Lungdambawl thupuak

Lungdambawl thupuak

It teng lungdambawl thupuak 2015 kong puak hi. LUNGDAMBAWL THUPUAK: ELIZABETH LE MARY

Luke 1:39-45
January 2011 in Israel gam hawh theihna ding hunpha khat Pasian in hong geelsak a ka lungdam mahmah hi. Ka sangkahna Trinity Lutheran Seminary te vaihawm siamna tawh huhna pawlkhat ngah ka hih manin a kihel thei suak ing.

Nazareth khua a om siampi Zechariah inn ah ka hawh uh ciangin, a kong lutna gei ah numei naupaai nih lim sik tawh a kibawl na om in, a mu khempeuh in hih tegel pen Elizabeth le Mary hi ngelngel ei ka ci ciat uh hi. Pasal pawl in mann kilakpih ding phamawh salo uh hi, ko numei pawlin mann lakloh theihloh in ka ngaihsun uh a, puak phangphang in ka nawhlak mahmah uh hi.

Elizabeth: Siampi Zechariah i zi hi. Aaron suan siampi nam mah ahi hi. Numei citak khat a hi hi. Tuadan numeite bek mah siampi te-in tenpih thei hi. Topa Pasian in a lametna teng uh a bei ciangin tapa Tuiphumpa John pia hi. John pen ih Topa Jesuh paina ding, a taangko khol leh lampi a sialsak khol Thuciamthak ah kamsang masa pen hi.

Mary: Numei khempeuh gai thei ding hi napi in, nungak siangtho ih cihte gai theihna ding thu om lo hi. Mary pen Kha Siangtho in a naubu zangin To Jesuh a paai sak numei khat a hi hi. Judahte tangthu ah Mary a tenpih ding Joseph pen meigongin kiciamteh hi. Tua ahih manin Pasian in Mary a kem ding khangno na teel lo hi ding hi. Mary kiangah vantungmi in naupaai ding a gen ciangin, lamdang sa mahmah hi. Ahih hangin vantungmi kiangah, ‘Kei pen Topa nasemnu ka hi hi. Na gensa bangin keima tungah hong piang ta hen,’ a ci hi.

Elizabeth le Mary: Elizabeth kiangah Mary hawh pah hi. Elizabeth in Mary hopihna awging a zak ciangin a sunga a naupaii a hong diang hi. Elizabeth zong Kha Siangtho tawh hong kidim a, nakpi takin kiko-in, “Numei khempeuh lakah thupha ngah pen nu na hi a, na neih ding naungek in thupha ngah ding hi. Ka Topa’ nu kei kiangah hong hawhna dingin, bang hangin hih bang thu lian kei tungah hong tung ahi hiam?” a ci hi.

Thukhupna: 2015 Lungdambawl pawi hun a mu thei dingin ih Topa in hamphatna hong pia lai hi. Elizabeth le Mary a kimuh uh ciangin Pasian vaihawmna na lianpi sungah a kihel khak man-un nakpi takin lungdam mahmah uh hi. Eite zong Pasian in a ma Gospel taangkona lianpi ah hong zang nuam mahmah a hih man-in lungdam takin ih kihel ciat ding hi.

Don Ngaih Lian

Christmas 2015
Columbus, USA