Lungdamna bangin lamangthei hiam? ~ B Nelson

Lungdamna bangin lamangthei hiam? ~ B Nelson

Medical Research bawlte’n, ‘Lungdam dan theite leh lungnuam thei mite pen, mi lungkham gigete sangin natna a neih uh leh zong dam baihzaw uh hi,’ ci uh hi. Rev. Ernest V. George’ laigelh in ka lungsim hong sukha mahmah a, hih lai kong gelh hi. Acih leh ‘Bangte in I Lungdamna hong lamangthei hiam? cih paunakte pansan in kikum ni.

1. Ahi ding mah sakna (Prov. 20:12): Hih Paunak gelhpa’n, Topa tungah lungdam ding, amah hong piaksa I khua muhtheihna, khua zaktheihna, leh I pumpi mahmah hong piakkhongnate hangin lungdam ding gen hi. Mihingte’n tuate ahi ding mah ahi cihna kinei a, I deihbang a lawhcinna I neihloh ciangin, lungkhamna, kingaihsiatna, manpha kisaklohna, nuntakna in man neilo sakna cih bang om thei hi. Tua manin mun dang, na dang tuamtuam ah lungkimna leh lungdamna kizong thei zel hi.

2. Hamphatna lunggulh den (Prov. 21:2): Mitampite’n na hoih, na pha, amau’ ngah ding a kilawmlo khawng peuh lamen in om thei uh hi. Hih pen ei Christian kicite neih dingin kilawmlo bek thamloin lungkimna leh lungnopna I ngah nading hong khaktantu suak thei hi. Hici bang zong na om hi, My grandfather once told me that there are two kinds of people. Those who work and those who take the credit. He told me to try to be in the first group, there was less competition there. -Indira Gandhi.

3. Haivaitaka nuntakna (Prov. 28:26): Mihaite amau’ theihna bek ah kinga, kimuang, midangte’ thuhilhna zuilo, mi khualna omlo, amau’ hamphatna ding a om nak leh zuau gen phamawhsa lo uh hi. Mi khat in amah ah kimuanna hong koih a midangte a thulak kei leh bel amah lampi tot pen diklo deuh suak thei hi. Pasian thuhilhnate, a hong piak makaite, thu zuihlohna in lungkhamna, lungzinna, leh ut lohpen na tawm khoih khak leh hih khak theihna hi. Tulai innkuan leh gam sungah buaipih ngaia omte thuhilhna zuih lohna gah hipen hi.

4. Kihihsakna tawh kidimna (Prov.11:2; 16:18; 18:12; 26:12): Mihingte’n kihihsakna, bawlthei kisakna, etc. cihte kinei ut mahmah hi. Hih pen lunggimna leh lungkhamna kipatna bulpi suak thei hi. Tua hangin mi’n a pahtakbawl kei uh leh khasiatna leh thangpaihna in zom a, tua in lungdamna ding panin dal thei hi. Hih tawh kisai in I Lai Siangtho a Kumpi Solomon tung pan kisaktheihpih ding khop nate neimah leh tuate in lungdamna leh lungnopna taktak leh lungnopna kicing a piakzawh lohna kimu thei hi (Eccl. 5:10). Bek thamloin tuate bangmah lo, a mawknapi hi na ci zawsop hi.

Tua ahih manin, tuabanga lungdamna hong lamangtheite pan kivenna dingin:

1. I ngaihsutnate positive sakin, kingaisia loin, ngahsa thuphate simpha in Topa’ tung lungdam dan kisin pha ni.

2. Mite’ pahtak ding leh hamphatna lamente hizaw loin, midangte pahtak bawl siamzaw leh hamphatna a hawm sawn thei dingin tha la ni.

3. Thuhilhna maan, Lai Siangtho tungtawn leh makaite a kipan I zakte zuih leh man ding kisin ni. Mi hazatna leh enna tawpsan in, hih ciang a tuntheihna uh thuguk (panlaknate) zahtaksak ni.

4. I Topa Jesu Khris kiniamkhiattaka a thuakna phawk kawmin, kiniamkhiat in, midangte itna, khualna tawh nuntakzia kisin pha ni.

Ezra in lungkimna thuguk neipa pen tel mahmah ahih manin Nehemiah 8:10 ah, Note dah lo leh lungkham loin om un bang hang hiam kong cih leh “Topa’ hong piak lungdamna in note hong thahatsak ding hi,” ci hi.

Bangteng I gen zongin lungkimna leh lungdamna taktak bel Topa pan a hong kipan vek ahi cih I phawk thakthak ding ahi. Tua manin bangbang hong piang tase leh Jesu Khris lam mah mitsuan tawntung ni. Topa’n lungdamna thuguk a neithei ciat dingin Thupha hong piatek ta hen aw.

(By B Nelson, Asst Pastor)
Zomi Christian Fellowship, Delhi