Yangon khuasung huihpi leh guahpi in nawkin tui kivung kawikawi

Yangon khuasung huihpi leh guahpi in nawkin tui kivung kawikawi

Myanmar, Yangon khuapi sungah zanni Tuesday ni in huihpi leh guahpi kithuah in nawkgawp a, lamzikpi te ah tui dimzihziah hi. Myanmar gamsung ah khuahun paizia a encik ahi Department of Meteorology and Hydrology te’n agenkhiatna ah huihnunhun “Pre-monsoon Period” alutta ahih manin, hihbangin huihpi guahpi in anawk hi ci’n genkhia uhhi.

Tuaban ah hihbangdan huihpi guahpi “Thunderstorms” tepen Myanmar gambup ah omthei zelzel khading a, sunlam ahih keileh nitaklam cihbangin om omthei phadiakding hi ci’n Weather Bureau te’n genkhia uhhi.

Tuaban ah vandawn ah meiipi aomzia aki etciangin “cumulonimbus clouds” bangdan ahih manin khuaphelep zong omthei in kekkia zelzelding ci uhhi.

Tua ahih manin huihpi leh guahsia kithuahkawm in, khuaphelep omthei in kekkiading ahih manin, khuahun pen lauhuaithei, Tornado huihpi ahih keileh Thunder Strikes te’n nawkthei dinghi ci’n Meteorology and Hydrology Department te’n genkhia uhhi.

Department of Meteorology and Hydrology panin Director asemlaitak ahi U Kyaw Lwin Oo in agenna ah “cumulonimbus clouds” kici meiipi pen tubanghun te ah omnuam phadiak hi. Tua ahih manin, April leh May khasungpen huihpi guahpi in hongnawk khading hi ci’n genkhia hi.

Yangon ah zanni Tuesday nitaklam 3 o’clock hunin guahtui atamna pen letmat 0.12 phahi ci’n Kabaaye Weather Station te’n genkhia uhhi.

More: Yangon – Mandalay lamzikpi tungah 2017 kumsung Accident 555 veipiang, mi 116 si

Abeisa 2016 kumsung inzong April khapan kipan 2016 kumbeidong kekkia in adenlupkhak mi 59 tak pha hi. 2017 kum ciangin April leh August kikal kekkia in adenlup pen mi 80 phato leuleu hi. Tuaban ah aliamzong mi 25 bang phahi ci’n Department of Relief and Resettlement te’n ciaptehna nei uhhi.

Abeisa kumtawlkhatsung Monsoon Season atun madeuhleh akhenkhitdeuh hunsungte ah kek kianuam phadiak cihi. Sawltak #zomidaily