ZAM Thupuak :: 17 May 2015

 ZAM Nasep asiaunuamte theih ding

⦁ Zomi kipawlna ZAM Card leh UN Card nei hiding.
⦁ Khua kipawlna leh Pawlpi lutna anei mi hi ding.
⦁ Mangpau hoihtak a pauthei, agelh thei hiding .
⦁ Akilawh thei natna nei mi hilo ding hi. Gentehna: TB, Hepatitis B or C leh Cancer cihte…!
⦁ Minam veina leh deihsakna anei a, ZAM thukhun leh ngeite’ a azui ding mi hiding.
⦁ Teelcing peuhmah hunbip (9am-6pm) kal 1 khat vei off hiding a, teelcing angah ni aki pan asem theipah hiding hi.
⦁ Candidate dingte, amau leh amau hong ki candidate tawm theilo dinga, Pawlpi/Khua makaite’ theihpihna tawh hong candidate sak mi hiding hi. (Theihding: Teel theihding mi “Single” hileh kideih zaw hi!).
⦁ Teelcing mi peuhmah kiteelna hunsungah ami pumpi mahmah aom te’ bek kiteel thei ding hi.
⦁ Hih kiteelna sungah ateel thei ding (mee pia thei ding) Pawlpi pan tanggmi 1 leh Khua kipawlna pan tangmi 1 ta hidinga, Candidate teel theih ding pen, Pawlpi pan hita leh Khua kipawlna pan hita leh numei/pasal aom theizahzah kisang ding hi.
Candidate lutnuam peuhmah in ZAM zumpi ah May 18-31, 2015 Sunday ni ciang form kila/kiten thei hi.
Ani : June 08, 2015 (Monday)
Ahun : 11:00am-5:00pm
Amun : Chinese Assembly Hall
ZAM Election Committee

UNHCR Vai theihhuai thu tuamtuam

⦁ Vai khat peuhpeuh tawh UN ah pai nading naneih leh 8am satma in tunsawm hamtang in.
⦁ Innkuan lutpih ding peuhmahin na nupa un nathu nala uh hoihtak kikum masa hamtang un.
⦁ Innkuan lutpih ding tuai card bawl peuhmah in hong tuai nu/pa i UN No. lotngah hamtang in.
⦁ UN thangthu hoihtak ciamteh in phone tawh hong kidot leh zong na gen theih dingin lotngah sawm in.
⦁ Vanleng tung natuanma teng UN a napiak na phone nambat kuamah pia kei in.
⦁ USA lam pai dingte zuau khemna tawh kisai na kipulak nop a leh [email protected] lai kikhak thei hi.
⦁ USA vaidang tawh kisai dotnop naneih leh [email protected] ah lai kikhak thei a, 03-2141 5846 tawh kiho thei hi.
⦁ RSC, DHS, IOM hong kisap ding nangak sungin mat le hen natuak leh OPI ah na report mah bangin RSC ah zong thu zasak in.
⦁ RSC phikhit zawh DHS, IOM na tunma ta naneih a na tangthu sungah nata na khumnop leh RSC ah sangkah ni thum ni (Wednesday) nisim zingsang 8:30am pan 4:00pm) kikal kipai thei hi. Tua ni na ngah kei a leh a nidang hong pia ding uh hi.
⦁ UN zum pan hong kisap ciangin koi department pan hongsam, bang hang hongsam, bang ni ding a hong sam hoihtak in teldot pah in.
⦁ Na thangthu pen na len ni ciang bek kimang ding hilo a na tunna gammi na suah ni ciang zong hong ki dongkik ding ahih manin hoihtak ciamteh in.
⦁ Interview khat peuhpeuh na lut ciang tellohna na neih leh kamlet te kiangah huhna ngenin na tellohna hoihtak dongin la ulian te kiangah tel keng ci in.
⦁ USA natun khitzawh a tawmpen kha 6 sung hong kipuak munah omsuak sawm hamtang in. Na om suak kei a leh nangah ding huhna te tan ding hi teh.
⦁ P3 tawh Nu le Pa leh sanggam zi le pasal nei nailo kum 21 nuaisiah nasap nop a leh DNA kisit masa ding a, sumbei teng na piak phot kul hi. Nu le Pa taktak ahih leh a sumbei teng hong pia kik ding uh hi. A man kei a leh sumbei teng hong piakkik nawnlo ding uh hi. DNA sitman amasa pen pa/nu $600 hi ding a, adang teng pen mi khat teh $400 ta hi ding hi.
⦁ RSC & DHS panin hong kisap theihvet kei leh na phone nambat aman mah maw update hamtang in. Amau in hong samsam na hi gige in nang contact ngahlo hi gige mawk le teh a ciangtan hun acinciang na file hong khak sak ding hi. Tua ahih manin na contact nambat na update tangtang ding kisam hi. Theihbehnop a om leh ZAM zumpi hong hopih un!

