh kawm, khuamuhna thutheihna kibehlapna ding zong lunggulh kawm cih bangin a kizin khia ahi dingin ka lamen hi.

Tua ahih ciangin Siate gamdang a lim zinna pen tu hun I pawlpi le I siate kizopzia dinmun ong lak thukhat ahi zaw diam ci in ka ngaihsun hi.

Inn nupi khat

Innsung ah nek le dawn ding a cingin a om hileh inn nasep nusia liangin inn nupi khat nektawm ding thalawhin vaikuan lo ding hi. Pawlpi hauhna pen sia ten a nop tuampih hiam. Pawlpi tungtawn in siate bangkua sungah nuntak khuasakzia khantohna a om hiam. Sumpi khantohna dungzui in Siate sumlutna a khang hiam. Kim le pam kikhelna dung a zuizo dingin pawlpi in siate a en zo hiam. Pawlpi le siate kizopzia a cidam takpi hiam cih pawlpite le mimal kim in ei le ei I ki et kik ding lunggulh huai ka sa hi.

Zatsiam ding

Siate gamdang a limzin pen hoih le hoihlo cih a gen nuam hi lo zaw in, bang hang zin hiam cih a gen nuam I hi hi. Ahang tampi lakah a neuno khat hi pan dingin ka um hi.

Tamu ka om lai a ka lawm Kawl ten “ No, gamdang pai uk taktak uh teh mate” ong cih laitak in ka lungsim sungah “ ut le utloh thu hi loin pailoh a phamawh hi ven” ci in kei le kei ka kidawng hi. Pastorte zinna thute zong tua tawh a kibang dekdek dingin ka lamen hi. Tua ahih manin Pastorte khualzinna pen pawlpi le mimal ei le ei ki-etkikna dingin zang thei leng khanthohna lianpi khat a piang thei ding thu hi ci in ka lamen hi. (13/9/2017) Lian Tuang