Lungkia kei ni ~ Khup Lian Thang

Lungkia kei ni ~ Khup Lian Thang

Gamvai ah galkapte ukna buluhna hangin i gam a siacip ding dinmun hong hita. I mailam khim bangin ong zing ngaungau tawh kibang.

Covid-19 in nawk cihtakin hong nawk ngekngek. Buaina lianpi nam nih hangin i gam sung i innkuan i kim i pam ah dahna kahna hagawina tawh kidim hi. Hih sangin a haksa zaw om nawn keileh a kilawm phial dinmun ahi hi.

I gam paizia, sumbawl paibawlna, cidamna le kikep kikhoina, tate naute pilsin siamsinna khempeuh tutadih in khawlcip kisia cip.

Ukna buluhte, thu neihna a nei tampite in golhguknek le angsung lianbek khualna tawh nasem, mipi’ haksat laitakin mimal meet na dingin hanciam in ki-awi lo takin nasem ngam. I gam a kisiacip ding ai ta mai tam maw?

Ahih hangin thumanna le mipi’ phattuam nadingin itna le vaina tak tawh a ding khia mi hangsan pawlkhat ki om lai hi. Ukna buluhte’ khut sung panin suahtak nadingin a hanciam, lampi tuamtuam tawh a sem a kipia khia, nuntakna sisan a pia khia, neih le lamhte a hawmkhia tampi mah ki om hi. Khatlekhat zahtakna kipia siam ni. Ki pahtawi siam ni. Kipanpih kidinpih ni. Kizahpih, ki langdodo, ki el bawlbawl hun hihetlo hi.

More: Khimzing sungah ~ Khup Lian Thang

Pasian muangin, lungkia lo in, thuman le cihtakna tawh, khat le khat khut kilen in i hih theih bangbang tawh i kihuh diamdiam i pankhop diamdiam nakleh gualzawhna i ngah veve ding hi, gam hoih gam nuam le a khangto a suakta gamkhat a tungzo kik veve dingin lam en lai ing. Lungkia kei ni. Khup Lian Thang