United States Ngeina le Dan Thusinna Khutzat Laibu : ZOMI (azom)

Khenpi Sawmna
Nasepna ah Gualzawhna

Nasep Hun
US gamah nikhat nasephun nai 8 sung hizaw a kal khat, nipi khat ni 5 hih OT hun lang sep zong kisem thei hi. Gambelmi tamzaw in hunbit semzaw a, sumlut aipeng ngahna tawh hunlang septheihna munah zong sem uh hi. Nasepna Pu pawl khat te’n
kal khat sung nasep hun nai (40) tung siah i sep leh a nai te pen (OT) hun val sep sem hi ci-in sep tha man apia zong om hi. Ciangtan naitha man tungah nai (1/2) lang a kipan, apiak te pa (OT) hun val (aipeng ngaih) thaman in kaihsak uh hi. Pawl khat nasepnate pen sun/zan semsuak in sunhun sempawl zanhun sempawl ci-in khennih in khen uh hi.

Thaman
US gam buppi sungah bangbang nasepna munah zuihding zatding gam khen kigawm leh gam khen kigawmpi sung a ciaptehna dan pen nasep a nuampen zong nai khat thaman Dollor 7.25 hi-in, adang gam khente ah thaman nai khat ciang a a tam zawk hang, nuntak khawsak dan sanna hang tawh zatna tam veve hi. Nasem atamzaw in kal 1 khat vei kal nih khat vei ahih kei leh kha khat khat vei thaman sum sang hi. Pawl khate Bank sungah a hizong thunin thaman pia uh hi.

Angeina leh ahoih pen ah nasem te Bank laibu sungah thunin gal muanhuai pen lungmuanhuai pen suak a, Bank zumah ei i vapai a hunbei ding teng zong nuamtuam hi. Hibangdan zat theih nangin i pu (Boss) te leh Bank nasemte tawh kikum dot theih hi (i ngahzah thaman gawm) a kician sumlut (hongdok ding teng ki dokzawh a omlai) dokkhiat teng leh adawh loh teng, athem anengin a thaman hong lak ding uh hi.

Thaman pan akidok sum
US gamah nasem mite i sumlut teng pan dokkhiat dan atuamtuam om hi. Angeina ah pen a mau sumpi tungtawn panin (20% pan 30%) bang dok thei hi.
⦁ Gam gawmpi leh gam khente pan a ciangtan sumlut mangmu US gam sungah teng ii hih zawhteh nasep anei peuh in mangmu (phiangsiah) pia ding hi. Tua sumte tawh lampi sang, zato te leh mikim ading noptuamna apia vaihawmnate leh a ki tangsam bang zang hi.
⦁ Khamuan (mihing) ki kemna mangmu (gam gawmpi sungah sumval om ki cianlo dan gentehna-FICA) en nasep ngah khin i sepsung khasim sumlut pan hong dokzaw hi angeina bang a tawlngak khuan kum (65) kim te ading hi.
⦁ Cidamna lam (or) nuntak khamuan nang pawl khat te a cidamna lam/nuntak khamuan nang cih bang dan koih ahih manun tua teng pia uh hi. Tuate a ngahna dingun nasem te tung dok uh hi a dokte uh pen tua abeizah i them zong kidawk zolo hi.

