A lungngaih huai kum 70 Zomi Namni; 71th Union Day
Dear U leh nau teng, Tukum 70th kumcin Zomi Namni, Tuesday February 20, 2018 ni tawh ki tuak hi. Union Day February 12, 2018 Monday tawh ki tuak ahih man in Kawlgam ah nithum akizom in zum kikahlo ding hi.
Zogam pua aom Zomi atam zawte in zomi Namni Saturday February 17, 2018 ni in bawi ding uh aa, tuani ciang in “Happy Zomi Namni” ci in, gualnop na tuamtuam ki bawl ding hi. Mi pawlkhat te’n Merry Christmas taang’n “Happy Holiday” acihuh bang ahita diam.
Zolaam, Zongeina tuamtuam lahna, lasak na, nungak/tangval/naupang melhoih kidemna model show, pahtawina piakna, nek le dawn leh adang gualnopna tuamtuam tawh kibawl ding hi.
Zomi Namni ong ki pat khiat na thu taktak enkikleeng, Zomi te leh Mualmi dang teng in Kawlgam ah federal democracy kiukzia tawh ki uk ding deihna bulpi hi.
A hi zong in, Gen. Aung San makaih na tawh Kawl, Chin, Kachin Shan etc. teng kipawl in Mangkang kumpi te tung pan in suahtakna lakding thukimna, Panglong agreement suaikaih na February 12, 1947 in kinei hi. Tua zawh akipan in mualmi teng in eilehei kiukna thuneihna teng ongbei in, Kawl te khutnuai ah kitung ta hi.
Union Day February 12, Independent Day January 4, Chin/Zomi National Day February 20 ni cih te pen Mualtungmi teng Kawlte ukna khutnuai ah i tun ni, ci leng kikhial lo kha ding hi.
Gen. Aung San tanu Aung San Suu Kyi Kawlgam kumpinu makaih na tawh, Kawlngian ong zang in, 21st Century Panglong conference tawh mualmi teng ong khem leuleu hi.
Kawlgam ah minamneu te mualtungmi te, a diakdiak in sanggam Kachin te, ong bawlsiatna te, leitung gam tuam tuam te in ong theihpih khollo uh hi.
Kum 70 Val Galkap kumpite a kipan ASSK’s Kawlkumpi te thuman lohna leitung bup in ong theih pih semsem hi.
2017 in Muslim Rohingya te ki bawlsiatna (persecution) vai thukan Reuters reportors minih kiman te amahkhan kipialohi. Kawlgam ah human rights aomlohthu kiselzo nawmlo hi.
GENEVA (Reuters) – Conflict between Myanmar’s army and guerrillas of the Kachin Independence Army (KIA) in northern Myanmar has escalated since Jan. 19, 3019 including in Sumprabum, Waingmaw and Tanai townships, a U.N. humanitarian report said on Friday.
The U.N. human rights investigator for Myanmar, Yanghee Lee, was barred in December from visiting the Rohingya areas and also Kachin and Shan states. Reuters February 2, 2018
Zomi Namni aki bawl ciang in ilung ngaih dingin thupi kasakah, ipu te ngimna bulpi ahi, “Kawlgam ah federal democracy” ong om na ding deihna, “Kawlte leh Mualmi te liangko kikim ding deihna” thu phawk zel ni.
Israel te AD 70 kum a kipanin leitung mun tuam tuam ah kithehthang mang uhi. Kum 1870 val gam neilo in om uh hi. 1948 kum in UN vaihawmna tawh agamuh ngahki hi. Kum tampi midangte bawlsiatna athuak uh hang in Pasian nusialo in, apau leh a ngeina te uh kemzo uh hi.
Mun tuamtuam om Jews te’in Israel gam khantoh nading vaihawm uh hi. Zomi te’n zong Israel te etteh ni.
Zomi Namni kum 70 cingta, Israel te’n gam angah kikuh zong kum 70 cing ta hi. Etkak dih ni, Zomi te’n thu neilo ahih man in Zogam kipuahlo in khangto lohi.
Pasian hehpihna hang in upna tawh, Abraham suan leh khak te ahi ei Zomi te in zong, Israel te khantoh bangin khantoh nading hanciam ni.
Zogam ah ateeng ngeilo mi tampi in, Zogam vai i ngaihsut kholloh bang in, kenzong Israel gamvai ngaihsun ngei khollo hi ing.
America kumpi palaizum, 2018 kum sung in Israel te khuapi Jerusalem ah kikhin nading thu ongom ciang in, Israel gamthu ka simpha hi.
1948 in Israel leitang keigawgam hilai in bangmah piang nailo hi, tuhun ciangin Israel gam ah anteh theipuam hoih mahmah hi. Khantohna khempeuh Israel ah om khin hi. Pasian kamsang te’n LST sung aa agenkholh thute ong taangtung ta hi.
Zomi te’n zong Israel gam aa thupiang te lungngai in, Pasian bek mah imuan ding kisam hi.
Zomi te lungkituak hanlungciam khangto diam.
Topa thupha.
King Mang
February 12, 2018
Comment piaknop aomleh...