Phiangsiah piakna ding kiginkholhna

US gam sunga teeng mikim, sumlut anei peuhpeuh in kumsim April kha 15 sang ziakailo apiak kim dingin bawl khin uh hi.
Ciapteh ding khatah gammi suahna i ngah leh i sep suakna ah a sem lut mangmu piakna hang tawh a ki zui-in sumlut mangmu tawm bek piakha uh hi. Hih bang khasum sumlut tung pan mangmu apiak uh hang in (aki khungdan/ngeina bangin) sumlut mangmu pen piakkik sum dingin ngen kik thei hi. Sumlut mangmu piakna dingin laidal te tawh gawmin na lak theih ding thupi mahmah hi.
Zopzop lai ding …

UN in gamthumna puak ding hamsatna tuak

Kuala Lumpur, May 10, 2015:Malaysia in Refugee thak lamen ngam nawnlo uh hi. Bang hang hiam cih leh Refugee a la gam tawm ta ahihman in a beisa kumte bangin gamthumna puak ziauziau zo nawnlo ding hi. UNHCR makaipa Richard Towle in a genna ah “Masak zawk dingte pen Middle east, Sub Sahara leh Africa gamte hi-in, bang hang hiam cih leh amau gamah haksatna lianzaw hi” hi. “Nung kumin mi 15,000 ai ding gamthumna lut theihna lai kikhiat sak hi. Tukum ciangin Refugee a la tawm ta ahihmanin tua bang a lai kikhiatsak pen a lang sangin tawmzaw kha ding hi” cih thu Richard Towle in Interview na ah gen hi.

Tulaitak Malaysia ah Refugee 152,570 om hi. Richard Towle in Interviewna ah hibang in gen hi “1970 leh 1980 kiim pawl in India leh China buai lai a gunkuang tawh Malaysia a pai Refugee te pen leitungbup in hehpih in vei uh ahihman in gamthumna a tun theihna dinguh a manlangin vaihawmpih uh hi. Ahizongin tua bang hunte tun a bei hita hi” ci hi.

2014 kumin leitungbup ah Refugee pen 14.2 Million pha hi. Tua ahimanin UNHCR in a kisamzaw leh masak zawk dinga kilawmte lamah mun la ding uh hi. “Malaysia a om Refugee khempeuh pen Kum dang dan in huh ziahziah zo nawn lo ding hi ungh. Huhna hong lut zong tawm semsem ta hi. Hih thu hangin innteek Malaysia mahmah inzong amau gam a om Refugee te vai ah ngaihsutna tuam dang hong nei uh kul ta hi” ci hi.

Malaysia a Refugee om teng lakah 90% pen Kawlgam pan ahihi. Towle in a thugen zom in “Amaute pen simawhna, nengniamna leh mihing kibawlsiatna hangin Malaysia ah hong galtaai hipi pen uh hi. Hibang mite huh dingin kal suan khia kei lehang amau pen kuama phawk khak loh in Malaysia gamah bawlsiatna leh nengniamna thuak tawntung ding uh hi. Tua ahihmanin amau mailam ding khualna tawh minkhumna a kivaihawmsak zel ahihi” ci hi.

Nung kaal sungin Thailand kumpi in Songkhla leh Padang Besar Besar ah Kawlgam pan in a kipua khia Rohingya te luang a hon a phumna leihawm mu khia uh hi. Tua bangmah in Malaysia gamah zong Rohingya te leh Bangladesh mite sila bangin a kikepcipna munpi zong mu khia uh hi.

Tusung ZAM Palaai te buaipih diak teng

⦁ Cing Za Dim (Thalmual), May 11 ni-in Tung Shin zato ah ki buaipih.
⦁ Kai Lam Thang (Sakhankyi), Kai Cin Thang (Sakhankyi), Hau Pi (Sim Suangzang), May 1 ni-inDangwangi zum panin hong suakta thei.
⦁ Cin Khen Kap (Buanli) leh Mun Sian Tuang (Ngente) May 13 ni CID te mat hi-in a ki buaipih laitak.
⦁ Langh za Tuang (Laaitui), May 8 ni-in Bukit Jalil Camp a om Embassy ah ki buaipih.
⦁ Langh Sian Thang (Laaitui), Malaka Camp a om Embassy ah ki buaipih.
⦁ Dam Cing Mang (Nahnuai), Jinjang Lockup a om ki buaipih.
⦁ Dim Khan Khual (Sakhankyi), Embassy a ki buaipihin cidam inkhualam tung kik thei.
⦁ Dong Khan Khai (Phai), Langkap Camp a om Embassy ah ki buaipih.
⦁ Pau Deih Tuang (Langzang),Bukit Jalil Camp a om Embassy ah ki buaipih.
⦁ Zam Suan Thang (Haupi), Langh Cin Thang (Haupi), Langh Khen Kap (Buanli), Operasi tawh kiman UN ah ki buaipih.
⦁ Langh Cin Thang (Haupi) leh Mung Sian Tuang Operasi tawh kiman UN ah ki buaipih.
⦁ Dal Suan (Anlangh), Dal Muan Sang (Tuikhiang), Suan Ngaih Thang (Tuikhiang), Khai Za Tuang (Vangteh), May 1 ni-in Kalana Jaya pan a kiman ki honkhia thei.
⦁ Lian za Gin (Tualzang) leh En Khan Muang (Luangel), May 13 ni-in Sungai Buloh ah ki buaipih.

Bishop Felix Lian Khen Thang & Rev. Fr. Robert Kam Hau tawh holimna om ding

Hong tung ding May 22 (Friday) ni ciangin Kawlgam pan hong zin Siampipa Bishop Felix Lian Khen Thang & Rev. Fr. Robert Kam Hau tawh Khua makaite, Pawlpi makai siate, veng makaite leh a lunglut khempeuh tawh holimna kinei ding hi.

Zomi akua mapeuh hibang hunhoih ngah ding hamsa mahmah ding ahih manin anuai a hungeelna bangin nong ki helkim zawhna ding un deihsakna lianpi tawh kong zawn uh hi.

Amun : ZAM Hall
Ani : 22 May 2015
Ahun : 1pm-3pm
Zinmang : Felix Lian Khen Thang &
Rev. Fr. Robert Kam Hau

Kiallap Malaypau & Mangpau sinna

Zopau
1. Ka ci nuam kei, Siavuan tawh kimu nuam ing.
2. Min khumman RM 15.
3. Na natna koitak hiam?
4. Ka natna bang ahia?
5. Siavuanpa aw, hehpihna tawh UNHCR ah memo hong gelh sak ve, kanat lam a theih na ding leh a beizah a theihna dingin.
6. Hih pen lungno thahna/dalna zatui hi. Siavuan te hong gen bangin a course beidong ne in.
7. September 13 ni hong paikik in maw.
8. Nong paikik ciang sisan sit ding, hehpihna tawh a tawmpen nai 8 sung bangmah nane ken maw.
9. Nadam siang dong muktuam nathuah den in maw.
10. Na meima nisim sawpsiang den kul hi.
Malaypau
1. Saya sakit, saya perlu jumpa doktar.
2. Caj pendaftaran adalah RM15.
3. Mana sakit?
4. Apakah penyakit saya?
5. Doktor, tolong tulis memo kepada UNHCR dan beritahu mereka penyakit saya dan saya perlukan bantuan kewangan untuk rawantan.
6. Ini adalah antibiotik. Anda perlu makan mengikut waktu yang ditetapkan dan habiskan.
7. Temujanji anda adalah pada September 13.
8. Anda perlu buat ujian darah temujanji yang akan datang, sila puasa sekurang-kurangnya 8 jam.
9. Anda perlu memakai penutup mulut sepanjang masa sehingga anda pulih.
10. Luka perlu dicuci setiap hari.
Mangpau
1. I am sick, I need to see a doctor.
2. Registration fee is 15 Ringgit.
3. Where is your pain?
4. What is my sickness?
5. Doctor, please write a memo to UNHCR to tell them my sickness and cost for treatment.
6. This is an antibiotic. You need to take according to the time guide and finish the full course.
7. Your next appointment is on September 13.
8. Next appointment is to do blood test, please fast for at least 8 hours.
9. You have to wear a mask all the time until you recover.
10. The wound needs dressing everyday.

UN vai tawh kisai lai kigelh sak den

Innkuan lutpih (DS), REG, RSD, RST, RSC, DHS leh IOM ah lai gelhsak nuam peuhpeuh ZAM zumpi panin a khawnkhong in lai ki gelhpih den hi.

Navak ciang sum pua hamtang in

Khua sung navak ciangin a tawmpen RM50 or RM100 pua hamtangin. Deihloh penin Palik te tawh kituakna, tuahsiatna khat peuhpeuh tuak le teh nang adingin hong manpha mahmah ding hi.

ZAM ah Ngeina puan leh vante kingah

ZAM zumpi ah ih ngeina Zopuan leh vante ki leithei hi. Aki ngahthei van te: Zopuan: a bantong leh a bansau (pasal), Zoniik nam tuamtuam (numei), Puandum, Zodial naikhau (silk), Puanlaisan, Zokhi, Tanghciin, Khephiau, Zolukhu, Zothungkuah, Zodial atuamtuam kingah hi.

ZAM Hall ki kawmthei

ZAM Hall pen Session khat (nai 4 sung) RM200 ki lading a, nai 4 khitciang azatbehtoh nopleh naikhat RM50 ki lading hi. Aki zangthei vanteng: Aircon, Tutphah 150, Sound System, Drum Set 1, Wired Mic 1, Wireless Mic 2, Usher Counter etc…
Note: Guihtheih khamtheih zat ki phallo hi.

ZAM zumah leitheih tuamtuam

(1) English to Zomi Dictionary RM50
(2) Zolai Siangtho RM50
(3) Kawllai Siangtho RM30
(4) Galhiam Labu RM30
(5) ZYA Tin Jubilee Magazine RM50
(6) Zogam, Zomi tangthu RM20
(5) Namsiaza RM20
(6) Zomi DVD/VCD tuamtaum 1 teh RM10

Kidawm ciat ni!

Tusung teng mat leh hen omden ahih manin Zomi te ih hawhna ih ciahna ah kidawm in pilvang ciat ni.

Thungetna ah phawk ciat ni

Zomi labupi Lengtong Pauno pen tulaitak a mit hoihlohna hangin Asia Jaya ah Eye Specialist te aki etsak laitak hi-in, Zomi mimal kimin thungetna ah phawk ciat ni. Amah a hopih nuamte in Ph. 011 1765 8704tawh kihopih thei hi. A veh nuam leh sumlehpai tawh itna a lak khia nuamte zong ahun zui-in a omna inn ah kihawh thei hi. Pu Lengtong Pauno pen mi li-leh-nga khawng ading bekin a it huai leh a manpha hilo in Zomi bup adingin amah pen manseh theihloh mi manpha mahmah leh a ithuai khat ahi hi.

Zomi Card tawite ading nasep

⦁ Shah Alam Japan ansai a sem ding pasal 1 kideih. Khasum RM1000. Nipi nisim off. Omna leh anpia.
⦁ Veng tuamtuam a om KK Super Mart saite a sem thei ding Zomi citak pasal/numei Malay or Mangpau atel honkhat kideih behlai hi. Nasep hun 8am-8pm. Sun nai 2 sung khawl. OT nai 2 sung omden in nai khat teh RM6.50. Kha khat RM1237.50 ngah ding. Omna leh an pialo. Na omna veng tawh kinai penpen ah septheih nading hong ki vaihawmpih ding. Theihding : May 12 leh 15 ni a interview te May 18 leh 19 ni zingsang nai 8am-6pm ciang nasepdan sinna (training) om ding hi.
KK Super Mart alunglut te Monday & Wednesday ni sun nai 2pm in ZAM zumpi ah interview na om ding hi. ‘ 012 367 4665

Lungdamkohna

⦁ Rev. Dr. Cin Sian Pau (Sezang) in Thupuak a ding RM50 hong piakhia ahih manin ki lungdam mahmah hi.
⦁ Nu Man Khen Dim (Heilei) in Nute ni phawkna in Thupuak a ding RM50 hong piakhia ahih manin ki lungdam mahmah hi.
⦁ Cin Sian Gin (Kapteel) in ZAM zum ading A4 laidal dal 500 hong piakhia ahih manin lungdam mahmah hi.
⦁ Khen Khua Tuan (Keizang) Thupuak a ding RM50 hong piakhia ahih manin ki lungdam mahmah hi.
⦁ Vanglian Man City Zomi Fans te’n ZAM zum panpihna in RM60 hong piakhia ahih manin ki lungdam mahmah hi.
⦁ Gamsung gampua mun tuamtuam pan ZAM nasepna te tha na piak nopleh lungdamtak in hong kisang ding hi.

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  [email protected]

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…